Nasayaat nga Ulidan​—Ni Ruth

Ti balo a ni Ruth ket nagsayaat nga ulidan iti kinasungdo. Pinilina ti kumuyog iti baketen a katuganganna a ni Noemi imbes nga agsubli iti nakayanakanna nga ili, a sadiay ket nasaysayaat koma ti biagna. Gapu iti desision ni Ruth, bimmassit ti posibilidadna a makasarak iti pakiasawaanna. Nupay kasta, saan laeng a ti bagina ti pinanunotna. Napatpateg kenkuana ti ayatna ken Noemi ken ti tarigagayna a makikadua kadagiti agdaydayaw ken Jehova ngem ti panangpennek iti tarigagayna a makiasawa.​—Ruth 1:8-17.

Agpalplanoka kadin a makiasawa? No kasta, tuladem ni Ruth. Saan laeng a ti riknam ti ikabilangam no di ket ammuem no ania dagiti positibo a kababalinmo a makatulong iti agbalinto nga asawam. Kas pagarigan, nasungdo ken managsakripisioka kadi? An-annurotem kadi dagiti nadiosan a prinsipio, uray no marigatanka a mangaramid iti dayta gapu iti kinaimperpektom? Saan a desperado ni Ruth a nagsapul iti pakiasawaanna. Ngem idi agangay, isu ket nakabirok iti asawa a pudpudno a nataengan ti panagpampanunotna ken kapadana iti kababalin​—kangrunaan iti amin, agpada nga ay-ayatenda ti Dios. Mabalin met a mapasamak dayta kenka.