KAPITULO 26

Ti Ngay Casual Sex?

“Makiseks dagiti agtutubo gapu ta kayatda nga ammuen no agingga iti ania ti kabaelanda nga aramiden ken no kasano kaadu ti makaseksda.”​—Penny.

“Saan nga ibain dagiti lallaki a pagsasaritaan ti maipapan iti dayta. Ipampannakkelda ti pannakiseksda iti adu a babbai uray no adda nobiadan.”​—Edward.

IPAGPANNAKKEL ti adu nga agtutubo ita a mabalinda latta ti makiseks uray no awan ti relasionda (casual sex). Ti dadduma ket addaan pay iti am-ammo a mabalinda lattan a tawagan kaanoman a kayatda ti makiseks uray no saanda nga agin-innayat.

Dika masdaaw no kasla magargarika met a mangaramid iti dayta! (Jeremias 17:9) Ni Edward, a nadakamat itay, kinunana: “Adu a babbai ti mangaw-awis kaniak a makiseks, ket ti panagkedked ti karirigatan nga aramidek kas maysa a  Kristiano. Nagrigat nga ibaga ti saan!” Ania dagiti prinsipio iti Biblia a masapul a laglagipem no adda mangawis kenka a makiseks?

Ammuem no Apay a Dakes ti Casual Sex

Nadagsen a basol ti pannakiabig ta dagidiay mangar-aramid iti kasta “didanto tawiden ti pagarian ti Dios.” (1 Corinto 6:9, 10) Siempre, agaplikar dayta agpadpada iti dua a tao nga “agin-innayat” wenno dagidiay mangar-aramid iti casual sex. Tapno mapagballigiam ti sulisog kadagita a situasion, masapul a ti panangmatmatmo iti dayta nga aramid ket kas iti panangmatmat ni Jehova.

“Kombinsidoak unay a dagiti pagalagadan ni Jehova ti kasayaatan a suroten.”​—Karen, Canada.

“Laglagipem nga adda dadakkelmo, adu ti gagayyemmo, ken maysaka a kameng ti kongregasion. Mapaaymo amin ida no tumulokka iti sulisog!”​—Peter, Britain.

No tuladem ti panangmatmat ni Jehova iti pannakiabig, masursurom a ‘guraen ti dakes,’ uray pay no makagargari dayta iti nakapuy a lasag.​—Salmo 97:10.

Maisingasing a basaem: Genesis 39:7-9. Panunotem ti natibker a takder ni Jose maibusor iti seksual a sulisog ken no kasano a nabaelanna ti agkedked.

Dimo Ibain Dagiti Patpatiem

Gagangay nga ipagpannakkel dagiti agtutubo ti maysa a banag a patpatienda. Pribilehiom nga itandudo dagiti pagalagadan ti Dios babaen iti kababalinmo. Dimo ibain ti takdermo maipapan iti panagseks ti di pay nagkasar.

“Iti damo pay laeng, silalawag nga ipakitam nga adda dagiti sursurotem a moral a prinsipio.”​—Allen, Germany.

 “Am-ammodak dagiti lallaki a kaeskuelaak idi haiskul, isu nga ammoda nga agbambannogda laeng a mangawis kaniak.”​—Vicky, United States.

No natibkerka a mangsalimetmet kadagiti patpatiem, pagilasinan dayta nga agmatmataengankan a Kristiano.​—1 Corinto 14:20.

Maisingasing a basaem: Proverbio 27:11. Kitaem no kasano a maparagsakmo ti puso ni Jehova gapu iti panagaramidmo iti umiso!

Determinadoka Koma!

Napateg ti panagkedked. Ngem mabalin nga ipapan dagiti dadduma nga “aginmamadika laeng.”

“Makita koma iti amin nga aspeto ti biagmo​—panagkawkawes, panagsasao, pannakilangen, ken no siasino ti kasarsaritam​—a talaga a pagkedkedam ti aniaman a pananggargari ti sabsabali.”​—Joy, Nigeria.

“Masapul a nalawag iti panunotda a dika pulos tumulok iti kayatda. Dimo pulos awaten ti regalo dagiti lallaki a mangaw-awis kenka a makiseks. Mabalinda nga usaren dayta a mangiparikna kenka a kasla ket ‘tay adda masapul a bayadam kadakuada.”​—Lara, Britain.

Tulongannaka ni Jehova no makitana a determinadoka nga agkedked. Maibatay iti mismo a kapadasanna, naikuna ni salmista a David maipapan ken Jehova: “Iti daydiay nasungdo agtignaykanto a sisusungdo.”​—Salmo 18:25.

 Maisingasing a basaem: 2 Cronicas 16:9. Imutektekam no kasano a sidadaan ni Jehova a tumulong kadagidiay mayat nga agaramid iti umiso.

Panunotem Dagiti Mabalin a Mapasamak

Kuna ti Biblia: “Nasaldet daydiay nakakita iti didigra ket rugianna ti aglemmeng.” (Proverbio 22:3) Kasanom nga iyaplikar dayta? Babaen ti panangikabilangam iti mabalin a mapasamak!

“Aginggat’ mabalin, adaywam dagiti tattao a kasta ti pagtutungtonganda.”​—Naomi, Japan.

“Dika mangted kadagiti personal nga impormasion, kas iti adres wenno numero ti teleponom.”​—Diana, Britain.

Usigem ti panagsasao, kababalin, kakadua, ken lugar a kanayonmo a pappapanan. Kalpasanna, isaludsodmo  iti bagim, ‘Diak kadi madmadlaw nga adda iparparipiripko a nalabit panggapuan ti dadduma a mangawis kaniak a makiseks?’

Maisingasing a basaem: Genesis 34:1, 2. Kitaem no kasano a naisagmak ti maysa a babai nga agnagan Dina gapu ta napan iti saan a maitutop a lugar.

Laglagipem a nadagsen a basol ken Jehova a Dios ti casual sex. Kasta met koma ti panangmatmatmo. No sititibker nga aramidem ti umiso, mataginayonmo ti panagraemmo iti bagim ken ti nadalus a konsiensia iti imatang ti Dios. Kuna ti maysa a babai nga agnagan Carly, “apay koma nga ipalubosmo nga ‘usarennaka’ lattan ti sabali tapno laeng insigida a mapennekna ti derrepna? Saluadam koma ti nagrigrigatam a sinalimetmetan!”

ITI SUMAGANAD A KAPITULO

Ania a kita ti babbai ti pudpudno a pakaatrakaran dagiti lallaki? Mabalin a masdaawka iti sungbat dayta!

NAPAPATEG A TEKSTO

“Aramidenyo ti amin a kabaelanyo tapno iti kamaudiananna [ti Dios] masarakannakayo a di namulitan ken awan pakapilawanna ken sitatalna.”​—2 Pedro 3:14.

BALAKAD

Pasayaatem ti personalidadmo. (1 Pedro 3:3, 4) No nasaysayaatka a tao, nasaysayaat met ti personalidad daydiay maatrakar kenka.

AMMOM KADI . . . ?

Kayat ni Jehova a tagiragsakem ti sekso kas iti panggepna a nangparsua iti dayta​—ti gubuayan ti ragsak dagiti agassawa​—nga awan ti mariknam a panagdanag, panagamak, ken panagbabawi a masansan a resulta ti pannakiabig.

DAGITI ARAMIDEK!

Matuladko ti determinasion ni Jose nga agtalinaed a nadalus iti moral no ․․․․․

Maliklikak ti biddut a naaramid ni Dina no ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Nupay ti seksual nga imoralidad ket kasla makaay-ayo iti imperpekto a lasag, apay a dakes dayta?

● Ania ti aramidem no adda mangawis kenka a makiseks?

[Blurb iti panid 185]

Masapul a determinadoka! Idi kayatnak a guyugoyen ti maysa a lalaki, kinunak, ‘Ikkatem ta imam iti abagak!’ Kinusilapak sa pinanawak.’’​—Ellen

[Ladawan iti panid 187]

Daddadaelem laeng ti dayawmo no makiramanka iti casual sex