KAPITULO 8

Kasano a Maaddaanak iti Nasayaat a Gagayyem?

“No agpupungtotak, kayatko nga adda pangipeksaak iti marikriknak. No malidlidayak, kayatko nga adda mangliwliwa kaniak. No naragsakak, kayatko nga adda makipagragsak kaniak. Para kaniak, napateg ti maaddaan kadagiti gagayyem.”​—Brittany.

KUNADA a dagiti ubbing kasapulanda ti kaay-ayam, idinto ta dagiti agtutubo kasapulanda ti gagayyem. Ania ti nagdumaan dayta?

Ti kaay-ayam ket maysa a kanayon a kadkaduam.

Ti gayyem ket maysa a kapadpadam iti prinsipio.

 Maysa pay, kuna ti Biblia a “ti pudno a kadua agayat iti isuamin a tiempo, ken ti kabsat a mayanak no adda rigat.” (Proverbio 17:17) Mabalin a tumukoy daytoy iti naun-uneg a kita ti panaggayyem, saan laeng a basta panaggayyem dagiti ubbing nga agkakaayaman!

Ti agpayso: Bayat nga agmatmataenganka, kasapulam dagiti gagayyem a

1. Nasayaat ti kababalinna

2. An-annurotenna dagiti pagalagadan ti Dios

3. Nasayaat ti impluensiana

Saludsod: Kasanoka a maaddaan kadagiti kasta a gagayyem? Saggaysaentayo nga usigen dagita.

Nasayaat a Gayyem #1 Nasayaat ti Kababalinna

Ti rumbeng a maammuam. Saan nga amin ket agbalin a pudpudno a gayyem. Kuna pay ketdi ti Biblia nga “adda kakadua nga agannayas a mamagsisina iti maysa ken maysa.” (Proverbio 18:24) Kasla nalabes dayta. Ngem panunotem: Naaddaanka kadin iti “gayyem” a nanggundaway kenka? Wenno nangitsismis wenno nangpadpadakes kenka? Ti kasta a kapadasan dadaelenna ti panagtalekmo iti maysa a gayyem. * Kanayon a laglagipem a no maipapan iti pannakigayyem, saan a napateg ti kaaduda no di ket napatpateg ti kababalinda!

Ti mabalinmo nga aramiden. Makigayyemka laeng kadagidiay addaan iti kababalin a nasayaat a tuladen.

“Nagsayaat ti makuna dagiti tattao maipapan iti gayyemko a ni Fiona. Kasta koma met ti maibagada maipapan kaniak. Kayatko  ti maaddaan iti kasta a reputasion. Apresiarek unay ni Fiona.”​—Yvette, 17.

Padasem daytoy.

1. Basaem ti Galacia 5:22, 23.

2. Isaludsodmo iti bagim, ‘Ipakpakita kadi dagiti gagayyemko dagiti galad a mangbukel iti “bunga ti espiritu”?’

3. Ilistam iti baba ti nagan dagiti kasingedan a gagayyemmo. Isuratmo iti abayna no ania ti kababalinda.

Nagan

․․․․․

Kababalin

․․․․․

Singasing: No puro negatibo ti mapanunotmo, siguro panawenen tapno agbirokka kadagiti nasaysayaat a gagayyem!

Nasayaat a Gayyem #2​—Iyap-aplikarna Dagiti Pagalagadan ti Dios

Ti rumbeng a maammuam. No saanka a makatutor a maaddaan kadagiti gagayyem, dakkel ti posibilidadna a makasarakka kadagiti saan a nasayaat a gagayyem. Kuna ti Biblia: “Daydiay addaan kadagiti pannakilangen kadagidiay maag nakadakdakesto ti pagtungpalanna.” (Proverbio 13:20) Ti termino a “maag” saanna a tuktukoyen dagiti nababa ti gradona wenno  nakapuy ti utekna. Imbes ketdi, tuktukoyenna dagidiay saan a mangipangpangag iti nainsiriban a balakad ta kaykayatda ti agaramid iti dakes. Dagita ti kita ti kakadua a saan a nasayaat a pakigayyemam!

Ti mabalinmo nga aramiden. Piliem a naimbag dagiti pakigayyemam saan nga uray siasino lattan. (Salmo 26:4) Nasken a nalawag kenka no ania ti ‘nagdumaan ti nalinteg ken nadangkes, ken ti agserserbi iti Dios ken daydiay saan nga agserserbi kenkuana.’​—Malakias 3:18.

“Imbag laengen ta tinulongandak dagiti dadakkelko a maaddaan kadagiti gagayyem a kasadarak ken nasayaat ti espiritualidadna.”​—Christopher, 13.

Sungbatam dagiti sumaganad a saludsod:

No kaduak dagiti gagayyemko, madandanaganak kadi amangan no pilitendak nga agaramid iti di umiso?

□ Wen

□ Saan

Bumdengak kadi a mangyam-ammo kadagiti gagayyemko amangan no saan ida a magustuan dagiti dadakkelko?

□ Wen

□ Saan

Singasing: No wen ti sungbatmo kadagita a saludsod, mangbirokkan kadagiti gagayyem nga agbibiag maitunos kadagiti pagalagadan ti Dios​—dagidiay mapagwadan ti Nakristianuan a panagbiagda.

 Nasayaat a Gayyem #3​—Nasayaat ti Impluensiana

Ti rumbeng a maammuam. Kuna ti Biblia: “Dagiti dakes a pannakicuyog dadaelenda dagiti nasayaat a cababalin.” (1 Corinto 15:33, Ti Biblia) Kuna ti agtutubo nga agnagan Lauren: “Kayatdak a kadua dagiti kaeskuelaak no aramidek ti aniaman nga ibagada. Gapu ta awan ti gagayyemko, inkeddengko a tuladek latta idan tapno akseptarendak.” Naamiris ni Lauren a no tuladem lattan ti ar-aramiden ti dadduma,  kaska la peon ti chess a mabalinda lattan nga iyakar-akar. Ngem saanka a peon!

Ti mabalinmo nga aramiden. Isardengmon ti makikadua kadagidiay mangpilit kenka a mangtulad iti ar-aramidenda. No aramidem daytoy, mabalin a bassit laeng ti magayyemmo; ngem ad-adda a maraemmo ti bagim, ken maaddaanka iti gundaway a makabirok kadagiti nasaysayaat a gagayyem​—dagiti gagayyem nga addaan iti nasayaat nga impluensia.​—Roma 12:2.

“Nainkalintegan ken mannakaawat ti nasinged a gayyemko a ni Clint isu a maparparegtaak unay kenkuana.”​—Jason, 21.

Isaludsodmo iti bagim dagiti sumaganad a saludsod:

Baliwak kadi ti panagkawkawes, panagsasao, ken panagtigtignayko tapno laeng maay-ayok dagiti gagayyemko?

□ Wen

□ Saan

Mapmapanak kadin kadagiti lugar a kuestionable iti moral a saanko met idi a pappapanan tapno laeng mapagustuak dagiti gagayyemko?

□ Wen

□ Saan

 Singasing: No wen ti sungbatmo kadagita a saludsod, agpabalakadka kadagiti dadakkelmo wenno iti sabali pay a nataengan ti panagpampanunotna nga adulto. No maysaka kadagiti Saksi ni Jehova, mabalinmo met nga asitgan ti maysa a Kristiano a panglakayen ket agpatulongka kenkuana a mangpili kadagiti nasayaat ti impluensiana a gagayyem.

ADU PAY TI MABASAM MAIPAPAN ITI DAYTOY A TOPIKO ITI TOMO 2, KAPITULO 9

ITI SUMAGANAD A KAPITULO

Ti kadi ibilbilangmo a gayyem​—wenno nalabit ti pusom​—pilpilitennaka nga agaramid iti dakes? Ammuem no ania ti nasayaat nga aramidem!

[Footnote]

NAPAPATEG A TEKSTO

“Adda gayyem a dumekket a nasingsinged ngem iti maysa a kabsat.”​—Proverbio 18:24.

BALAKAD

No agbiagka a maitunos kadagiti nalinteg a pagalagadan, dakkel ti posibilidadna a gayyemendaka dagidiay kapadam iti wagas ti panagbiagna. Isuda ti kasayaatan a gagayyem!

AMMOM KADI . . . ?

Saan a mangidumduma ti Dios, ngem pilpilienna a naimbag dagidiay awatenna kas ‘sangaili iti toldana.’​—Salmo 15:1-5.

DAGITI ARAMIDEK!

Tapno maaddaanak kadagiti nasayaat a gagayyem, masapul nga ․․․․․

Ti dadduma nga in-inauna ngem siak a kayatko a magayyem ket ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Ania dagiti galad a kaay-ayom unay iti maysa a gayyem, ken apay?

● Ania dagiti galad a nasken a pasayaatem tapno agbalinka a nasaysayaat a gayyem?

[Blurb iti panid 60]

Idi imbaga dagiti dadakkelko nga adaywak dagiti barkadak, kinunak iti bagik nga isuda laeng ti kayatko a pakikaduaan. Ngem nagsayaat ti imbalakad dagiti dadakkelko ket idi pinampanunotko dayta, naamirisko nga adu gayam ti nasaysayaat pay a gagayyem.’’​—Cole

[Kahon iti panid 61]

PADASEM DAGITOY

Makisaritaka kadagiti dadakkelmo maipapan iti pannakigayyem. Saludsodem no ania a kita ti gagayyem ti nakikadkaduaanda idi agtawenda iti kas kenka. Nagbabawyanda kadi ti panangpilida kadagiti gagayyem? No wen, apay? Damagem no kasanom a maliklikan ti dadduma a problema a nakaipasanguanda.

Iyam-ammom dagiti gagayyemmo kadagiti dadakkelmo. No bumdengka a mangaramid iti dayta, isaludsodmo iti bagim, ‘Apay ngata?’ Adda kadi ar-aramiden dagiti gagayyemmo nga ammom a saan a magustuan dagiti dadakkelmo? No kasta, masapul a piliem a naimbag dagiti pakigayyemam.

Dumngegka a naimbag. Ipakitam nga interesadoka kadagiti pagimbagan ken pakaseknan dagiti gagayyemmo.​—Filipos 2:4.

Agbalinka a manangpakawan. Saanka koma a perpeksionista. “Maitibkoltayo amin iti adu a daras.”​—Santiago 3:2.

Bay-am nga adda met panawenda para iti bagida. Saan a kasapulan nga umip-ipuska lattan kadagiti gagayyemmo. Ti pudno a gayyem ket sidadaan a tumulong no kasapulam ida.​—Eclesiastes 4:9, 10.

[Ladawan iti panid 63]

No tuladem ti ar-aramiden dagiti dadduma tapno laeng akseptarendaka, kaska la peon ti chess a mabalinda lattan nga iyakar-akar