Apay nesesita a “mayanak a mabaliwan” dagiti Kristiano?

Pinanggep ti Dios nga adda limitado a bilang dagiti matalek a tattao nga itimpuyogna ken Jesu-Kristo iti nailangitan a Pagarian

Luc. 12:32: “Dikay agbuteng, bassit nga ipastoran, ta nagayatan ni Amayo nga ited kadakayo ti pagarian.”

 Apoc. 14:1-3: “Kimmitaak, ket adtoy! ti Kordero [Jesu-Kristo] agtaktakder iti rabaw ti Bantay Sion, ket naikuyog kenkuana dagiti sangagasut uppat a pulo ket uppat a ribo . . . isuda a nasubbot itoy daga.” (Kitaenyo ti panid 211, 212, iti paulo a “Langit.”)

Saan a makapan langit ti tattao a lasag ken dara ti bagida

1 Cor. 15:50: “Kunak ngarud daytoy, kakabsat, a ti lasag ken dara saanda a mabalin a tawiden ti pagarian ti Dios, ket ti panagrupsa dina tawiden ti saan nga agrupsa.”

Juan 3:6: “Ti mayanak iti lasag isu lasag, ket ti mayanak iti espiritu isu espiritu.”

Dagidiay laeng mayanak a mabaliwan, nga agbalin nga annak ti Dios, ti makiraman iti nailangitan a Pagarian

Juan 1:12, 13: “Ngem kadagiti amin nga immawat kenkuana [ken Jesu-Kristo], inikkanna ida ti kalintegan nga agbalin nga annak ti Dios, ta inalagadda ti pammati iti naganna; ket nayanakda, saan nga agtaud iti dara wenno iti pagayatan ti lasag wenno iti pagayatan ti tao, no di ket iti Dios.” (Ti “amin nga immawat kenkuana” dina tukoyen amin a tattao a namati ken Kristo. Paliiwenyo no asinoda ti tuktukoyenna, sigun iti bersikulo 11 [“iti mismo nga ilina,” dagiti Judio]. Dayta met la a pribilehio ti naiyawis kadagiti sabali a tattao, isuna laeng ta “bassit nga ipastoran.”)

Roma 8:16, 17: “Ti espiritu met laeng paneknekanna kadagiti espiritutayo a datayo annaknatayo ti Dios. Ket no annak, agtawid met; agtawid a pudno iti Dios, ngem makipagtawid ken Kristo, no la ket makipagsagabatayo tapno makipaggloriatayo met.”

1 Ped. 1:3, 4: “Bendito koma iti Dios ken Ama ni Apotayo a Jesu-Kristo, isu a mayalubog iti dakkel nga asina binaliwannatayo nga inyanak a maipaay iti maysa nga inanama a sibibiag gapu iti panagungar ni Jesu-Kristo kadagiti natay, a maipaay iti maysa a tawid a di agrupsa ken awan tulawna ket saan a magango. Naidulin sadi langit a maipaay kadakayo.”

Anianto ti aramidenda idiay langit?

Apoc. 20:6: “Isudanto ti papadi ti Dios ken ni Kristo, ket makipagaridanto kenkuana bayat ti sangaribo a tawen.”

1 Cor. 6:2: “Dikay ammo aya a dagidiay nasantuan ukomendanto ti lubong?”

 Maisalakanto kadi daydiay saan a “mayanak a mabaliwan”?

Apoc. 7:9, 10, 17: “Kalpasan dagitoy [kalpasan a nangngeg ni apostol Juan ti bilang dagidiay “mayanak a mabaliwan,” dagidiay mangbukel iti naespirituan nga Israel ken makikadua ken Kristo idiay langit; idiligyo iti Roma 2:28, 29 ken Galacia 3:26-29] kimmitaak, ket, adtoy! ti dakkel a bunggoy, nga awan ti nakabalin a bumilang, a naggapuda kadagiti isuamin a nasnasion ken tribo ken il-ili ken pagsasao, nga agtaktakderda iti sanguanan di trono ken iti sanguanan daydi Kordero, a nagkawesda kadagiti pagan-anay a puraw; ket adda palpalma kadagiti im-imada. Ket agpukpukkawda iti dakkel a timek, a kunkunada: ‘Ti pannakaisalakan nagtaud iti Diostayo, nga agtutugaw iti trono, ken iti Kordero.’ . . . ‘Ti Kordero [Jesu-Kristo], nga adda iti tengnga ti trono, ipastorannanto ida, ket iturongnanto ida kadagiti ubbog ti danum ti biag.’”

Kalpasan ti pannakailista dagiti adu a matalek a tattao a nagserbi sakbay ni Kristo, kunaen ti Hebreo 11:39, 40: “Isuamin dagitoy, nupay nalpasda nga inawat ti pammaneknek gapu iti pammatida, saanda pay nga inawat ti kaitungpalan ti naikari, idinto a ti Dios insaganana ti nasaysayaat a banag a maipaay kadatayo, tapno saanda koma a mapalaing a naan-anay nga awantayo.” (Asinoda ditoy ti tuktukoyenna a “kadatayo”? Ipakita ti Hebreo 3:1 nga isuda dagiti “mairaman iti pannakaawis a nailangitan.” Dagidi tattao a namati sakbay ken Kristo, no kasta, addaanda iti namnama iti perpekto a biag iti sabali a lugar a saan nga idiay langit.)

Sal. 37:29: “Dagiti nalinteg a mismo tawidendanto ti daga, ket agtaengdanto kenkuana nga agnanayon.”

Apoc. 21:3, 4: “Adtoy! Ti tabernakulo ti Dios adda kadagiti tattao, ket isu makipagtaengto kadakuada, ket isudanto dagiti tattaona. Ket ti Dios met laeng addanto kadakuada. Ket punasennanto amin a lulua kadagiti matada, ket awanton ni patay, ket awanto metten ti sasaibbek wenno sangsangit. Dagidi immuna a bambanag napalabasdan.”

Posible kadi a ti maysa ket addaan iti espiritu ti Dios ngem kaskasdi a saan a “mayanak a mabaliwan”?

Maipapan ken Juan a para bautisar, kinuna ti anghel ni Jehova: “Mapnonto ti nasantuan nga espiritu manipud pay iti tian ni inana.” (Luc. 1:15) Ken kinuna ni Jesus kalpasanna: “Awan ti timmakder kadagiti nayanak kadagiti babbai ti sabali  a dakdakkel ngem ni Juan a Bautista; ngem ti kababassitan unay iti pagarian ti langlangit dakdakkel ngem isu [Apay? Ngamin ni Juan saanto a mapan idiay langit gapuna dina kasapulan ti “mayanak a mabaliwan”]. Ngem nanipud kadagiti aldaw ni Juan a Bautista agingga ita [idi nasao ni Jesus daytoy] ti pagarian ti langlangit isu ti gunggun-oden ti tattao babaen ti nainget a pigsa.”—Mat. 11:11, 12.

Ti espiritu ni Jehova “immay a sipipigsa” ken David ket “nagsao” gapu kenkuana (1 Sam. 16:13; 2 Sam. 23:2), ngem saan a kunaen ti Biblia nga isu ket “mayanak a mabaliwan.” Saan a kasapulan nga isu ket “mayanak a mabaliwan,” yantangay kunaen ti Aramid 2:34: “Ni David saan nga immuli kadagiti langlangit.”

Aniat’ pakailasinan kadagidiay addaan iti espiritu ti Dios?

Kitaenyo ti panid 140, 141, iti paulo nga “Espiritu.”

‘Nayanakakon a nabaliwan’

Kunaenyo: ‘Kaipapananna dayta a namnamaenyon a makikaduakayto ken Kristo idiay langit, saan kadi? . . . Inutobyo kadin no anianto ti aramiden dagidiay mapan sadi langit?’ Sayonto inayon: (1) ‘Agbalindanto nga ar-ari ken papadi, a makipagturayda ken Kristo. (Apoc. 20:6; 5:9, 10) Kinuna ni Jesus a dagitoy ket “bassit nga ipastoran” laeng. (Luc. 12:32)’ (2) ‘No ar-arida, masapul nga addanto met dagiti iturayanda. Siasinoda dagitoy? . . . Adtoy dagiti punto a naginteresak unay idi naipasango kaniak dagitoy. (Sal. 37:11, 29; Prov. 2:21, 22)’

‘Nabaliwankayo kadin a nayanak?’

Kunaenyo: ‘Natakuatak a ti kayat a sawen ti tattao iti “mayanak a mabaliwan” ket nagduduma. Di la mabalin nga ibagam no aniat’ kayatna a sawen dayta kenka?’

Wenno: ‘Kayatmo nga ammuen no inakseptarkon ni Jesus kas Mangisalakan ket inawatkon ti nasantuan nga espiritu, saan kadi? Ipanamnamak kenka a ti sungbatko ket Wen; ta no saan awanak koma ditoy ita a mangsarsaritat’ maipapan kenkuana.’ Sayonto inayon: (1) ‘Ngem no utobek ti panangawat iti nasantuan nga espiritu, matakuatak a ti ebidensia dayta nga  espiritu ket nakalkaldaang nga awan kadagidiay agkunkuna a Kristianoda. (Gal. 5:22, 23)’ (2) ‘Tagiragsakem ngata ti agbiag ditoy daga no amin a tao ket iparangarangda dagita a nadiosan a kababalin? (Sal. 37:10, 11)’

Wenno: ‘No ti kayatmo a sawen, “Inakseptarko kadin ni Kristo kas Mangisalakan kaniak?” ti sungbat ket Wen. Amin a Saksi ni Jehova kastat’ inaramidda. Ngem kadakami, ti mayanak a mabaliwan ad-adu pay ti saklawenna ngem dayta.’ Sayonto inayon: (1) ‘Idi nasao ni Jesus maipapan iti pannakayanak a mabaliwan kinunana a nesesita dayta tapno makastrek ti maysa iti Pagarian ti Dios, kayatna a sawen, agbalin a paset ti Pagarian ti Dios, ti nailangitan a gobiernona. (Juan 3:5)’ (2) ‘Ipakita met ti Biblia nga adu dagidiay mangar-aramid iti pagayatan ti Dios nga agbiagto ditoy rabaw ti daga, bilang naragsak a paiturayan iti dayta a Pagarian. (Mat. 6:10; Sal. 37:29)’

Wenno: Dagidiay kameng ti nailangitan a klase mabalinda a kunaen: ‘Wen, nayanakakon a nabaliwan. Ngem balakadannatay ti Biblia a ditay koma agtalek unay iti saadtayo. Masapul nga usigentay a naynay ti bagbagitayo no pudno met laeng nga ar-aramidentayo ti ipapaannong ti Dios ken ni Kristo kadatayo. (1 Cor. 10:12)’ Sayonto inayon: ‘Ania ti rebbengen nga impaawit ni Jesus kadagiti pudno nga adalanna? (Mat. 28:19, 20; 1 Cor. 9:16)’