Talaga kadi nga adda organisasion ni Jehova ditoy daga?

Tapno masungbatan dayta, amirisenyo dagiti sumaganad:

Dagiti anghel, a nailangitan a parsua ti Dios, organisadoda aya?

Dan. 7:9, 10: “Binuybuyak agingga iti naisaad dagiti trono ket ti Dati a Lakay nagtugaw. Ti kawesna napudaw a kasla niebe, ket ti buok ti ulona kasla nadalus a delana. Ti tronona sumsumged a gilgilayab; ti pilpilidna apuy a dumardarang. Maysa nga umap-apuy nga ayos timpuar ken rimmuar iti sangona. Rinibribo a ribo dagiti nagserbi kenkuana, ket sangalaksa a laksa ti nagtatakder iti saklangna. Ti Korte nangukom, ket dagiti libro naluktanda.”

 Sal. 103:20, 21: “Bendituenyo ni Jehova, O dakayo nga anghelna, a mannakabalin iti bileg, a manungtungpal iti saona, a nangtimtimud iti timek ti saona. Bendituenyo ni Jehova, dakayo amin a buybuyotna, dakayo amin a ministrona, nga agaramid iti pagayatanna.” (Ti maysa a “buyot” maysa nga organisado a grupo.)

Kasanot’ panangiyawat ti Dios kadagiti bilinna kadagiti adipenna ditoy daga idi ugma?

Idi mammano pay ti agdaydayaw ken Jehova, binilinna dagiti ulo ti pamilia a kas kada Noe ken Abraham ket nagtignayda a kas pannakangiwat ni Jehova kadagiti pamiliada. (Gen. 7:1, 7; 12:1-5) Idi inaon ni Jehova dagiti Israelita manipud Egipto, binilinna ida baeten ken Moises. (Ex. 3:10) Idiay Bantay Sinai, inorganisar ti Dios dagiti umili a kas maysa a nasion, nga impaayanna ida kadagiti linteg ken al-alagaden a mangiwanwan iti panagdaydayawda ken ti relasionda iti maysa ken maysa. (Ex. 24:12) Nangipasdek iti kinapadi a mangidalan no maipapan iti panagdaydayaw ken isuda ti mangisuro kadagiti umili kadagiti alagaden ni Jehova; no dadduma nangibaon met kadagiti mammadto a mangipaay kadagiti kasapulanda a patigmaan ken mamakdaar kadagiti umili. (Deut. 33:8, 10; Jer. 7:24, 25) Gapuna, nupay inimdengan ni Jehova dagiti kararag dagiti indibidual a nagdaydayaw kenkuana, intedna ti instruksion kadakuada babaen ti urnos ti organisasion.

Idi dandanin irugi ni Jehova nga ikaykaysa kenkuana dagiti pudno nga agdaydayaw babaen ken Jesu-Kristo, isut’ imbaon ti Dios ditoy daga a kas pannakangiwatna. (Heb. 1:1, 2) Ket idi maiparukpok ti nasantuan nga espiritu idi Pentecostes ti 33 K.P., nabuangayen ti Nakristianuan a kongregasion. Kalpasan ti isusubli ni Jesus idiay langit, daytoy a kongregasion isut’ nagbalin nga urnos ni Jehova a mangisuro ken mamagdadanggay kadagiti ganuat dagiti indibidual a Kristiano. Adda idi dagiti manangaywan a mangidaulo kadagiti lokal a kongregasion, ken adda ti sentral a manarawidwid a bagi a tumulong a mamagdadanggay kadagiti aktibidad ken isut’ nangiyulog kadagiti nasken a pangngeddeng. Nabatad, a ni Jehova nangbuangay iti organisasionna ditoy daga a buklen dagiti pudno a Kristiano.—Ara. 14:23; 16:4, 5; Gal. 2:7-10.

Dagiti pisikal a pinarsua ni Jehova ipasimudaagda kadi nga isu ket Dios nga addaan organisasion?

Isa. 40:26: “Itangadyo dagiti matayo idiay ngato ket kitaenyo. Asino ti namarsua kadagitoy? Isu Daydiay a babaen iti  panangbilang isu iruarna ti buybuyotda, isu inagananna ida amin. Gapu iti kinadakkel unay ti kinamaingelna, ken agsipud ta napigsa iti pannakabalin, awan ti agkurang uray no maysa.” (Dagiti bituen nagrupogrupoda kadagiti galaxy ket agtutunosda nga agtignay, nupay nagduduma ti kababalin ti tunggal bituen. Dagiti planeta agtignayda sigun iti apaghushusto nga orasda kadagiti nakaitudinganda a pagrikosan. Dagiti elektron iti tunggal atomo a linaon ti tunggal elemento addaanda met iti pagrikosan. Ket ti balabala dagiti amin a materia adda sursurotenda a matematikal a padron a napalalo ti panagtutunosda gapuna nabaelan dagiti sientista nga ipakpakaunada nga ibaga ti kaadda dagiti dadduma nga elemento uray sakbay ti aktual a pannakadiskobreda kadakuada. Amin dagitoy ket pammaneknek ti extraordinario a panangorganisa.)

Ipakita kadi ti Biblia a dagiti pudno a Kristiano ket organisadodanto nga umili?

Mat. 24:14; 28:19, 20: “Inkayo ngarud ket pagbalinenyo nga ad-adalan dagiti umili iti amin a nasnasion, a bautisaranyo ida . . . isursuroyo [ida].” “Daytoy naimbag a damag ti pagarian maikaskasabanto iti amin a napagnaedan a daga tapno mangpaneknek iti isuamin a nasnasion, ket iti kasta umayton ti panungpalan.” (Kasanonto a matungpal daytoy no awan organisasion? Idi sinanay ni Jesus dagidi immuna nga adalanna para iti daytoy a trabaho, dina basta imbaga kadakuada a mapanda, uray adino ti kayatda a papanan, ket iramanda ti pammatida iti kaykayatda a wagas. Sinanayda ida, binilinna ida sana imbaon ida nga organisado. Kitaenyo ti Lucas 8:1; 9:1-6; 10:1-16.)

Heb. 10:24, 25: “Agpipinnanunottayo a maipaay iti pannakaparegtatayo iti ayat ken iti naimbag nga ar-aramid, a ditay baybay-an dagiti panaggigimongtayo, kas iti kadawyan dagiti dadduma, no di ket agbibinnalakadtayo, ket nangnangruna gapu ta makitayo nga umas-asideg ti aldaw.” (Ngem adinot’ pangiturongantayo kadagidiay interesado tapno matungpalda daytoy a bilin ti Biblia, no awan met ti organisasion agraman kadagiti gimong a pakitimpuyoganda?)

1 Cor. 14:33, 40: “Ti Dios saan a Dios ti riri, no di ti talna. . . . Maaramid koma dagiti isuamin a banag a natakneng ken naurnos.” (Salsalaysayen ditoy ni apostol Pablo ti naurnos nga alagaden kadagiti gimong ti kongregasion. No ipakat daytoy a naipaltiing a balakad kaipapanannat’ panagraem iti organisasion.)

1 Ped. 2:9, 17: “Ngem dakayo ti ‘napili a kaputotan, ti naarian  a kinapadi, nasantuan a nasion, ili a naisangsangayan a sanikua, tapno ipaduyakyakyo dagiti kinatan-ok’ daydiay nangayab kadakayo manipud kinasipnget inggana iti nakaskasdaaw a lawag. . . . Ayatenyo ti intero a timpuyog dagiti kakabsat.” (Ti timpuyog dagiti tattao a ti gangganuatda ket naiturong tapno maturposda ti naisangsangayan a trabaho isut’ maysa nga organisasion.)

Dagidiay matalek nga ad-adipen ti Dios basta indibidualda kadi a naiwaras kadagiti nadumaduma nga iglesia ti Kakristianuan?

2 Cor. 6:15-18: “Ania ti pakaibiangan ti matalek iti saan a mammati? . . . ‘Gapuna pumanawkayo iti nagtengngaanda, ket suminakayo,’ kuna ni Jehova, ‘ket saanyo a sagiden ti aniaman a di nadalus’; ‘ket siak awatenkayto.’ ‘Ket siakto ti amayo, ket dakayonto ti annakko a lallaki ken babbai,’ kuna ni Jehova a Mannakabalin amin.” (Talaga kadi a ti maysa ket matalek nga adipen ti Dios no itultuloyna ti makipagdaydayaw kadagidiay a ti kabibiagda ket iparparangarangda a dida mammati? Kitaenyo ti paulo a “Babilonia a Dakkel.”)

1 Cor. 1:10: “Dawatek ngarud kadakayo, kakabsat, gapu iti nagan ni Apotayo a Jesu-Kristo a sawenyo amin koma ti maymaysa a banag, ket awan koma dagiti panaglalasin kadakayo, no di ket naan-anay koma ti panagtitimpuyogyo iti maymaysa nga isip ken maymaysa a panunot.” (Ti kasta a panagkaykaysa saan a masarakan kadagiti nadumaduma nga iglesia ti Kakristianuan.)

Juan 10:16: “Adda met sabsabali a karnerok, a saanda a naitipon itoy a pagtaraknan; dagidiay masapul nga iyegko, ket denggendanto ti timekko, ket addanto maymaysa nga arban, maymaysa a pastor.” (Yantangay pagbalinen ida ni Jesus a “maymaysa nga arban,” saan kadi a nabatad a dida nawaraswaras iti nagduduma a relihion ti Kakristianuan?)

Kasano a malasin ita ti makitkita nga organisasion ni Jehova?

(1) Talaga nga itan-okna ni Jehova kas maymaysa a pudno a Dios, ipadayagna ti naganna.—Mat. 4:10; Juan 17:3.

(2) Bigbigenna a naan-anay ti napateg a paset ni Jesu-Kristo iti dayta panggep ni Jehova—kas isu ti mangalangon iti kinasoberano ni Jehova, ti Kangrunaan nga Ahente ti biag, ti ulo ti Nakristianuan a kongregasion, ti agturturay a Mesianiko nga Ari.—Apoc. 19:11-13; 12:10; Ara. 5:31; Efe. 1:22, 23.

 (3) Siinget nga annurotenna ti naipaltiing a Sao ti Dios, nga ibatayna amin a pannursurona ken estandarte ti kababalin manipud iti Biblia.—2 Tim. 3:16, 17.

(4) Naisina manipud iti lubong.—Sant. 1:27; 4:4.

(5) Taginayonenna ti nangato a kalidad ti kinadalus iti moral dagiti miembrona, ta nasantuan a mismo ni Jehova.—1 Ped. 1:15, 16; 1 Cor. 5:9-13.

(6) Ipamaysana ti kangrunaan a ganuatna a mangaramid iti trabaho nga impadto ti Biblia itoy aldawtayo, nga isut’ pannakaikasaba ti naimbag a damag ti Pagarian ti Dios iti intero a lubong kas pammaneknek.—Mat. 24:14.

(7) Nupay imperpekto ti tao, dagiti miembrona patanorenda ken pataudenda ti bungbunga ti espiritu ti Dios—ayat, rag-o, talna, nabayag a panagitured, kinamanangaasi, kinaimbag, pammati, kinaemma, panagteppel—nga aramidenda dayta a nagpaiduma tapno maigidiatda kadagiti kaaduan ditoy lubong.—Gal. 5:22, 23; Juan 13:35.

Kasanotay a maipakita ti panagraemtayo iti organisasion ni Jehova?

1 Cor. 10:31: “Aramidenyo amin a maipaay iti dayaw ti Dios.”

Heb. 13:17: “Agtulnogkayo kadagiti mangidalan kadakayo ket paiturayankayo, ta igagada dagiti kararuayo a kasla isuda ti mangidatagto.”

Sant. 1:22: “Managtungpalkay koma iti sao, ket saan laeng a managdengngeg.”

Tito 2:11, 12: “Ta nagparang ti di kaikarian a kinamanangaasi ti Dios a mangyeg ti pannakaisalakan kadagiti amin a kita ti tattao, nga isursuronatayo a laksidentayo ti kinadakes ken dagiti tarigagay a nailubongan ken agbiagtay koma a sipaparbeng ken sililinteg ken iti nadiosan a debosion.”

1 Ped. 2:17: “Ayatenyo ti intero a timpuyog dagiti kakabsat.”