Kapitulo 74

Balakad ken Marta, ken Bilin iti Kararag

BAYAT ti kurso ti ministerio ni Jesus idiay Judea, isut’ simrek idiay purok ti Betania. Ditoy ti pagtataengan da Marta, ni Maria ken ni Lazaro a kabsatda. Nalabit naam-ammo ni Jesus dagitoy tallo idi karrugi ti ministeriona ket gapu itoy isut’ nadekketen a gagayyemda. Agpapan pay ania, itan agturongen ni Jesus idiay pagtaengan da Marta ket ni Marta ti nangawat kenkuana.

Magagaran ni Marta a mangipaay ken Jesus ti kasayaatan nga adda kenkuana. Pudno unay, dakkel a dayaw a sumarungkar ti naikari a Mesias iti pagtaengan ti maysa! Gapuna naringgoran unay ni Marta a mangisagana ti nalabor a pannangan ken asikasuen dagiti adu a dadduma a detalye a nairanta a mamagbalin iti panaggian ni Jesus a makaparagsak ken komportable.

Iti kasumbangirna, agtugtugaw ni Maria a kabsat ni Marta iti sakaanan ni Jesus ken dumdumngeg kenkuana. Kalpasan ti sumagmamano a kanito, umasideg ni Marta ket kunana ken Jesus: “Apo, dika riknaen aya a ni kabsatko baybay-annak nga agserbi a maymaysa? Ibagam, ngarud, kenkuana ta tulongannak.”

Ngem madi nga agsao ni Jesus ti aniaman ken ni Maria. Imbes ketdi, binalakadanna ni Marta iti napalalo a pannakaringgorna kadagiti material a bambanag. “Marta, Marta,” siaasi a tinubngarna, “napalaloka unay ket adu ti pakaringgoram. Ngem maysa a banag ti masapul laeng.” Ibagbaga ni Jesus a saan a nasken ti mangbusbos ti adu a tiempo a mangisagana ti adu a potahe iti maysa a pannangan. Sumagmamano laeng, wenno uray maysa laeng a potahe ket umdasen.

Nasayaat dagiti panggep ni Marta; kayatna ti agbalin a naimbag a manangsangaili. Kaskasdi, babaen iti maringgoran nga atensionna kadagiti material a taraon, isut’ maikapkapis iti gundaway nga umawat ti personal a panangisuro manipud mismo nga Anak ti Dios! Gapuna nagpatingga a kinuna ni Jesus: “Ni Maria pinilina ti nasayaat a bagi, isu a dinto maikkat kenkuana.”

Iti sabali manen nga okasion, maysa nga adalan ti nagsaludsod ken ni Jesus: “Apo, isuronakami nga agkararag a kas met ti panangisuro ni Juan kadagiti adalanna.” Nalabit daytoy nga adalan saan idi a siimatang agarup makatawen ket kagudua a nasapsapa idi inted ni Jesus ti modelo a kararag iti Sermonna idiay Bantay. Gapuna inulit ni Jesus ti panangisurona ngem kalpasanna isut’ nangted ti ilustrasion a mangipaganetget ti pannakasapul a naganetget iti panagkarkararag.

“Asino ngata kadakayo ti adda maysa a gayyemna,” inrugi ni Jesus, “ket mapanto kenkuana iti tengnga ti rabii ket kunananto kenkuana, ‘Gayyem, pabulodannak man ti tallo a tinapay, ta ti maysa a gayyemko a naggapu iti biahe immay kaniak a nagdagus ket awan isangok kenkuana’? Ket isu manipud iti uneg sumungbat, ‘Dinak alimutengen. Ti ruangan naripkanen, ket dagiti annakko ken siak addakamin iti pagiddaan; diak mabalin ti bumangon ken mangted kenka.’ Kunak kadakayo, nga uray pay no saan koma a bumangon a mangted kenkuana gapu ta gayyemna, bumangonto laeng agsipud iti pannakaalimutengna ket itednanto kenkuana ti isuamin a masapulna.”

Babaen iti daytoy a panangiyasping di kayat nga isingasing ni Jesus a ni Jehova a Dios ket madi a sumungbat kadagiti ar-araraw, kas ti gayyem nga adda iti estoriana. Saan, no di ket iyil-ilustrarna a no tinto pay madi a gayyem sungbatannanto ti naganetget a panagdawdawat, anianto ketdin nga ad-adda iti naayat a nailangitan nga Amatayo! Gapuna intuloy ni Jesus: “Ket siak kunak kadakayo, Itultuloyyo ti dumawat, ket maikkankayto; itultuloyyo ti agsapul, ket makasarakkayto; itultuloyyo ti umawag, ket mailukatankayto. Ta tunggal maysa nga agdawat umawat, ket ti agsapul makasarak, ket ti umawag mailukatanto.”

Kalpasanna tinukoy ni Jesus ti maipapan kadagiti imperpekto, managbasol a natauan nga amma, a kunkunana: “Ket asino kadakayo ti idinto nga ama, no ti anakna dumawat kenkuana ti ikan, ikkanna ti maysa nga uleg imbes nga ikan? Wenno no dumawatto ti maysa nga itlog, itednanto kenkuana ti maysa a manggagama? No ngarud no dakayo, idinto a dakeskayo, ammoyo ti mangted kadagiti nasayaat a sagsagut kadagiti annakyo, dinto aya nangnangruna ni Amayo a nailangitan a mangtedto ti nasantuan nga espiritu kadagiti agdawat kenkuana!” Ay wen, anian a makatignay a pammaregta ti inted ni Jesus iti panagbalin a naganetget iti karkararag. Lucas 10:38–​11:13.

▪ Apay a ni Marta maringgoran unay iti panagsagana a para ken Jesus?

▪ Aniat’ aramiden ni Maria, ken apay nga isut’ kinomendaran ni Jesus imbes a ni Marta?

▪ Aniat’ nangtignay ken Jesus nga uliten ti panangisurona maipapan iti kararag?

▪ Kasanot’ panangiyilustrar ni Jesus iti pannakasapul ti kinaganetget iti panagkararag?