Kapitulo 5

Pannakaiyanak ni Jesus—Sadino ken Kaano?

TI EMPERADOR ti Imperio ti Roma, a ni Cesar Augustus, impaulogna ti linteg a tunggal maysa masapul nga agsubli iti ili a nakaiyanakanna tapno agparehistro. Gapuna mapan ni Jose idiay nakaiyanakanna, ti siudad ti Betlehem.

Adu a tattao ti adda idiay Betlehem tapno agparehistro, ket ti kakaisuna a lugar a masarakan da Jose ken Maria a pagianan ket iti maysa a kuadra. Ditoy, a pakaiyap-aponan dagiti asno ken dadduma nga animal, ti nakaiyanakan ni Jesus. Ni Maria ti nangbungon kenkuana kadagiti lampin ket impaiddana iti maysa a kulluong, daydiay pangpanganan dagiti animal.

Pudno unay nga inturong ti Dios ti panangipaulog ni Cesar Augustus ti lintegna a panagparehistro. Pinagbalin daytoy a posible ti pannakaiyanak ni Jesus idiay Betlehem, ti siudad a nabayagen nga impadto dagiti Kasuratan a pakaiyanakan ti naikari nga agturay.

Anian a nagpateg daytoy a rabii! Idiay tay-ak maysa a naglawag a silaw ti nagparang iti maysa a grupo dagiti papastor. Daytat’ dayag ni Jehova! Ket kuna ti anghel ni Jehova kadakuada: “Dikay agbuteng, ta adtoy! yegankayo ti naimbag a damag ti dakkel a ragsak a maipaay kadagiti amin a tattao, ta ita nga aldaw naiyanak kadakayo idiay ili ni David ti maysa a Manangisalakan, nga isu ti Kristo nga Apo. Ket daytoy ti pakailasinanyo; masarakanyonto ti ubing a nabungon iti lampin a naipaidda iti maysa a kulluong.” Iti apagdarikmat nagparang ti adu nga anghel ket nagkantada: “Dayaw iti Dios idiay Kangatuan ken talna iti rabaw ti daga kadagiti tattao nga addaan naimbag a nakem.”

Idi pimmanawen dagiti anghel, kuna dagiti papastor iti maysa ken maysa: “Intayo ngarud idiay Betlehem ket kitaentayo daytoy a naaramid, nga impakaammo kadatayo ni Jehova.” Napanda a sidadaras ket nakitada ni Jesus idiay kuna dagiti anghel nga ayanda. Idi imbaga dagiti papastor ti kinuna dagiti anghel kadakuada, nagsiddaaw amin dagiti nakangngeg iti dayta. Sinalimetmetan ni Maria amin dagitoy a sasao ket impatpategna ida.

Adu kadagiti tattao itatta ti mamati a ni Jesus naiyanak iti Disiembre 25. Ngem ti Disiembre natutudo, nalamiis a panawen idiay Betlehem. Dagiti papastor awanda idiay tay-ak iti agpatnag a kadua dagiti arbanda iti dayta a tiempo ti tawen. Kasta met, ti Romano a Cesar mabalin a saanna a kalikaguman dagiti tattao nga adda pagannayasandan nga umalsa a maibusor kenkuana nga agbiaheda iti kalam-ekan a paset ti panawen tapno agparehistro. Kaawatan a naiyanak ni Jesus iti nasapa a paset ti otonio iti tawen. Lucas 2:1-20; Mikias 5:2.

▪ Apay a nagbiahe da Jose ken Maria a mapan idiay Betlehem?

▪ Ania a nakaskasdaaw a banag ti napasamak iti rabii a pannakaiyanak ni Jesus?

▪ Kasanotay nga ammo a ni Jesus di naiyanak iti Disiembre 25?