Kapitulo 54

“Pudno a Tinapay Manipud Langit”

TI ALDAW a sakbayna ket pudno a napnuan aramid. Simimilagro a pinakan ni Jesus ti rinibo ken kalpasanna nalisianna ti panangpadas ti tattao a mamagbalin kenkuana nga ari. Iti dayta a rabii nagna iti nadawel a baybay ti Galilea; insalakanna ni Pedro, a nangrugi a lumned idi magna iti inyallo-allon ti bagyo a danum; ken pinakalmana dagiti allon tapno maisalakanna dagiti adalanna iti pannakarba ti barangay.

Itatta dagiti tattao a pinakan a simimilagro ni Jesus idiay amianan a daya ti Baybay ti Galilea ti nakakita kenkuana iti asideg ti Capernaum ket insaludsodda: “Kaano ti idadatengmo ditoy?” Iti panangbabalawna kadakuada, kinuna ni Jesus nga isut’ sapsapulenda laeng agsipud ta namnamaenda ti maaddaan manen iti libre a pannangan. Ginuyugoyna ida nga agtrabaho, saan a gapu iti taraon a mapukaw, no di ket gapu iti taraon a mataginayon a maipaay iti biag nga agnanayon. Gapuna nagsaludsod dagiti tattao: “Ania ti rebbeng nga aramidenmi tapno maaramidmi dagiti aramid ti Dios?”

Nanginagan laeng ni Jesus iti maysa a trabaho a kapapatgan. “Daytoy ti aramid ti Dios,” inlawlawagna, “a mangalagadkayo ti pammati iti Daydiay nga imbaonna.”

Nupay kasta, dagiti tattao saanda a nangalagad ti pammati ken Jesus, agpapanpay kadagiti amin a milagro a naaramidna. Di nakappapati, uray kalpasan dagiti amin a nakaskasdaaw a bambanag nga inaramidna, insaludsodda: “Ania, ngarud, ti pagilasinan nga aramidem, tapno makitami ket patiendaka? Ania ti aramidem? Dagiti ammatayo kinnanda ti mana idiay let-ang, kas adda a naisurat, ‘Tinapay a nailangitan intedna kadakuada a kanen.’”

Kas panangsungbat iti dawatda maipaay iti pagilasinan, inlawlawag ni Jesus ti Gubuayan dagiti namilagruan a probision, a kunkunana: “Saan a ni Moises ti nangted kadakayo ti tinapay a nailangitan, no di ket ni Amak itedna kadakayo ti pudno a tinapay nga aggapu sadi langit. Ta ti tinapay ti Dios isu dayta bumaba manipud langit ket mangted ti biag ti lubong.”

“Apo,” kinuna dagiti tattao, “itedmo kadakami a patinayon daytoy a tinapay.”

“Siak ti tinapay ti biag,” inlawlawag ni Jesus. “Ti umay kaniak saanto nga agbisin, ket ti mangalagad ti pammati kaniak uray kaano saanto a mawaw. Ngem kinunak kadakayo, Nakitadak ket nupay kasta dikay mamati. Isuamin nga ited kaniak ni Ama umayto kaniak, ket ti umay kaniak diakto pagtalawen; ta bimmabaak manipud langit, saan a tapno aramidek ti pagayatak, no di ti pagayatan ti nangibaon kaniak. Ket daytoy ti pagayatan ti nangibaon kaniak, nga amin nga intedna kaniak awan koma ti pukawek no di ket pagungarek iti kamaudianan nga aldaw. Ta daytoy ti pagayatan ni Amak, a tunggal maysa a makakita iti Anak ket mangalagad ti pammati kenkuana adda koma biagna nga agnanayon.”

Iti daytoy a nangrugi nga agtantanabutob dagiti Judio maipapan ken Jesus agsipud ta kinunana, “Siak ti tinapay a bimmaba manipud langit.” Makitada nga isut’ saan a nangatngato ngem ti anak ti natauan a nagannak ket gapuna iti isu met laeng a pamay-an kas kadagiti tattao iti Nasaret, nagkedkedda, a kunkunada: “Saan aya a daytoy Jesus ti anak ni Jose, a da ama ken inana am-ammotayo? Kasano ita ti panagkunana, ‘Nanipud langit immulogak’?”

“Dikay agtantanabutob,” insungbat ni Jesus. “Awan ti tao a makabalin nga umay kaniak no saan a guyugoyen ni Ama a nangibaon kaniak; ket isu pagungarekto iti kamaudianan nga aldaw. Adda nga insurat dagiti Mammadto, ‘Ket maisurodanto amin ken Jehova.’ Tunggal maysa a dimngeg iti Ama ket nakasursuro umay kaniak. Awan ti tao a nakakita ken Ama, no di ket ti naggapu iti Dios; isu ti nakakita ken Ama. Pudno, pudno, kunak kadakayo, ti Mamati kaniak addaan biag nga agnanayon.”

Iti panangitultuloyna, inulit ni Jesus: “Siak ti tinapay ti biag. Dagidi ammayo kinnanda ti mana idiay let-ang ket natayda. Daytoy ti tinapay a bumaba manipud langit, tapno siasinoman a makapangan koma kenkuana saan koma a matay. Siak ti tinapay a sibibiag a bimmaba manipud langit; no adda mangan itoy a tinapay agbiagto nga agnanayon.” Wen, babaen iti panangalagad ti pammati ken Jesus, ti imbaon ti Dios, maaddaan dagiti tattao iti biag nga agnanayon. Awan ti mana, wenno aniaman a sabali a tinapay, ti makaipaay iti dayta!

Ti salaysay maipapan iti tinapay manipud langit nalawag a nangrugi di nagbayag kalpasan ti pannakasarak dagiti tattao ken Jesus iti asideg ti Capernaum. Ngem nagtultuloy dayta, a dimteng iti kangitingitan a pasetna kabayatan a mangisursuro ni Jesus iti sinagoga idiay Capernaum. Juan 6:25-51, 59; Salmo 78:24; Isaias 54:13; Mateo 13:55-57.

▪ Ania dagiti pakpakauna a pasamak iti panangisalaysay ni Jesus maipapan iti tinapay manipud langit?

▪ No matmatan dagiti kalkalpas laeng nga inaramid ni Jesus, apay a ti panangdawat iti pagilasinan ket di unay maitutop?

▪ Apay a dagiti Judio nagtanabutobda iti panangako ni Jesus nga isut’ pudno a tinapay manipud langit?

▪ Sadino ti nakapasamakan ti diskusion maipapan iti tinapay manipud langit?