Kapitulo 15

Umuna a Milagro ni Jesus

MAYSA wenno dua pay laeng nga aldaw ti naglabas idi a da Andres, Pedro, Juan, Felipe, Natanael, ken nalabit ni Santiago nagbalinda nga immuna nga ad-adalan ni Jesus. Addada itan iti dalanda nga agturong idiay distrito ti Galilea, a sadiay ti naggapuanda amin. Agturongda idiay Cana, ti ili a pagtaengan ni Natanael, a masarakan iti katurodan nga asideg iti Nasaret, a dimmakkelan ni Jesus. Naimbitaranda iti maysa a paboda idiay Cana.

Dimmar-ay met ti ina ni Jesus iti paboda. Kas gayyem ti pamilia dagidiay agkasar, nakiraman ni Maria iti panagiserbi kadagiti kasapulan dagiti bisita. Gapuna dagus a napaliiwna ti adda a panagkurang, nga inreportna ken Jesus: “Awan ti arakda.”

Idi ngarud ni Maria, iti kaiyariganna, insingasingna nga ipamusposan ni Jesus ti panagkurang ti arak, nagkitakit ni Jesus idi damo. “Ania ti pakaibiangak kenka, babai?” insaludsodna. Kas dinutokan ti Dios nga Ari, isut’ di rebbeng a diktaran ti pamilia ken gagayyemna iti aramidenna. Gapuna nainsiriban nga impabiang ni Maria dayta a banag iti im-ima ti anakna, a basta kunana kadagiti tumultulong: “Aniaman nga ibagana kadakayo, aramidenyo.”

Adda innem a burnay, a tunggal maysa makalaon ti nasurok nga 40 litros. Binilin ni Jesus dagiti tumultulong: “Punnuenyo dagiti burnay iti danum.” Ket pinunnoda ida agingga iti ngarab. Idin kuna ni Jesus: “Takuenyo ket ipanyo iti panguluen ti rambak.”

Nasdaawan ti panguluen iti nagsayaat a raman ti arak, a dina nabigbig a daytat’ napartuat a simimilagro. Idi inayabanna ti nobio, kunana: “Tunggal tao unaenna ti nasayaat nga arak, ket inton makainumda ti adun sa isango ti dakdakes. Sika indulinmo ti nasayaat nga arak agingga ita.”

Daytoy ti umuna a milagro ni Jesus, ket iti pannakakitada iti dayta, napabileg ti pammati dagiti kabbaro nga adalan ni Jesus. Kalpasanna, kaduana ti inana ken dagiti kakabsatna iti ina, nagdaliasatda nga agturong iti siudad ti Capernaum iti asideg ti Baybay ti Galilea. Juan 2:1-12.

▪ Ania a paset iti ministerio ni Jesus a napasamak ti paboda idiay Cana?

▪ Apay a nagkitakit ni Jesus iti insingasing ti inana?

▪ Ania a milagro ti inaramid ni Jesus, ket aniat’ epektona kadagiti dadduma?