LEKSION 13
No Kasano a Padpadaksen Dagiti Ulbod a Relihion ti Dios
No ti Dios ket ayat, apay nga adu ti dakes nga ar-aramiden dagiti relihion a mangibagbaga nga adda kadakuada ti pabor ti Dios? Ngamin, ulbod dagitoy a relihion. Padpadaksenda ti Dios. Kasanoda a padpadaksen? Ania ti marikrikna ti Dios iti dayta? Ken anianto ti aramidenna iti dayta?
1. Kasano a ti isursuro dagiti ulbod a relihion padpadaksenna ti Dios?
“Ti kinapudno maipapan iti Dios ket sinukatan [dagiti ulbod a relihion] iti kinaulbod.” (Roma 1:25) Kas pagarigan, saan nga isursuro ti kaaduan a relihion kadagiti miembroda ti nagan ti Dios. Nupay kasta, ibagbaga ti Biblia a masapul nga usarentayo ti nagan ti Dios. (Roma 10:13, 14) No adda dakes a mapasamak, ibagbaga ti dadduma a lider ti relihion a pagayatan ti Dios dayta. Ngem kinaulbod dayta. Saan a ti Dios ti makingapuanan iti kinadakes. (Basaen ti Santiago 1:13.) Makapaliday ta gapu kadagita a kinaulbod, marigatan dagiti tattao a mangayat iti Dios.
2. Kasano a ti ar-aramiden dagiti ulbod a relihion padpadaksenna ti Dios?
Saan a kas ken Jehova ti panangtrato dagiti ulbod a relihion kadagiti tattao. Ibagbaga ti Biblia a ‘nakadanonen idiay langit ti kaadu ti basol’ dagiti ulbod a relihion. (Apocalipsis 18:5) Ginasut a tawenen a makibibiang ti relihion iti politika, supsuportaranda dagiti gubat, ken isuda ti makagapu wenno mangkonkonsintir iti ipapatay ti adu a tattao. Kayat ti dadduma a lider ti relihion ti naluho a biag, isu a dawdawatanda dagiti miembroda iti kuarta. Ipakita dayta a saanda nga am-ammo ti Dios isu nga awan ti karbenganda a mangibaga nga adda kadakuada ti Dios.—Basaen ti 1 Juan 4:8.
3. Ania ti marikrikna ti Dios maipapan kadagiti ulbod a relihion?
No kaguram dagiti ar-aramiden dagiti ulbod a relihion, ania met ngata ti marikrikna ni Jehova kadagita? Ay-ayatenna dagiti tattao. Ngem kagurana dagiti lider ti relihion nga agibagbaga iti kinaulbod maipapan kenkuana ken mangparparigat kadagiti pasurotda. Ikarkarina a madadaelto dagiti ulbod a relihion ken “pulos a dinto masarakanen.” (Apocalipsis 18:21) Asidegen a pagpatinggaen ti Dios ti amin nga ulbod a relihion.—Apocalipsis 18:8.
AMMUEM TI AD-ADU PAY
Adalem ti ad-adu pay maipapan iti marikrikna ti Dios kadagiti ulbod a relihion. Ammuem ti ad-adu pay maipapan iti inaramid dagiti ulbod a relihion ken no apay a saan koma a dagita ti mangpasardeng kenka a mangam-ammo ken Jehova.
4. Saan nga akseptaren ti Dios ti amin a relihion
Adu ti mamati a dagiti relihion ket kas iti agduduma a dalan ngem agturong amin iti Dios. Agpayso kadi dayta? Basaen ti Mateo 7:13, 14, sa pagsaritaan daytoy a saludsod:
-
Kasano nga iladawan ti Biblia ti dalan nga agturong iti biag?
I-play ti VIDEO, sa pagsaritaan ti sumaruno a saludsod.
-
Ibagbaga kadi ti Biblia a kayat ti Dios ti amin a relihion?
5. Saan nga ipakpakita dagiti ulbod a relihion ti ayat ti Dios
Adu a pammadakes iti Dios ti inar-aramid dagiti ulbod a relihion. Maysa a kadaksan nga inar-aramidda ket ti pannakiramanda iti gubat. Tapno makitam ti maysa a pagarigan, i-play ti VIDEO. Kalpasanna, pagsaritaan dagiti sumaruno a saludsod.
-
Ania ti inaramid ti adu a relihion idi Gubat Sangalubongan II?
-
Ania ti makunam iti inaramidda?
Basaen ti Juan 13:34, 35 ken 17:16. Kalpasanna, pagsaritaan dagitoy a saludsod:
-
Panagkunam, ania ti marikna ni Jehova no makiraman dagiti relihion iti gubat?
-
Adu a kinadakes ti inaramid dagiti ulbod a relihion. Ania dagiti nakitkitamon nga ar-aramid dagiti relihion a mangipakita a saanda a tultuladen ti ayat ti Dios?
Saan nga ipakpakita dagiti ulbod a relihion ti ayat ti Dios
6. Kayat ti Dios a tulongan dagiti tattao a makapanaw iti ulbod a relihion
Basaen ti Apocalipsis 18:4, a sa pagsaritaan daytoy a saludsod:
-
Ania ti mariknam ta naammuam a kayat ti Dios a tulongan dagiti tattao nga inyaw-awan dagiti ulbod a relihion?
7. Itultuloymo nga adalen ti maipapan iti pudno a Dios
Dagiti kadi dakes nga ibagbaga ken ar-aramiden dagiti ulbod a relihion apektaranna ti panangmatmatmo iti Dios? Imadyinem ti maysa nga anak a saanna a kayat ti agtulnog iti amana. Pimmanaw iti balayda ken nagaramid iti nagdakes a bambanag. Saan a kayat ti ama ti ar-aramiden ti anakna. Apay a saan a husto nga ipabasol iti ama ti biag a pinili ti rebelioso nga anakna?
-
Umiso kadi a pabasolentayo ni Jehova ken isardengtayon ti agsursuro maipapan kenkuana gapu iti ar-aramiden dagiti ulbod a relihion?
KUNA TI DADDUMA: “Saanak nga interesado iti Dios ta ti relihion ti makagapu iti adu a problema.”
-
Kasta kadi met ti marikriknam?
-
Apay a saan koma nga apektaran ti ar-aramiden dagiti ulbod a relihion ti panangmatmattayo ken Jehova?
SUMARIO
Dagiti ulbod a relihion padpadaksenda ti Dios babaen ti ulbod a pannursuro ken nagdakes nga ar-aramidda. Dadaelento ti Dios dagiti ulbod a relihion.
Rebiu
-
Ania ti makunam iti isursuro ken ar-aramiden dagiti ulbod a relihion?
-
Ania ti marikrikna ni Jehova kadagiti ulbod a relihion?
-
Anianto ti aramiden ti Dios kadagiti ulbod a relihion?
AGDISKOBREKA PAY
Ammuem ti dua nga ar-aramiden dagiti ulbod a relihion a kagura ti Dios.
“Agpapada Kadi Amin a Relihion? Agturongda Kadi Amin iti Dios?” (Artikulo iti website)
Apay a kayat ni Jehova a dayawentayo isuna a kadua ti dadduma?
“Nasken Kadi a Miembroka ti Maysa nga Organisado a Relihion?” (Artikulo iti website)
Nariribukan ti maysa a padi iti nakitana iti relihionna. Ngem saan a dayta ti nangpasardeng kenkuana a mangammo iti kinapudno maipapan iti Dios.
“No Apay nga Immikkat ti Maysa a Padi iti Relihionna” (Agriingkayo!, Pebrero 2015)
Ginasuten a tawen a padpadaksen dagiti relihion ti Dios. Ibagbagada a saan nga interesado kadatayo ken saan a naasi. Ammuem ti kinapudno maipapan iti tallo kadagita a kinaulbod.
“Apay nga Adu ti Marigatan a Mangayat iti Dios?” (Ti Pagwanawanan, Nobiembre 1, 2013)
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
