LEKSION 16
Ania ti Inaramid ni Jesus Idi Adda Ditoy Daga?
Adu a tattao ti mangpampanunot ken Jesus kas maysa a kayyanak nga ubing, maysa a nalaing a propeta, wenno maysa a matmatay a tao. Ngem ad-adu pay ngata ti maammuantayo maipapan kenkuana no adalentayo ti biagna idi adda ditoy daga? Iti daytoy a leksion, kitaenta ti dadduma kadagiti kapatgan a banag nga inaramid ni Jesus ken no kasano a makatulong dagita kenka.
1. Ania idi ti kangrunaan nga inaramid ni Jesus?
Ti kangrunaan nga inaramid ni Jesus ket ti ‘panangipakaammo iti naimbag a damag ti Pagarian ti Dios.’ (Basaen ti Lucas 4:43.) Inkasabana ti naimbag a damag a mangipasdekto ti Dios iti pagarian, wenno gobierno, a mangsolbar iti amin a problema dagiti tattao. a Iti tallo ket kagudua a tawen, nakagaggaget ni Jesus a nangibaga kadagiti tattao iti daytoy a makaparagsak a mensahe.—Mateo 9:35.
2. Apay a nangaramid ni Jesus kadagiti milagro?
Mabasa iti Biblia ti adu a “nakaskasdaaw a bambanag ken pagilasinan” nga inaramid ti Dios babaen ken Jesus. (Aramid 2:22) Inikkan ti Dios ni Jesus iti pannakabalin a mangkontrol iti paniempo, mangpakan iti rinibu, mangpaimbag kadagiti adda sakitna, ken mangpagungar kadagiti natay. (Mateo 8:23-27; 14:15-21; Marcos 6:56; Lucas 7:11-17) Nalawag nga ipakita dagiti milagro nga inaramid ni Jesus nga imbaon isuna ti Dios. Ipakita met dagita a milagro a kabaelan ni Jehova a solusionan ti amin a problematayo.
3. Ania ti masursurotayo iti biag ni Jesus idi adda ditoy daga?
Nagtulnog ni Jesus ken Jehova iti amin a situasion. (Basaen ti Juan 8:29.) Uray nabusbusor, kanayon nga inaramid ni Jesus ti pagayatan ti Amana agingga iti ipapatayna. Impakitana a posible para kadagiti tattao ti agserbi iti Dios uray narigat ti situasion. ‘Nangibati [ni Jesus] iti ulidan tapno masurottayo a naimbag dagiti addangna.’—1 Pedro 2:21.
AMMUEM TI AD-ADU PAY
Kitaem no kasano nga impakaammo ni Jesus ti naimbag a damag ken no kasano a nagaramid kadagiti milagro.
4. Impakaammo ni Jesus ti naimbag a damag
Nagnagna ni Jesus iti ginasut a kilometro iti natapok a dalan tapno ipakaammona ti naimbag a damag iti adu a tattao. Basaen ti Lucas 8:1, sa pagsaritaan dagitoy a saludsod:
-
Ti laeng kadi kinasabaan ni Jesus ket dagiti naguummong a tattao tapno dumngeg kenkuana?
-
Ania dagiti inaramid ni Jesus tapno mabirokanna dagiti tattao?
Impakpakauna ti Dios nga ipakaammo ti Mesias ti naimbag a damag. Basaen ti Isaias 61:1, 2, sa pagsaritaan dagitoy a saludsod:
-
Kasano a tinungpal ni Jesus daytoy a padto?
-
Panagkunam, kasapulan ngata dagiti tattao ita a mangngeg daytoy a naimbag a damag?
5. Nangisuro ni Jesus kadagiti napateg a leksion
Saan laeng nga inkasaba ni Jesus ti naimbag a damag maipapan iti Pagarian ti Dios. Nangisuro met kadagiti makatulong a leksion. Kitaem ti dadduma kadagita iti pamiliar iti adu a Sermon iti Bantay. Basaen ti Mateo 6:14, 34 ken 7:12, sa pagsaritaan dagitoy a saludsod:
-
Ania dagiti makatulong a pammagbaga ni Jesus kadagitoy a bersikulo?
-
Panagkunam, makatulong pay ngata dagitoy a pammagbaga?
6. Nagaramid ni Jesus kadagiti milagro
Inikkan ni Jehova ni Jesus iti pannakabalin nga agaramid iti adu a milagro. Tapno makita ti maysa kadagita, basaen ti Marcos 5:25-34 wenno i-play ti VIDEO. Kalpasanna, pagsaritaan dagiti sumaruno a saludsod.
-
Iti video, ania ti patien ti agsaksakit a babai?
-
Ania ti nagustuam iti dayta a milagro?
Basaen ti Juan 5:36, sa pagsaritaan daytoy a saludsod:
-
Ania ti ‘paneknekan’ dagiti milagro nga inaramid ni Jesus, wenno ania ti ipakita dagita maipapan kenkuana?
Ammom kadi?
Kaaduan nga ammotayo maipapan ken Jesus ket mabasa iti uppat a libro ti Biblia a maawagan iti Ebanghelio—Mateo, Marcos, Lucas, ken Juan. Nagduduma a detalye ti insurat dagiti mannurat ti Ebanghelio maipapan ken Jesus. No mapagtitipon dagitoy a detalye, makabukeltayo iti nakaskasdaaw a ladawan ti biagna.
-
MATEO
Daytoy ti umuna a naisurat nga Ebanghelio. Mabasatayo ditoy ti adu a pannursuro ni Jesus nangnangruna dagiti insurona maipapan iti Pagarian ti Dios.
-
MARCOS
Daytoy ti kaababaan nga Ebanghelio. Adu a makapagagar a pasamak ti mabasa ditoy.
-
LUCAS
Makita ditoy no kasano kapateg ken Jesus ti panagkararag ken ti naasi a panangtratona kadagiti babbai.
-
JUAN
Adu ti mabasa ditoy maipapan iti pannakisarita ni Jesus kadagiti gagayyemna ken iti sabsabali. Makatulong dagita tapno maammuantayo no ania a klase a tao idi ni Jesus.
KUNA TI DADDUMA: “Ni Jesus ti Mannakabalin-amin a Dios.”
-
Ania ti makunam?
SUMARIO
Inkasaba ni Jesus ti Pagarian ti Dios, nagaramid kadagiti milagro, ken nagtulnog ken Jehova iti amin a situasion.
Rebiu
-
Ania ti kangrunaan nga inaramid ni Jesus idi adda ditoy daga?
-
Ania ti ipakita dagiti milagro nga inaramid ni Jesus?
-
Ania dagiti makatulong a leksion nga insuro ni Jesus?
AGDISKOBREKA PAY
Ania idi a topiko ti kanayon nga ibagbaga ni Jesus kadagiti tattao?
“Pagarian ti Dios—No Apay a Nagpateg ken Jesus” (Ti Pagwanawanan, Oktubre 1, 2014)
Kitaem no apay a makasiguradotayo a talaga a napasamak dagiti milagro nga inaramid ni Jesus.
“Dagiti Milagro ni Jesus—Ania ti Maadalmo?” (Ti Pagwanawanan, Hulio 15, 2004)
Basaem no kasano a nagbalbaliw ti biag ti maysa a lalaki idi naadalna ti panangipateg ni Jesus kadagiti tattao.
“Bagik Laeng ti Pampanunotek” (Ti Pagwanawanan, Oktubre 1, 2014)
Kitaem ti agsasaruno nga inaramid ni Jesus bayat ti ministeriona ditoy daga.
a Ilawlawag ti Leksion 31-33 ti ad-adu pay a detalye maipapan iti Pagarian ti Dios.
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
