AMMOM kadi ti kayat a sawen ti panangidumduma?⁠— Ti panangidumduma kaipapananna ti pananggura iti maysa a tao gapu laeng ta sabali ti itsurana wenno sabali ti pagsasaona. Gapuna, no mangidumdumaka kayatna a sawen nga adda di nasayaat a riknam wenno kapanunotam maipapan iti sabali a tao uray no saanmo pay a talaga nga am-ammo.

Panagkunam umiso ngata a guraem ti sabali a tao uray no saanmo pay a talaga nga ammo ti kinasiasinona wenno gapu laeng ta sabali?⁠— Saan. Saan a nasayaat ti mangidumduma, ken saan met a naasi dayta. Liklikantayo koma ti agbalin a di naasi iti sabali a tao gapu laeng ta saantayo a kapada.

Panunotem daytoy. Adda kadi am-ammom a sabali ti kolor ti kudilna wenno sabali ti pagsasaona?⁠— Mabalin nga adda pay am-ammom a tattao a sabali ti itsurada gapu ta nadangran wenno adda sakitda. Adda kadi asi ken ayatmo kadagidiay saanmo a kapada?⁠—

No dumngegtayo iti Naindaklan a Mannursuro, ni Jesu-Kristo, agbalintayo a naasi iti isuamin. Saantayo koma a mangidumduma uray ania a pagilian ti naggapuan ti maysa a tao wenno uray ania ti kolor ti kudilna. Naasitayo koma kenkuana. Nupay saan a kastoy ti pammati ti amin a tattao, maysa dayta a leksion nga insuro ni Jesus. Pagsaritaanta dayta.

Adda maysa a mangidumduma a Judio nga immasideg ken Jesus ket nagsaludsod, ‘Ania ti masapul nga aramidek tapno agbiagak nga agnanayon?’ Ammo ni Jesus a nalabit kayat dayta a tao nga ibaga ni Jesus a dagidiay laeng koma kapadatayo wenno kailiantayo ti kaasiantayo. Isu nga imbes a sungbatanna a mismo ti saludsod, dinamag ni Jesus iti lalaki:  ‘Ania ti kuna ti Linteg ti Dios a masapul nga aramidentayo?’

Simmungbat ti lalaki: ‘Masapul nga ayatem ni Jehova a Diosmo iti amin a pusom, ken masapul nga ayatem ti kaarrubam a kas iti bagim.’ Kinuna ni Jesus: ‘Umiso ti sungbatmo. Itultuloymo nga aramiden daytoy ket magun-odamto ti biag nga agnanayon.’

Ngem di kayat ti lalaki a kaasian, wenno ayaten, dagiti tattao a saanna a kapada. Isu a pinadasna ti agrason. Dinamagna ken Jesus: ‘Asino a talaga ti kaarrubak?’ Mabalin a kayatna nga ibaga ni Jesus ti kastoy: “Ti kaarrubam ket dagiti gagayyemmo” wenno, “Isuda dagiti tattao a kapadam.” Tapno masungbatanna ti saludsod, inestoria ni Jesus ti maipapan iti maysa a Judio ken maysa a Samaritano. Kastoy ti estoriana.

Adda maysa a lalaki a sumalsalog manipud iti siudad ti Jerusalem a mapan idiay Jerico. Judio daytoy a lalaki. Bayat a magmagna, ginammatan dagiti tulisan. Kinabilda sada innala dagiti kuarta ken kawesna. Kinabkabil dagiti tulisan sada pinanawan iti igid ti dalan a dandanin matay.

Di nagbayag, adda maysa a padi a dimmalan sadiay. Nakitana ti lalaki a napalalo ti pannakadangranna. Ania koma ti inaramidmo no sika  ti nakakita?⁠— Nagtultuloy latta a nagna ti padi iti bangir ti dalan. Saan man la a simmardeng. Dina pulos tinulongan ti lalaki.

Kalpasanna, dimmalan sadiay ti maysa pay a relihioso unay a tao. Maysa a Levita nga agserserbi iti templo idiay Jerusalem. Simmardeng aya tapno tumulong?⁠— Saan. No kasano ti inaramid ti padi, kasdiay met laeng ti inaramidna.

Kamaudiananna, dimteng ti maysa a Samaritano. Makitam kadi a sumungsungad iti agsikkosikko a dalan?⁠— Nakitana ti naidasay a Judio a napalalo ti pannakadangranna. Laglagipem nga aggiginnura idi ti kaaduan kadagiti Samaritano ken Judio. (Juan 4:9) Gapuna, panawan ngata lattan ti Samaritano daydiay a lalaki a saanna man la a tulongan? Kunaenna ngata iti bagina: ‘Apay koma a tulongak  daytoy a Judio? Saannak a tulongan no siak ti madangran’?

Minatmatan ti Samaritano ti lalaki a naidasay iti igid ti dalan, ket naasian kenkuana. Dina maitured a panawan sadiay ken bay-anna lattan a matay. Gapuna, dimsaag iti asnona, inasitganna ti lalaki, sana inagasan dagiti sugatna. Sinapsapuanna dagiti sugat iti lana ken arak. Makatulong daytoy tapno umimbag dagiti sugat. Kalpasanna binedbedanna iti lupot dagiti sugat.

Siaannad nga insakay ti Samaritano ti nadangran a lalaki iti asnona. Kalpasanna siiinayad a simmalogda iti dalan agingga a nakagtengda iti maysa a pagdagusan. Sadiay a nangabang ti Samaritano iti pagyanan ti lalaki, sana inaywanan a naimbag.

Ita, insaludsod ni Jesus iti lalaki a kasarsaritana: ‘Panagkunam siasino kadagitoy a tallo a lallaki ti nasayaat a kaarruba?’ Ania ti makunam? Ti kadi padi, ti Levita, wenno ti Samaritano?⁠—

Simmungbat ti lalaki: ‘Ti nasayaat a kaarruba ket daydiay simmardeng ken nangaywan iti nadangran a lalaki.’ Kinuna ni Jesus: ‘Umiso ti sungbatmo. Mapanka ket kasta met laeng ti aramidem.’​​—⁠Lucas 10:25-​37.

Saan aya a nagsayaat dayta nga estoria? Pagminarenna  no siasino dagiti kaarrubatayo. Saan laeng a dagidiay nasinged a gagayyemtayo. Ken saan laeng a dagidiay tattao a kapadatayo ti kolor ti kudilda wenno kapadatayo iti pagsasao. Sinursuruannatayo ni Jesus nga agbalin a naasi kadagiti tattao uray sadino ti naggapuanda, aniaman ti itsurada, wenno aniaman ti pagsasaoda.

Kasta ni Jehova a Dios. Saan a mangidumduma. ‘Ni Amayo nga adda idiay langit pagleggakenna ti initna kadagiti nadangkes a tattao ken naimbag a tattao,’ kinuna ni Jesus. ‘Ket pagtuduenna kadagiti naimbag a tattao ken kadagidiay di naimbag.’ No kasta ngarud, naasitayo koma iti isuamin, a kas iti Dios.​—⁠Mateo 5:​44-​48.

No kasta, ania ti aramidem no adda makitam a nadangran?⁠— Ania ngay no taga sabali a pagilian wenno saankayo nga agpada iti kolor ti kudil? Kaskasdi a kaarrubam dayta, ket rumbeng a tulongam. No dika makatulong gapu ta bassitka pay, mabalinmo ti agpatulong iti natataengan. Wenno agpatulongka iti polis wenno iti maestra wenno maestro. Panangipakita dayta iti asi, a kas iti Samaritano.

Kayat ti Naindaklan a Mannursuro nga agbalintayo a naasi. Kayatna a tulongantayo dagiti sabsabali, uray siasinoda. Dayta ti gapuna nga inestoriana ti maipapan iti naasi a Samaritano.