NO MATAYTAYO, kayatnatayo kadi a pagungaren ti Dios, kayatna a sawen, pagbiagen manen?— Ammo idi ti naimbag a tao a ni Job a kayat ti Dios nga aramiden ti kasta. Isu nga idi impagarup ni Job nga asidegen a matay, kinunana iti Dios: “Umawagkanto, ket siak sungbatankanto.” Kinuna ni Job nga isu ket kayat wenno tarigagayan unay a pagungaren ni Jehova a Dios.​​—Job 14:​14, 15.

Ni Jesus ket kas ken ni Jehova a Dios nga Amana. Kayatnatayo a tulongan ni Jesus. Idi kinuna kenkuana ti maysa nga agkukutel, “no kayatmo laeng koma, kabaelannak a dalusan,” insungbat ni Jesus: “Kayatko.” Ket pinaimbagna ti agkukutel.​​—Marcos 1:40-42.

Nasursuro ni Jesus iti Amana ti panagayat kadagiti ubbing. Idi un-unana, adda dua a gundaway nga inusar ni Jehova dagiti adipenna a mangpagungar kadagiti ubbing. Impakpakaasi idi ni Elias ken Jehova a pagungarenna ti anak a lalaki ti maysa a babai a nakaim-imbag  ken Elias. Ket kasta ti inaramid ni Jehova. Inusar met ni Jehova ni adipenna nga Eliseo a mangpagungar iti maysa nga ubing a lalaki.​​—1 Ar-ari 17:17-​24; 2 Ar-ari 4:​32-​37.

Saan kadi a makaparagsak a maammuan nga ay-ayatennatayo unay ni Jehova?— Saan laeng a no sibibiagtayo a pampanunotennatayo. Laglagipennatayo met no kas pagarigan ta mataytayo. Kinuna ni Jesus nga iti imatang ni Amana, sibibiag dagiti ay-ayatenna a pimmusayen! (Lucas 20:38) Kuna ti Biblia nga ‘uray ti ipapatay wenno biag wenno ti bambanag nga adda wenno ti bambanag nga umayto saandatayo a kabaelan nga isina iti ayat ti Dios.’​​—Roma 8:​38, 39.

Idi adda ni Jesus ditoy daga, impakitana a maseknan ni Jehova kadagiti ubbing. No malagipmo, inwayaan ni Jesus ti makisarita kadagiti ubbing maipapan iti Dios. Ngem ammom kadi nga inikkan ti Dios ni Jesus iti pannakabalin a mangpagungar kadagiti ubbing?— Pagsaritaanta daydi panangpagungar ni Jesus iti 12 ti tawenna a balasang ti maysa a lalaki nga agnagan Jairo.

Agnanaed idi da Jairo ken ti asawana agraman ti kakaisuna nga anakda iti asideg ti Baybay ti Galilea. Maysa nga aldaw, masakit unay ti balasangna, ket ammo ni Jairo a dandanin matay ti anakna. Napanunotna ni Jesus, daydi naisangsangayan a lalaki a nadamag ni Jairo a makabael a mangpaimbag kadagiti tattao. Napan ngarud binirok ni Jairo ni Jesus. Nasarakanna ni Jesus iti igid ti Baybay ti Galilea a mangisursuro iti adu a tattao.

Nakilinnetlet ni Jairo kadagiti tattao ket nagparintumeng iti sanguanan ni Jesus. Kinunana ken Jesus: ‘Masakit unay ti balasangko. Mabalin kadi a kumuyogka ket tulongam? Dawatek a kumuyogka koma.’ Kimmuyog a dagus ni Jesus ken Jairo. Simmurot met dagiti tattao nga immaribungbong iti Naindaklan a Mannursuro. Ngem saanda pay unay a nakaadayo idi dimteng ti sumagmamano a lallaki a naggapu iti balay ni Jairo ket kinunada kenkuana: “Natayen ti anakmo a babai! Apay pay laeng a ringgorem ti mannursuro?”

 Nangngeg daytoy ni Jesus. Ammona a maladingitan unay ni Jairo iti ipapatay ti kakaisuna nga anakna. Kinunana ngarud ken Jairo: ‘Dika agbuteng. Basta mamatika iti Dios, ket umimbagto ti anakmo.’ Idi dimtengda iti balay ni Jairo, agsangsangit dagiti gagayyem ti pamilia ni Jairo. Maladingitanda agsipud ta natayen ti ubing a gayyemda. Ngem kinuna ni Jesus kadakuada: ‘Dikay agsangsangit. Saan a natay ti ubing no di ket matmaturog.’

Idi imbaga daytoy ni Jesus, nagkakatawa dagiti tattao, ta ammoda a natayen ti ubing. Ngarud, iti panagkunam apay a kinuna ni Jesus a matmaturog laeng?— Ania a leksion ti kayatna nga isuro kadagiti tattao?— Kayatna a maammuanda a ti ipapatay ket mayarig iti nargaan a turog. Kayatna nga isuro kadakuada a babaen ti pannakabalin ti Dios, nalakana laeng a mapagungar ti tao a natay no kasano a mabalintayo a riingen ti tao a matmaturog.

Pinaruar ni Jesus dagiti amin nga adda iti balay malaksid kada apostol Pedro, Santiago, ken Juan agraman dagiti nagannak ti ubing. Kalpasanna, simrek iti siled nga ayan ti balasitang. Iniggamanna sana kinuna: ‘Balasitang, bumangonka!’ Dagus a bimmangon ti balasitang ket nagpagnapagna! Napalalo ti ragsak da tatang ken nanangna.​​—Marcos 5:​21-​24, 35-​43; Lucas 8:​40-​42, 49-​56.

 Ita, panunotem daytoy. Yantangay nabalinan ni Jesus a pagungaren dayta a balasitang, maaramidna met kadi dayta kadagiti dadduma?— Iti panagkunam, talaga kadi nga aramidennanto dayta?— Wen, aramidennanto. Kinuna ni Jesus a mismo: ‘Umayto ti oras nga amin dagidiay adda kadagiti pakalaglagipan a tanem mangngegdanto ti timekko ket rummuarda.’​​—Juan 5:​28, 29.

Iti panagkunam, kayat kadi ni Jesus a pagungaren dagiti tattao?— Adda sabali pay a pasamak a nailanad iti Biblia a tumulong a mangsungbat iti dayta a saludsod. Naminsan, adda napasamak iti asideg ti siudad ti Nain a mangipakita no kasano ti panagrikna ni Jesus kadagiti tattao nga agladladingit kadagiti pumpon.

Idi ipumpumpon dagiti tattao ti bangkay ti maysa nga ubing a lalaki, adda sadiay ti inana. Pimmusay idin ni lakayna, ket ita natay metten ti kakaisuna nga anakna. Napalalo ti ladingitna! Adu kadagiti umili ti Nain ti nakipamumpon. Agturongda idin iti ruar ti siudad. Agsangsangit ti babai, ket saan a malapdan dagiti tattao ti panagsangsangitna.

Iti daydi nga aldaw, nairana nga agturong ni Jesus ken dagiti adalanna iti siudad ti Nain. Iti asideg ti ruangan ti siudad, nasabetda dagiti tattao a mangipumpon iti anak ti babai. Naasian ni Jesus idi makitana nga agsangsangit ti babai. Natukay ti riknana gapu iti napalalo a ladingitna. Kayatna a tulongan.

Gapuna, sidudungngo ngem sibibileg a kinunana iti babai: “Sumardengka nga agsangsangit.” Gapu iti panagsasao ken panagtigtignay ni Jesus, magagaran ti amin a mangmatmatmat kenkuana. Idi immasideg ni Jesus iti bangkay, pampanunotenda la ketdi no ania ti aramidenna. Nagsao ni Jesus, nga imbilinna: “Baro, kunak kenka, Bumangonka!” Dagus a bimmangon ket nagtugaw sa nagsao!​​—Lucas 7:​11-​17.

Panunotem no ania ti narikna ti inana! Ania ngata ti mariknam no napagungar ti natay a tao nga ay-ayatem?— Saan kadi nga ipakita  daytoy a talaga nga ay-ayaten ni Jesus dagiti tattao ken kayatna a tulongan ida?— Anian a makaparagsak inton agungar dagiti tattao iti baro a lubong ti Dios!​​—2 Pedro 3:​13; Apocalipsis 21:​3, 4.

Iti dayta a tiempo, ti dadduma kadagiti mapagungarto ket tattao a dati nga am-ammotayo, a pakairamanan dagiti ubbing. Ammotayto no siasinoda, no kasano nga ammo ni Jairo a ti mismo a balasangna ti pinagungar ni Jesus. Dagiti dadduma ket isu dagiti tattao a natay ginasut wenno rinibu a tawenen ti napalabas. Ngem uray no nabayagdan a natay, saan ida a malipatan ti Dios.

Saan kadi a makaparagsak a maammuan nga ay-ayatendatayo unay ni Jehova a Dios ken ni Jesus nga Anakna?— Kayatda nga agbiagtayo, saan nga iti sumagmamano laeng a tawen, no di ket iti agnanayon!