Maulit-ulit a pinanawan dagiti taga-Juda ni Jehova ket nagdaydayawda kadagiti ulbod a dios. Adu a tawen a tinultulongan ida ni Jehova. Nangibaon iti adu a propeta a mangibaga kadakuada nga isardengda dagiti dakes nga aramidda, ngem saanda a dimngeg. Inuy-uyawda ketdi dagiti propeta. Kasano a pinasardeng ni Jehova ti panagdaydayawda kadagiti ulbod a dios?

Saksakupen idi ni Nabucodonosor nga ari ti Babilonia dagiti nasion. Idi damo a rinautna ti Jerusalem, innalana ni Ari Jehoiakin, dagiti prinsipe, dagiti soldado, ken dagiti nalaing a trabahador, ket impanna idiay Babilonia. Innalana pay ti amin a napapateg a bambanag iti templo ni Jehova. Kalpasanna, pinagbalin ni Nabucodonosor ni Zedekias nga ari ti Juda.

Idi damo, nagtulnog ni Zedekias ken Nabucodonosor. Ngem dagiti nasion iti asideg ken dagiti ulbod a propeta imbagada ken Zedekias nga agrebelde iti Babilonia. Imbaga ni Jeremias kenkuana: ‘No agrebeldeka, adunto ti mapapatay iti Juda ken addanto bisin ken sakit.’

Kalpasan ti walo a tawen a panagturayna, nagrebelde ni Zedekias iti Babilonia. Nagpatulong iti Egipto. Idi kuan, imbaon ni Nabucodonosor dagiti soldadona a mangraut iti Jerusalem, ket nagkampoda iti aglawlaw ti siudad. Kinuna ni Jeremias ken Zedekias: ‘Imbaga ni Jehova a no sumukoka iti Babilonia, saanto a madadael ti siudad ken saankanto a matay. Ngem no dika sumuko, puoranto dagiti taga-Babilonia ti Jerusalem ket alaendaka kas balud.’ Imbaga ni Zedekias: ‘Saanak a sumuko!’

 Kalpasan ti maysa ket kagudua a tawen, dinadael dagiti soldado ti Babilonia dagiti pader ti Jerusalem ket sinerrekda ti siudad sada pinuoran. Adu ti pinatayda, rinibu ti innalada kas balud, ken pinuoranda ti templo.

Naglibas ni Zedekias, ngem kinamat dagiti soldado ti Babilonia. Natiliwda ni Zedekias iti asideg ti Jerico ket impanda ken Nabucodonosor. Impabuya ti ari ti Babilonia ken Zedekias ti pannakapapatay dagiti annakna. Kalpasanna, binulsekna ni Zedekias ket imbaludna. Idi agangay, natay ni Zedekias iti pagbaludan. Ngem inkari ni Jehova kadagiti taga-Juda: ‘Kalpasan ti 70 a tawen, pagsublienkayto iti Jerusalem.’

Ania ngata ti mapasamak kadagiti agtutubo a naipan idiay Babilonia kas balud? Agtultuloyda ngata nga agmatalek ken Jehova?