Kalpasan a nabautisaran ni Jesus, inturong isuna ti nasantuan nga espiritu idiay let-ang. Saan a nangnangan ni Jesus iti 40 nga aldaw ket permi ti bisinna. Idi kuan, sinulisog ti Diablo ni Jesus ket imbagana: ‘No talaga a sika ket Anak ti Dios, ibagam kadagitoy a bato nga agbalinda a tinapay.’ Ngem insungbat ni Jesus: ‘Kuna ti Kasuratan a saan laeng a makan ti kasapulan ti tao tapno agbiag. Masapul met a dumngeg iti amin nga ibaga ni Jehova.’

Kalpasanna, sinubok manen ti Diablo ni Jesus ket imbagana: ‘No talaga a sika ket Anak ti Dios, tumpuakka iti kangatuan a paset ti templo. Kuna ti Kasuratan nga ibaon ti Dios dagiti anghelna tapno sippawendaka.’ Ngem insungbat ni Jesus: ‘Kuna ti Kasuratan a saanmo a suboken ni Jehova.’

Kalpasanna, impakita ni Satanas ken Jesus ti amin a pagarian ti lubong ken ti kinabaknang ken kinadayagda ket imbagana: ‘Itedko kenka amin dagitoy a pagarian ken ti kinadayagda no agdayawka kaniak uray maminsan laeng.’ Ngem insungbat ni Jesus: ‘Pumanawka, Satanas! Kuna ti Kasuratan a ni laeng Jehova ti masapul a pagdayawam.’

Idi kuan, pimmanaw ti Diablo. Napan dagiti anghel ken Jesus ket inikkanda iti makan. Sipud idin, inkaskasaba ni Jesus ti naimbag a damag maipapan iti Pagarian. Dayta a trabaho ti nakaibaonanna ditoy daga. Maay-ayatan dagiti tattao iti insuro ni Jesus, ket sinurotda sadinoman ti napananna.