Ti ipapatay ket kasungani ti biag. Ti ipapatay mayasping iti nargaan a turog. (Juan 11:11-14) Dagiti natay dida makangngeg, makakita, makasao, wenno makapanunot iti aniaman. (Eclesiastes 9:5, 10) Isuro ti saan a pudno a relihion a dagiti natay mapanda iti lubong dagiti espiritu tapno makikaduada kadagiti inapoda. Saan a kasta ti isuro ti Biblia.

Dagidiay natayen saandatay a matulongan, ken saandatay a madangran. Gagangayen a mangaramid dagiti tattao kadagiti ritual ken panagatang a patienda a mangay-ayo kadagidiay a natayen. Daytoy saan a makaay-ayo iti Dios agsipud ta naibatay iti maysa kadagiti kinaulbod ni Satanas. Saanna met a maay-ayo dagiti natay, ta awan biagdan. Saantay koma a kabuteng wenno dayawen dagiti natay. Dayawentay laeng ti Dios.​—Mateo 4:10.

Agbiagto manen dagiti natay. Dagiti natay ibangonto ni Jehova iti biag iti paraiso a daga. Dayta a tiempo adda pay la iti masanguanan. (Juan 5:28, 29; Aramid 24:15) Kabaelan ti Dios nga ibangon dagidiay natayen a kas ti kinasigurado ti panangriingmo iti maysa a tao iti pannaturogna.​—Marcos 5:22, 23, 41, 42.

Ti ideya a saantay a matay ket kinaulbod nga insaknap ni Satanas a Diablo. Ipapati ni Satanas ken dagiti demoniona kadagiti tattao a ti espiritu dagiti natay ket sibibiag ken pataudenda dagiti sakit ken dadduma a problema. Allilawen ni Satanas dagiti tattao, no dadduma babaen kadagiti tagtagainep ken sirmata. Kondenaren ni Jehova dagidiay mangpadpadas a makisarita kadagiti natay.​—Deuteronomio 18:10-12.