Masapul ti panangikagumaan iti pannakigayyem; masapul ti panangikagumaan tapno mataginayon ti gayyem. Ti panangikagumaam nga agbalin ken agtalinaed a gayyem ti Dios naan-anayto a mabendisionan. Kinuna ni Jesus kadagidiay namati kenkuana: “Ti kinapudno wayawayaannakayto.” (Juan 8:32) Ania ti kaipapanan dayta?

Matagiragsakmon ti wayawaya ita. Mabalin a mawayawayaanka kadagiti ulbod a pannursuro ken kadagiti kinaulbod nga insaknap ni Satanas. Mawayawayaanka iti aglaplapusanan a kinaawan namnama iti biag dagiti minilion a tattao a saan a makaam-ammo ken Jehova. (Roma 8:22) Mawayawayaan pay dagiti gagayyem ti Dios iti “buteng iti ipapatay.”​—Hebreo 2:14, 15.

Masagrapmo ti wayawaya iti baro a lubong ti Dios. Anian a nagsayaat a wayawaya ti masagrapmo iti masanguanan! Iti Paraiso a daga, addanto wayawaya iti gubat, sakit, ken krimen. Wayawaya iti kinapanglaw ken bisin. Wayawaya iti panaglakay/panagbaket ken ipapatay. Wayawaya iti panagbuteng, panangirurumen, ken kinaawan hustisia. Kuna ti Biblia maipapan iti Dios: “Ukradem ta imam ket pennekem ti tarigagay ti isuamin a nabiag.”​—Salmo 145:16.

 Dagiti gagayyem ti Dios agbiagdanto iti agnanayon. Ti biag nga agnanayon ket maysa a nagpateg a sagut nga itdento ti Dios kadagiti amin a makipagayam kenkuana. (Roma 6:23) Panunotem laengen no ania ti kaipapanan kenka ti awan inggana a biag!

Addanto tiempom a mangaramid kadagiti adu a bambanag. Nalabit kayatmo nga adalen ti agtokar iti maysa nga instrumento ti musika. Wenno mabalin a kayatmo ti agadal nga agpinta wenno agbalin a karpintero. Nalabit kayatmo nga adalen ti maipapan kadagiti animal wenno dagiti mula. Wenno mabalin a kayatmo ti agbiahe ken pasiaren dagiti nadumaduma a daga ken tattao. Maaramid amin dagitoy agsipud ta addaanka iti biag nga agnanayon!

Addanto gundawaymo a maaddaan iti adu a gagayyem. Gapu ta agbiagka nga agnanayon maam-ammomto ti adu a sabsabali a nagbalin a gagayyem ti Dios. Maammuamto dagiti saguday ken dagiti nagsayaat a galadda, ket agbalindanto met a gagayyemmo. Ayatem ida, ket ayatendakanto. (1 Corinto 13:8) Ti panangikutmo iti biag nga awan inggana itdennanto kenka ti gundaway a makigayyem iti amin nga adda ditoy daga! Ngem ti kasayaatan iti amin, ad-addanto a suminged ti pannakipagayammo ken Jehova bayat nga aglabas dagiti siglo. Sapay koma ta agbalinka a gayyem ti Dios iti agnanayon!