Iti sumagmamano a tiempo, impamaysa ni Jesus ti trabahona idiay Galilea, a sadiay ad-adu ti dumngeg ngem idiay Judea. Kinapudnona, idi adda idiay Jerusalem ken pinaimbagna ti maysa a lalaki iti aldaw ti Sabbath, “inkagumaan dagiti Judio a papatayen ni Jesus.”​—Juan 5:18; 7:1.

Otonio idin ti 32 C.E., ken asidegen ti Piesta ti Tabernakulo (wenno, Abong-abong). Pito nga aldaw a maselebraran ti piesta, a sarunuen ti maysa nga asamblea, iti maikawalo nga aldaw. Ti piesta ti pagpatinggaan ti panagtalon iti tawen ken panawen ti panagragragsak ken panagyaman.

Dagiti kakabsat ni Jesus​—da Santiago, Simon, Jose, ken Judas​—kinunada kenkuana: “Mapanka idiay Judea.” Ti Jerusalem ti sentro ti relihion ti pagilian. Bayat ti tallo a piesta iti tawen, nakaad-adu ti tao sadiay. Inrason dagiti kakabsat ni Jesus: “Awan ti mangilimed iti aramidna no kayatna ti agbalin a nalatak. No aramidem dagitoy, ipakitam tapno maammuan ti intero a lubong.”​—Juan 7:​3, 4.

Kinapudnona, “saan a mamati” dagitoy uppat a kakabsatna nga isu ti Mesias. Ngem kayatda a dagiti nagtataripnong iti piesta makitada nga agaramid ni Jesus kadagiti milagro. Ammo ni Jesus a napeggad dayta, isu nga imbagana: “Awan ti rason a guraennakayo ti lubong, ngem siak, guraennak ta ibagbagak dagiti dakes nga aramidna. Mapankayo iti piesta; ngem saanak pay a mapan iti daytoy a piesta ta saan pay a dimteng ti tiempok.”​—Juan 7:​5-8.

Sumagmamano nga aldaw kalpasan a simmina dagiti kakabsat ni Jesus kadagiti kaduada a nagdaliasat, sililimed a pimmanaw ni Jesus ken dagiti adalanna a saan a nadnadlaw dagiti tattao. Nagnada iti as-asideg a dalan a lumasat iti Samaria, imbes a ti gagangay a pagpagnaan nga adda iti asideg ti Karayan Jordan. Kasapulan ni Jesus ken dagiti adalanna ti pagdagusan idiay Samaria, isu a nangibaon kadagiti mensahero nga umuna tapno mangisaganada iti pagdagusan. Dagiti tattao iti maysa a lugar saanda a kayat a padagusen ida gapu ta mapan ni Jesus idiay Jerusalem para iti piesta dagiti Judio. Gapuna, nakapungtot da Santiago ken Juan. Imbagada ken Jesus: “Apo, kayatmo kadi nga agkiddawkami iti apuy a bumaba manipud langit tapno madadaelda?” (Lucas 9:54) Tinubngar ida ni Jesus iti panangisingasingda iti dayta, ket intuloyda ti nagdaliasat.

Idi agdaldaliasatda, maysa nga eskriba ti nangibaga ken Jesus: “Mannursuro, surotenkanto sadinoman ti papanam.” Insungbatna: “Adda pagyanan dagiti sora ken umok dagiti billit, ngem ti Anak ti tao awan ti bukodna a balay.” (Mateo 8:19, 20) Ipakpakitana a mapasaran ti eskriba ti rigat no isu ket agbalin a pasurot ni Jesus. Agparang a  napannakkel unay ti eskriba a mangawat iti kasta a panagbiag. Gapuna, mabalin nga isaludsod ti tunggal maysa kadatayo, ‘Talaga kadi a kayatko a suroten ni Jesus?’

Kinuna ni Jesus iti sabali pay a lalaki: “Agbalinka a pasurotko.” Simmungbat ti lalaki: “Apo, itabonko pay koma nga umuna ni tatangko.” Gapu ta ammo ni Jesus ti kasasaad ti lalaki, kinunana: “Bay-am a dagiti natay ti mangitabon iti minatayda. Inka ketdi ipakaammo ti Pagarian ti Dios iti amin a lugar.” (Lucas 9:59, 60) Nalawag a saan pay a natay ni tatangna. Ta no natayen, awan koma sadiay a makisarsarita ken Jesus. Saan a nakasagana ti lalaki a mangyun-una iti Pagarian ti Dios.

Idi magmagnada a mapan idiay Jerusalem, imbaga ti sabali a lalaki ken Jesus: “Sumurotak kenka, Apo, ngem agpakadaak pay nga umuna iti pamiliak.” Insungbat ni Jesus: “Ti tao nga agar-arado a tumaltaliaw iti likudanna ket saan a maikari iti Pagarian ti Dios.”​—Lucas 9:61, 62.

Dagiti mayat nga agbalin a pudno nga adalan ni Jesus masapul a nakapokusda nga agserbi iti Pagarian. No saan nga ipokus ti agar-arado ti matana iti sanguananna, saan a nalinteg ti araduenna. No sumardeng tapno tumaliaw, saan a maileppas ti trabaho iti talon. Kasta met, asinoman a mangtaliaw iti daytoy daan a sistema ti bambanag ket mabalin a maitibkol iti dalan nga agturong iti biag nga agnanayon.