TI MAYSA a klase ti kuton a Saharan silver ant (Cataglyphis bombycina) ti maysa kadagiti pagaammo nga animal a kaanduran iti pudot. Gapu iti nakaro a pudot iti Sahara Desert iti tengnga ti aldaw, dagiti animal a mangkaan iti dayta a kuton ket mapilitan nga agbirok iti paglinonganda. Ngem apagbiit a rummuar ti kuton manipud iti abutna tapno agsapul iti kanenna a pakairamanan ti dadduma nga insekto a natay gapu iti nakaro a pudot.

Panunotem: Karaman kadagiti sekreto ti silver ant ket ti nagpaiduma a panglabanna iti pudot. Buklen dayta dagiti espesial a buok iti likud ken sikiganna ken ti awan buokna a makimbaba a paset ti bagina. Dagiti buok a makagapu iti nasileng a silver a kolor ti kuton ket kasla nagbabassit a tubo a sukog trianggulo. Ti dua a sikigan ti trianggulo ket adda nagbabassit nga allo-allonna idinto ta nalamuyot ti makimbaba a pasetna. Adda dua nga usar daytoy a disenio. Umuna, makatulong dayta tapno maibalandra dagiti buok ti napudot a radiasion ti init. Maikadua, makatulong daytoy tapno mapababa ti kuton ti pudot ti bagina a naggapu iti aglawlaw. Ti met awan buokna a makimbaba a paset ti bagi ti kuton ti mangkontra iti sumsumngaw a pudot iti kadaratan ti desierto. *

Makatulong ti nagpaiduma a panglaban iti pudot ti Saharan silver ant tapno mapagtalinaedna ti temperatura ti bagina a nababbaba ngem 53.6°C—ti kangatuan a maanduranna a temperatura. Nagserbi nga inspirasion dagiti researcher daytoy bassit nga insekto tapno makaaramidda iti espesial a pangkalupkop a mangpalamiis a di agusar iti paypay wenno dadduma pay nga alikamen.

Ania ti makunam? Resulta kadi ti ebolusion ti nagpaiduma a panglaban iti pudot ti Saharan silver ant? Wenno adda nangdisenio iti dayta?