Panagkunam, masolbar ngata dagiti tattao ti adu a problema a mangikkat iti kinatalged ken seguridadtayo ken mamagpeggad iti masakbayantayo? Tapno epektibo ti solusion, masapul a maikkat ti ramut, saan laeng a dagiti sintoma.

Kas pagarigan, ti pasiente a ni Tom ket nagsakit ken natay. Apay? “Idi damo a nakita dagiti sintoma ti sakitna, awan ti nakapanunot a mangammo iti makagapu kadagita,” insurat ti doktor iti nakayospitalan ni Tom sakbay a natay. Agparang a dagiti immun-una a doktor ket nangted laeng iti agas a mangpasayaat iti riknana.

Kasta met la kadi ti ar-aramiden dagiti tattao kadagiti problema ti lubong? Kas pagarigan, agaramid dagiti gobierno kadagiti linteg, agikabilda iti CCTV camera, ken paaduenda dagiti polis tapno malabananda ti krimen. Makatulong met ketdi dagita, ngem dida maparut ti ramut dagiti problema. Ngamin, ti ar-aramiden dagiti tattao ti pakakitaan no ania a talaga ti pampanunoten, marikrikna, ken kayatda.

Ni Daniel ket aggigian iti maysa a pumangpanglaw a pagilian iti South America. Kunana: “Nasayaat idi ti biagmi. Saankami a mabuteng nga adda dagiti armado nga agtakaw. Ngem ita, awanen ti natalna nga ili wenno barriomi. Gapu iti narigat a situasion, adun a tattao ti naagum ken saan a mangresrespeto iti biag wenno sanikua ti sabsabali.”

Adda lalaki nga awagantayo iti Elias. Tinalawanna ti gulo idiay Middle East ken nakipagadal iti Biblia. Imbagana: “Adu a babbaro iti siudadmi ti pinaregta dagiti kapamilia, kapartidoda iti politika, ken karelihionanda a makigubatda tapno maibilangda a bannuar. Kasta met la ti imbaga dagiti kontra iti partidomi! Makapadismaya ti agtalek kadagiti tattao nga agtuturay.”

Husto ti kuna ti maysa a nagkauna a libro a naglaon iti sirib:

• ‘Agannayas iti dakes ti puso ti tao manipud kinaubingna.’​—Genesis 8:21.

• “Ti puso ket ad-adda a manangallilaw ngem iti aniaman a banag ken desperado. Asino ti makaammo iti dayta?”​—Jeremias 17:9.

• “Ti puso ti pagtaudan ti dakes a panagpampanunot, pammapatay, . . . seksual nga immoralidad, panagtakaw, panagulbod.”​—Mateo 15:19.

Awan pay ti nabirokan dagiti tattao a mangbalbaliw kadagiti dakes nga ugalitayo a mangdurog kadatayo a mangdangran. Kinapudnona, dumakdakes dagita nga ugali, kas ipakita dagiti problema a nadakamat iti napalabas nga artikulo. (2 Timoteo 3:1-5) Mapaspasamak latta dagita nupay ad-adun ti magun-odan nga impormasion ken pamay-an iti pannakikomunikar! Apay ngarud a ditay mapagbalin a natalna ken natalged ti lubong? Talaga kadi a ditay kabaelan? Padpadasentayo kadi nga aramiden ti imposible?

Nupay adda pamay-an a mabaliwantayo dagiti dakes nga ugali ti tattao, ditay latta mapagbalin a natalged ti intero a lubong. Apay? Gapu kadagiti limitasiontayo kas tattao.

Daytoy ti simple a kinapudno: ‘Saan a kabaelan ti tao nga iturong uray ti addangna.’ (Jeremias 10:23)  Wen, saantayo a naparsua a mangituray iti bagitayo. Lallalo pay a saantayo a naparsua a mangituray iti padatayo a tao no kasano a saantayo a naparsua nga agbiag iti uneg ti baybay wenno iti law-ang!

Panunotem daytoy: Kayat kadi ti kaaduan a ti padada a tattao ti mangibaga no kasanoda nga agbiag wenno no ania dagiti nasayaat a prinsipio a surotenda? Kayat kadi dagiti tattao ti madiktaran no ania ti masapul nga opinionda iti aborsion wenno dusa nga ipapatay wenno no kasano ti rumbeng a panangdisiplinada iti annakda? Sumagmamano la dagita kadagiti isyu a di pagtutunosan ti tattao. Nupay nalabit narigat nga akseptaren, husto ti ibagbaga ti Biblia. Talaga a ditay kabaelan wenno awan ti kalintegantayo a mangituray iti padatayo a tattao. Pagpatulongantayo ngay?

Awan sabali no di ti Namarsua kadatayo. Ngamin, isu ti nangaramid kadatayo! Saan a kas iti pagarup ti dadduma, saannatayo a linipatan. Kinapudnona, babaen iti sirib a linaon ti Biblia, maammuantayo nga ipatpategnatayo. No maawatantayo dayta a nagpaiduma a libro, lallalo a maawatantayo ti bagitayo ken no apay a nakalkaldaang ti pakasaritaan ti tao. Maawatantayo no apay nga insurat ti maysa a masirib a taga-Germany a “dagiti tattao ken gobierno ket saan a nakasursuro kadagiti pasamak iti lubong, isu nga awan latta ti nagbalbaliwanda.”

Imbaga idi ti maysa a masirib a tao a “ti sirib mapaneknekan a nalinteg babaen kadagiti resultana.” (Lucas 7:35) Ti maysa a pagarigan dayta a sirib ket ti mabasa iti Isaias 2:22: “Para iti pagimbaganyo, dikayon agtalek iti tao.” Matulongannatayo dayta a nagsayaat a balakad tapno ditay mangnamnama iti di pulos mapasamak. Agnanaed ni Kenneth iti siudad ti North America a nasaknap ti kinaranggas. Kunana: “Kanayon nga agkari dagiti politiko ngem dida met tungtungpalen. Ipalagip dayta a pudno ken nainsiriban ti ibagbaga ti Biblia.”

Insurat ni Daniel a nadakamat itay: “Kada aldaw, lalo a kombinsidoak a saan a nasayaat ti panangituray ti tao. . . . Saan a gapu ta adda urnongmo iti banko wenno adda pensionmo, garantisadon ti masakbayam. Adun ti nakitak a nadismaya unay ta kasta idi ti impagarupda.”

Makatulong ti Biblia tapno ditay mangnamnama kadagiti di pulos mapasamak. Ikkannatayo met iti namnama kas isalaysay ti sumaruno nga artikulo.