Ti stress ket ti reaksion ti bagim iti narigat a situasion. Mangipatulod ti utekmo kadagiti hormone iti amin a paset ti bagim isu a pumartak ti panagangesmo ken panagpitik ti pusom, ngumato ti presion ti daram, ken tumangken dagiti maselmo. Sakbay a madlawmo dagita, nakasaganan ti bagim nga agtignay. No malpasen ti makapa-stress a situasion, agsublin iti normal ti bagim.

Ti stress ket natural a reaksion a tumulong kenka a mangsango kadagiti narigat wenno delikado a situasion. Mangrugi daytoy a reaksion iti utekmo. Pagsayaatan ti stress ta tulongannaka nga agtignay a dagus. Makatulong met ti kalkalainganna nga stress tapno maaramidmo dagiti kayatmo nga aramiden wenno nasaysayaat ti maaramidam, kas pagarigan bayat ti eksam, interbiu iti trabaho, wenno iti isports.

Ngem madangrannaka ti napaut, sobra, wenno nakaro unay nga stress. No kanayon wenno agtultuloy ti stress-mo, posible a maapektaran ti bagim, emosion, ken isipmo. Mabalin nga agbaliw ti ugalim, wenno ti panangtratom iti dadduma. Tapno mailiwliwagmo ti nakaro nga stress-mo, mabalin met nga agbartek, agdroga, agbisio, wenno manganka iti adu unay. Baka agresulta pay ketdi dayta iti depresion, sobra a bannog, wenno panagpakamatay.

Agduduma ti epekto ti stress iti tunggal tao. Ngem mabalin nga agresulta dayta iti adu a sakit ken apektaranna ti dandani amin a paset ti bagim.