Dayta ti imbaga ti maysa a grupo dagiti researcher manipud iti agduduma a pagilian maipapan iti climate change. No mamatika nga adda Namarsua a mangipatpateg kadagiti tattao, mabalin nga ipalagip kenka daytoy nga imbagada nga adu ti natural a proseso a dinisenio ti Dios tapno makarekober ti planetatayo.

Ngem gapu ta nakaro ti panangdadael ti tao iti daga, marigatan ti planetatayo a makarekober a bukbukodna. Apay a makapagtalektayo nga addanto ti aramiden ti Dios maipapan iti daytoy?

Kitaem dagiti teksto iti kahon a mangipasigurado kadatayo a saan a madadael ti daga ken sumayaat pay ketdi.

• Pinarsua ti Dios ti planetatayo. “Idi un-unana, pinarsua ti Dios ti langit ken ti daga.”—Genesis 1:1

• Ti Dios ti makinkukua iti planetatayo. “Kukua ni Jehova a ti daga ken ti amin nga adda iti dayta.”—Salmo 24:1

• Dinisenio ti Dios ti planetatayo a saan a madadael. “Impasdekmo ti daga kadagiti pundasionna; saanto a mayakar iti ayanna iti agnanayon nga awan inggana.”—Salmo 104:5

• Ikarkari ti Dios nga agtalinaed ti biag ditoy planetatayo iti agnanayon. “Ti pudno a Dios, ti Nangporma iti daga, . . . saanna a pinarsua [ti daga] nga awan serserbina, no di ket pinormana a pagnaedan.”—Isaias 45:18

• Ikarkari ti Dios nga agbiag nga agnanayon dagiti tattao iti planetatayo. “Dagiti nalinteg kukuadanto ti daga, ket agyandanto iti dayta iti agnanayon.”—Salmo 37:29

Dinisenio ti Dios ti daga nga addaan kadagiti natural a proseso tapno agtalinaed dayta uray no daddadaelen ti tao. Impadto ti Biblia nga iti tiempo nga inkeddeng ni Jehova a Dios, pagpatinggaennanto ti panangabuso ken panangdadael iti planetatayo.—Apocalipsis 11:18

Ikarkari ti Biblia a pagbalinento ti Dios ti planetatayo a nakapimpintas a paraiso ken ukradenna ti imana tapno ‘pennekenna ti tarigagay ti tunggal sibibiag a banag.’—Salmo 145:16