ADU nga animal iti nalamiis a danum ti addaan iti napuskol a taba a mangpaimeng kadakuada. Ngem sabali ti panglaban ti sea otter iti lammin—ti napuskol a dutdotna.

Panunotem: Napuspuskol ti dutdot ti sea otter ngem iti aniaman a sabali pay nga animal. Agarup maysa a milion a buok ti adda iti kada kuadrado pulgada (square inch). No aglangoy daytoy nga otter, mangpupok ti dutdotna iti angin iti asideg ti kudilna. Dayta ti agserbi a proteksionna tapno saan a direkta a dumket iti kudilna ti nalamiis a danum a mabalin a mangpukaw iti pudot ti bagina.

Mamati dagiti sientista nga adda maadaltayo iti dutdot ti sea otter. Nageksperimentoda kadagiti coat a naaramid iti artipisial a dutdot nga agduduma ti kaatiddog ken baet ti tunggal dutdot. Natakuatanda a “no napuspuskol ken at-atiddog dagiti dutdot ti coat, namagmaga dayta wenno mas kumtat ti danum.” Iti sabali a pannao, maipagpannakkel ti sea otter ti nakasaysayaat a dutdotna.

Namnamaen dagiti sientista a ti panagadalda ket agresulta iti panagdur-as ti teknolohia iti panagdisenio ken panagaramid kadagiti kabbaro a tela a saan a mabasa. Gapu iti dayta, mabalin a panunoten ti dadduma a baka nasaysayaat no dagiti aglanglangoy iti nalamiis a danum ket agisuot iti kawes a kas iti napuskol a dutdot ti sea otter!

Ania ti makunam? Resulta kadi ti ebolusion ti dutdot ti sea otter a mangpapudot iti bagina? Wenno adda nangdisenio iti dayta?