Masansan a ti panangidumduma ket maigapu iti di umiso nga impormasion. Kitaem dagitoy a pagarigan:

• Pampanunoten ti dadduma a boss a saan kano a kabaelan dagiti babbai dagiti trabaho a mainaig iti siensia ken teknolohia.

• Idiay Europa idi, naakusaran dagiti Judio a mangsabsabidong kadagiti bubon ken mangiwarwaras iti sakit. Bayat ti turay ti Nazi, napabasol manen dagiti Judio nga isuda ti makagapu iti panagsuek ti ekonomia ti Germany. Gapu kadagitoy, nagbalin dagiti Judio a biktima iti nakaro a panangidumduma ket madlaw pay laeng dayta agingga ita.

• Ipappapan ti adu a tao nga amin nga adda depektona ket naliday wenno nasakit ti nakemda.

Dagiti tattao a mamati kadagiti kasta a di umiso a kapanunotan ket mabalin a mangbirok kadagiti pagarigan wenno ebidensia tapno agparang a hustoda. Para kadakuada, ignorante ti asinoman a kumontra kadakuada.

“Saan a nasayaat ti tao nga awanan pannakaammo.”​—PROVERBIO 19:2.

Ania ti kaipapananna? No saantayo nga ammo ti pudno, makaaramidtayo kadagiti di umiso a desision. No mamatitayo kadagiti di umiso a kapanunotan imbes nga iti agpayso, mahusgarantayo dagiti tattao.

No ammotayo ti pudno maipapan kadagiti tattao, saantayo a nalaka a mamatpati kadagiti  di umiso nga impormasion a maibagbaga maipapan kadakuada. No maammuantayo a saan gayam nga agpayso ti nadamagtayo maipapan iti maysa a grupo, saantayton a nalaka a mamatpati no adda madamagtayo maipapan iti sabali a grupo.

• Laglagipem a no adda negatibo nga ibagbaga dagiti tattao maipapan iti maysa a grupo, dina kayat a sawen a kasta ti amin nga indibidual iti dayta a grupo.

• Bigbigem a mabalin a limitado ti ammom maipapan iti sabsabali.

• Ikagumaam nga ammuen ti pudno manipud iti mapagtalkan a gubuayan.