Mailawlawag kadi dagiti sientista no kasano a nangrugi ti biag ken ti uniberso? Nalawag a saan ti sungbat. Ibaga ti dadduma a kaya dagiti sientista a mangad-adal iti uniberso nga ilawlawag ti nangrugian ti uniberso. Ngem kuna ti maysa nga agnostiko a professor ti astronomy iti Dartmouth College a ni Marcelo Gleiser: “Saanmi pay a nailawlawag no ania a talaga ti nangrugian ti uniberso.”

Kasta met, maipapan iti nangrugian ti biag, kuna ti maysa nga artikulo iti magasin a Science News: “Kasla imposible a maammuan no kasano a nangrugi ti biag ditoy daga. Kaaduan kadagiti bato ken fossil a mangipakita no ania a talaga ti napasamak ditoy daga idi un-unana ket nabayagen a napukaw.” Ipakita dagita a komento a saan pay a nasungbatan ti siensia ti saludsod a, Kasano a nangrugi ti biag ken ti uniberso?

Ngem mabalin a mapanunotmo, ‘No nadisenio ti biag ditoy daga, asino ti nangdisenio?’ Mabalin a naisalsaludsodmo pay: ‘No adda masirib ken naayat a Namarsua, apay nga ipalpalubosna nga agrigat dagiti tattao? Apay nga adu ti agduduma a relihion? Apay nga ipalpalubosna nga agaramid iti saan a nasayaat dagiti agdaydayaw kenkuana?’

Saan a masungbatan ti siensia dagita a saludsod. Ngem dina kayat a sawen a saankan a makabirok kadagiti makakombinsir a sungbat. Ti agpayso, adu a tattao ti nakabirok kadagiti makapnek a sungbat iti Biblia.

Tapno makitam no apay a mamati nga adda Namarsua ti dadduma a sientista a nagadal iti Biblia, mapanka iti jw.org, sa birokem ti “kapanunotan maipapan iti nangrugian ti biag.”