Manipud Kadagiti Agbasbasa

Depression Dagiti Tin-edyer Anian a ragsakko nga immawat iti serye ti akkub ti Agriingkayo! a “Tulong Kadagiti Malmalday a Tin-edyer”! (Setiembre 8, 2001) Adun a tawen a makidangdangadangak iti daytoy a sakit. Pagyamanan iti daytoy nga artikulo a nakatulong iti narikut a kasasaadko.

L. D., Francia

Maysaak a nars ti ubbing. Adu ti mangtagtagibassit iti saklawen ti depression ngem saankayo a kasta. Nagpedidoak iti sangagasut a kopia daytoy a magasin. Panggepko nga iwaras dagitoy iti amin a doktor ti ubbing ken agtartrabaho iti tay-ak ti panamagtalinaed a nalimbong ti panunot ti tattao iti daytoy a lugar.

B. P., Estados Unidos

Adu a kakabagiak ti nadayagnos nga addaan iti depression wenno bipolar disorder. Makatulong unay ti panangbigbig a dagitoy ket sakit imbes a pagkapuyan tapno maisubli ti napukaw a dignidad ti adu a tattao. Makatulong kadakami amin dagiti intedyo a singasing tapno agbalinkami a naasi ken manangandingay.

C. M., Canada

Apaman a naawatko daytoy a magasin, rinugiak a binasa dayta. Makasangitak gapu iti rag-o ta ipatpategyo dagiti agtutubo ken nangilatangkayo iti 12 a panid maipapan iti dayta a suheto. Pagyamanan unay!

M. M., Austria

Talaga a nakatulong kaniak daytoy nga artikulo tapno agkalmaak ken agtalna ti pusok. Impakaammona met kaniak a saan la a sisiak ti addaan iti daytoy a sakit. Ikarkararagko a liwliwaen ken tulongan koma ni Jehova ti amin a tattao nga agsagsagaba iti depression.

Y. T., Japan

Kanayon nga agidulinakto iti adu a suplay daytoy a ruar. Dayta ti eksakto a kasapulan dagiti tin-edyertayo ket patiek a makatulong dayta iti adu kadakuada ken kadagiti dadakkelda tapno madaeranda ti siuumiso a dineskribiryo kas maysa a sakit. Nalabit adunto a biag ti ispalenna.

R. F., Estados Unidos

Naliwliwaak a nangammo a daytoy nga emosional a kinasaem ket saan a gapu iti nakapuy nga espiritualidad. Ad-adda a nabang-aran ti pusok, ket nakasangitak a nangbasa a “ni Jehova asideg kadagidiay nadunor ti pusoda.”​—Salmo 34:18.

A. I., Japan

Agtawenak iti 16, ket adun a tawen nga agkarasubli ti depression-ko. Daytoy a magasin ti talaga a kasapulak! Nangted dagitoy nga artikulo iti pammagbaga a kasapulak.

L. B., Australia

Maysaak nga agtutubo nga addaan iti depression, ket diak pay pulos nga imbagbaga kadagiti dadakkelko wenno iti siasinoman a kayatko ti agpakamatay. Dakkel a kamali daytoy. Nasken nga agpatulongka no addaanka iti depression. Pagyamanan iti pannakaseknan ken panangisakityo kadagiti agtutubo.

S.G.C., Estados Unidos

Asero Agtartrabahoak iti kompania ti asero, ket impakitak ti artikulo a “Natangken Ngem Nalukneng Met” (Setiembre 8, 2001) iti teknikal a direktorko. Imbagana a nupay narigat a suheto ti insalaysay ti artikulo, nalawag ken umiso dayta, ken di nangusar iti adu unay a teknikal a termino. Dagiti artikulo a kas iti dayta ti makatulong kadakami tapno maipakaammomi ti Agriingkayo! iti sabsabali.

G. B., Italia

Gapu ta kalkalpasko a nasanay iti trabahok kas agek-eksamen kadagiti material a metal, diak unay kaay-ayo a basaen ti artikulo maipapan iti panagaramid iti asero. Ngem talaga a nagustuak ti panangisalaysayyo iti kasta a nalawa ti saklawenna ken nakarikrikut a suheto.

M. F., Alemania