Pintaam ti Pagtaengam

MAKAPNEK unay a kitaen ti baro a napintaan. Iti siled a kasla daan wenno nagkupasen, dakkel ti maaramidan ti panangpinta iti dayta. Kayatmo kadi a papintasen ti maysa wenno dua a siled iti balaymo? No pulos a saanmo pay a napadasan ti nagpinta, mabalin a nalaklaka dayta ngem iti pagarupem!

Tulongantayo ni Fernando, ti misisna a ni Dilma, ken ti walo ti tawenna nga anakda a ni Vanessa, bayat a pintaanda manen ti maysa a paset ti balayda. Iti kasta, mabalin a mas kabesadotayonton ti agpinta. Ngem sakbay nga isuottayo dagiti aruaten nga agpinta, agsursurotayo pay maipapan ti panagpili kadagiti kolor.

Panagpili Kadagiti Kolor

Napateg ti panagpili a naimbag kadagiti kolor ti pinta. Mabalin nga ad-adu ti maaramidan ti kolor ngem iti basta panangpapintas iti balaymo. Mabalin pay ketdi nga adda epektona iti riknam. Ad-adda a makaparagsak dagiti napatak ken nasileng a kolor, idinto ta ad-adda a mangparelaks dagiti napusyaw ken saan a nasileng. Mabalin a natayengteng ti maysa a kolor no maipinta  iti diding iti uneg ti maysa a pasdek wenno balay, ngem no iti ruar, mabalin a napuspusyaw dayta. Para iti balay da Fernando ken Dilma, pinilida ti kakolkolor ti krema ken duyaw a kakolkolor ti sabong ti akasia. Kitaentayo madamdama no pangusaranda kadagitoy.

Kitaem ti color wheel iti ngato. Dagiti direkta nga agbinnatog iti wheel ket maawagan nga agkabagay a kolor. Kasla nataytayengtengda no agabayda. No kayatmo ti kolor a kalkalainganna wenno mas konserbatibo imbes a mangpaganaygay, agpilika iti nadumaduma a kinapusyaw wenno kinatayengteng ti isu met la a kolor. Maawagan daytoy a monochromatic color scheme.

Sakbay nga agpinta dagiti gagayyemtayo, adda pay kayatda a saludsoden. Kayat a maammuan ni Fernando no ania a klase a pinta ti kasapulanda, ket kayat a maammuan ni Vanessa no kasano a maaramid ti pinta. Isu a nasaysayaat sa no mapantayo agpasiar iti maysa a lokal a paktoria ti pinta tapno maammuantayo.

No Kasano a Maaramid ti Pinta

Immannugot ti makimpaktoria a ni Gerard nga isu ti mangipasiar kadatayo. Maysa kadagiti umuna a makitatayo no sumrektayo iti paktoria ti pinta ket ti nagdakkel a pagkiwar a mangkiwkiwar iti napigket a substansia nga adda iti malukong a 800 a litro ti laonenna. Nupay naungor, impukkaw ni Gerard: “Ti panagaramid iti pinta ket kaasping ti panagaramid iti cake​—matimbang, marukod, ken mapaglalaok ti amin a ramen.”

“Ngem ania ti resipe iti panagaramid iti moderno a pinta?” inyimtuodtayo.

“Adda uppat a kangrunaan a ramen,” kinuna ni Gerard. “Dagiti pagkolor, sangkap a mangpapigket, likido, ken espesial a sintetiko a substansia. Titanium dioxide ti kangrunaan a ramen daytoy pinta a makitkitayo a makiwkiwar. Nakali manipud iti daga daytoy puraw a pagkolor ken maus-usar itan kadagiti moderno a pinta imbes a buli.” Ti naglalaok a ramen ket kasla arina a maus-usar iti panagaramid iti cake wenno tinapay.

Kinuna pay ni Gerard: “Ti naglalaok a ramen ket mapagbalin a nakapalpalet ken malaokan bassit iti mangpapigket​—iti daytoy a kasasaad, malaokan iti acrylic resin. No mapneken ti agar-aramid iti pinta iti kinapaletna, inayonna ti nabatbati a resin, dagiti likido a kas iti danum wenno mineral spirit (petroleo a pangpadaruy) ken kalpasanna, ti aniaman nga espesial a sintetiko a substansia.”

Kayattayo a maammuan no ania a klase a pinta ti kasapulan a pangmantener iti balay. Inlawlawag ti giyatayo: “Adda dua a klase ti pinta a para iti balay. Iti pinta a lana ti kangrunaan a ramenna, maus-usar ti linseed wenno napasayaat a lana ti soya kas mangpapigket, idinto ta vinyl wenno acrylic resin kas mangpapigket ti maus-usar kadagiti pinta a danum ti kangrunaan a ramenda. Nakatangtangken inton agmaga dagiti pinta a lana ti kangrunaan a ramenda, isu a maitutop dagitoy kadagiti lugar a masansan a masagid, a kas kadagiti ridaw ken paspaset a naaramid iti kayo. Nupay kasta, dagiti pinta a lana ti kangrunaan a ramenda ket nalaka nga agkupas ken agkuplat inton bumaybayag. Iti kasumbangirna, agtalinaed ti orihinal a kolor dagiti de kalidad a vinyl ken acrylic ken saan unay a makasubkar ti angotda. Ad-adda met nga agpaut dagiti exterior 100-percent acrylic uray no mabilagda iti kalgaw ti Australia wenno mabasada iti kalam-ek ti Canada.”

Sapay koma ta natandaanantayo ti insuro kadatayo ni Gerard. Ngem adda pay kayatna nga ibaga: “Adda uppat a klase ti sileng dagiti pinta: gloss, satin, low sheen, ken flat. Nasaysayaat ti gloss kadagiti masansan a masagid wenno mausar a disso. Ti satin ket nasayaat kadagiti banio ken pasilio. Ti low-sheen wenno flat a pinta ket maitutop kadagiti sala, idinto ta ti flat a pinta ket praktikal unay kadagiti bobida.” Agyamantayo ken ni Gerard  iti makaisuro a panagpasiartayo ket agsublitayon idiay balay tapno rugiantayo ti narigat a paset ti proyektotayo​—ti panangisagana kadagiti mapintaan.

Napateg ti Naan-anay a Panagsagana

Ti balligi ti napintas ken agpaut a napintaan ket agpannuray iti panagsagana a naimbag sakbay ti panagpinta. Oras ngaruden tapno ilislistayo dagiti manggastayo ken agsaganatayon para iti narigat a trabaho. Nalabit adda pay dagiti masursurotayo a makatulong a singasing bayat nga agtartrabahotayo. Adda dua a proyekto a pampanunoten ni Fernando​—panangpinta iti siled a panganan ken ti makinsango nga alad. Rugiantayo nga umuna ti siled a panganan.

Kalpasan a naikkat dagiti muebles, arpawantayo ti suelo kadagiti daan a kubrekama. Umuna, masapul a kuskosantayo ti daan ken agkupkuplaten a pinta ti hamba ti tawa, dadduma pay a paspaset a naaramid iti kayo, ken ti bobida. Tulongantayo ni Fernando iti dayta a trabaho. Kitaem, ti agdanna ket insimpana a naimbag iti suelo. Annadanna met a saan a pulos nga agtakder iti kangatuan a tukad ti agdan, ta nalaklaka no kua a matumba. Nasayaat pay laeng ti palitada ti diding, ngem masapul a madalusanda babaen ti danum ken sabon sakbay a mapintaan manen.

Sumaganad, agusartayo iti pagkuskos a mangikkat iti nalukay a banag manipud iti aniaman a nagbirri, a masapul a maselselan. Agusartayo iti acrylic gap sealant kadagiti nagbirri iti aglawlaw ken pingir ti tawa agsipud ta agtalinaed a naamnut daytoy a pangselsel ken madaeranna ti aniaman a panaggaraw iti nagbaetan ti kayo ken palitada. Kalpasanna, bayat a bugbugguan ni Vanessa dagiti alikamen a pagpalitada, datay amin ti mangliha a naimbag kadagiti diding ken paspaset a naaramid iti kayo, babaen ti liha a kalkalainganna ti kinagaspangna. Daytoy ti mangikkat iti aniaman a babassit a nagtutukel ken mangpakersang kadagitoy tapno nalaklaka a dumket dagiti agrurutap a maipinta.

Kayatmo kadi a maammuan no apay nga agus-usartayo kadagitoy makapakatawa ti langada a maskara? Pangsalaknib dagita tapno saan nga aggagatel dagiti karabukobtayo kadagiti agtedted a pinta ken tapuk ti palitada. Mabalin a saan nga uso ti itsura dagiti goggles-tayo, ngem bayat nga agtartrabahotayo iti ngatuen ti ulotayo, salaknibanda dagiti matatayo manipud kadagiti matnag a rugit. Kasapulan ti naisangsangayan a panagannad no kuskosantayo dagiti pinta a buli ti kangrunaan a ramenda. (Kitaem ti kahon a “Ti Peggad ti Buli” iti sumaruno a panid.)

Kamaudiananna, kaykayantayo ti intero a disso.  Dagiti di napintaan a kayo agraman dagiti naitapkal kadagiti napalitadaan a diding ket masapul itan a mapintaan iti nakusnaw wenno iti umuna a rutap sakbay a mangrugi ti aktual a panangpinta tapno padapada ti panagmaga ti pinta a makinrabaw ken limpio ti kinasilengna imbes nga umagsep iti aniaman a naitapkal iti kayo gapu iti panangliha wenno ti napalabas a panangpinta. Apaman a maaramid daytoy, nakasaganan ti siledtayo iti aktual a panagpinta.

Makitatayo a ti alad ket kayo a di napintaan. Kalpasan a madalusantayo a naimbag ti alad, masapul a pintaantayo nga umuna ti amin nga ulo ti lansa babaen ti pinta a para iti metal tapno saan nga umagsep ti lati. Gapu ta mabalin a mabilag wenno matuduan ti alad, mamindua wenno mamitlo a rutapantayo iti pinta nga acrylic a para kadagiti alad.

Bueno, husto daytan para iti agmalem. Gapu ta kompleton ti panagsaganatayo, inton bigat ti aktual a panagpintatayo.

Rugiantayon ti Agusar Kadagiti Brutsa

Ita, mangrugin a sagrapentayo dagiti gunggona ti naimbag a panagsaganatayo idi kalman. Umuna unay, masapul a siertuentayo a nakiwar a naimbag ti pinta sakbay a rugiantayo ti agpinta. Pinadaruytayon ti acrylic a pinta para iti diding babaen ti bassit laeng a danum, agarup 5 a porsiento iti intero a kaaduna. Makatulong daytoy nalaklaka a panagpinta babaen ti brutsa. Ngem masapul a ditay nayonan iti adu unay a danum. Ngamin, agbalin a nakadardaruy ti pinta ken malasinto latta ti daan a kolor uray no narutapanen. Para kadagiti igid ti diding ken bobida, agusartayo iti akaba a brutsa. Kalpasanna, agusartayo kadagiti roller a pagpinta iti nalawa a disso. Daytoy ti mangpapartak iti trabaho. *

Masapul a laglagipentayo nga ipulagid ti brutsa iti maysa laeng a sikigan ti lata ti pinta tapno maikkat ti sobra a pinta sa idissotayo ti pagiggaman iti nadalus a paset ti lata tapno di mapintaan ti pagiggaman agraman dagiti imatayo. Kamaudiananna, masapul nga iyaplikartayo ti pagannurotan a, “Rugiam manipud iti ngato nga agpababa.” Kaipapanan daytoy a leppasentayo ti bobida sakbay a rugiantayo dagiti diding. Kalpasanna, ti nasken laengen nga aramidentayo ket punasan babaen ti nadam-eg a nisnis ti aniaman a nagtedted a pinta iti paspaset a naaramid iti kayo ken pintaan dagita babaen ti pinilitayo a pinta a lana ti kangrunaan a ramenna. Kitaenyo, nagsayaat ti pannakapintana! Nagpintas a kitaen dagiti napusyaw ti kinaduyawda a diding ken ti kakolkolor ti krema a paspaset a naaramid iti kayo.

Ita, pintaantayon ti makinsango nga alad. Agusartayo iti dakkel a brutsa ken pinta a danum ti kangrunaan a ramenna para kadagiti palisada ti alad. Umdasen no mamitlo a marutapan. Kasapulan ti maysa nga oras wenno nasursurok tapno naan-anay nga agmaga ti tunggal rutap, apag-isunto a malpastayo sakbay a sumipnget. Mangrugitayon.

Umuna, babasaentayo a naan-anay ti brutsa ken paaruyotantayo ti aniaman a sobra a danum. Daytoy ti mangpasayaat iti panangagsep ti brutsa iti pinta ken manglapped iti panagmaga ti pinta iti brutsa. Mangikabiltayo iti adu a pinta iti brutsa ken saysayaatentayo nga ipinas dayta kadagiti atiddog a panagpinta. Imbes a basta kolorantayo latta dagiti palisada, ikagumaantayo nga ipaagsep ti pinta iti binggas ti kayo.

Kitaenyo! Apag-isu a nalpas ti maikatlo a rutap bayat a lumlumnek ti init. Kasla kabarbaro ti alad! Sukimatentayo man ti inaramidtayo. Talaga a makagunggona ti dua nga aldaw a panagbannogtayo. Anian a panagbalbaliw! Talaga a makaparagsak ti panangarkos iti balay ti pamilia babaen ti pinta.

[Footnote]

[Kahon/Ladawan iti panid 26]

Dagiti Singasing a Pangparmek iti Sumagmamano a Gagangay a Parikut

◼ BUOT: Dalusam ti mapintaan babaen ti maysa a kapaset a bleach ken uppat a kapaset a danum. Agguantes ken agusarka iti goggles a mangsalaknib iti rupam. Rutapam manen iti nasayaat nga acrylic a pinta, ta nalaklaka a buoten dagiti pinta a lana ti kangrunaan a ramenda. No magun-odan, agusarka iti substansia a mangpatay kadagiti buot.

◼ DANUM KEN DADDUMA PAY A MANSA: Tarimaanem dagiti agubo wenno ikkatem ti pakaigapuan ti mansa. Dalusam babaen ti sabon ken danum. Pintaam iti manglapped iti mansa wenno shellac, ket kalpasanna, rutapam manen.

◼ DAGITI NATAPUK A DISSO: Ikkatem a naimbag ti tapuk. Pintaam iti nabayag nga agmaga. Dagiti pinta a lana ti kangrunaan a ramenda ket umagsep ken pagdedekketenda a naimbag dagiti partikulo ngem iti pinta a danum ti kangrunaan a ramenna.

[Kahon iti panid 27]

Ti Peggad ti Buli

Kastoy ti makuna ti The Environment Protection Agency of Australia iti bokleta a Lead Alert​—Painting Your Home?

◼ Uray bassit ti buli iti dara dagiti ubbing, mabalin a dadaelenna ti itatanor ti panunot ken kababalinda.

◼ Dagiti ubbing nga awan pay lima ti tawenda ti kangrunaan nga agpeggad, yantangay tumantanor pay laeng ti sistema nerbioda. Maagsep dagiti ubbing ti inggat’ 50 a porsiento ti buli a sumrek iti bagida, idinto ta agarup a 10 a porsiento ti maagsep dagiti adulto.

◼ No makapangan ti maysa nga ubing iti nagkuplat a pinta a kas iti kadakkel ti kuko ti tangan, agtalinaed nga adu ti buli iti darana iti sumagmamano a lawas.

[Ladawan iti panid 25]

Color wheel

[Ladawan iti panid 25]

“Kosina” ti para aramid iti pinta

[Ladawan iti panid 26]

Agusarka iti mangsalaknib nga aruaten tapno natalgedka