Manipud Kadagiti Agbasbasa

Narelihiosuan a Panangidadanes Pinagsiputnak ti artikulo a “Narelihiosuan a Panangidadanes Idiay Georgia​—Kasano Pay Kapaut?” (Enero 22, 2002) no kasano ti kapartak ti panagbalbaliw daytoy a lubong. Masansan nga ut-utobek dagiti artikulo a kas iti daytoy, ken iyim-imtuodko iti bagik no, ‘Sadino ti ayanko idi mapaspasamak daytoy? Kasano kasinged ti relasionko ken ni Jehova bayat a kasta unay ti panagsagaba dagiti patpatgek a kakabsat?’ Pangngaasiyo ta ipakaammoyo kadagiti kakabsat nga ay-ayatenmi ida ken maladingitankami kadagiti pakasuotanda.

K. S., Estados Unidos

Idi nabasak ti pannakamaltrato dagiti Saksi ni Jehova idiay Georgia, talaga a nakasangitak. Naimpusuan nga inkarkararagko a suportaran ken salakniban ni Jehova ida ken iburayna ti aglaplapusanan a panagayatna kadakuada. Kayatko nga ipakaammo kadagiti kakabsatko idiay Georgia nga ikarkararagak ida. Uray no addaak iti sabali a lugar, naimpusuan nga agyamanak iti pribilehio a makikadua kadakuada nga agserbi ken Jehova.

M. T., Japan

Kadagiti linawas a gimongmi, mangngegko nga ikararagan dagiti kakabsat iti plataporma dagiti kakabsattayo idiay Georgia, ngem awan pay unay idi ti ammok maipapan iti mapaspasamak sadiay. Diak man la pulos impagarup a mapaspasamak dagiti kinadangkok a nadakamat iti artikulo. Ipakaammoyo koma kadakuada nga ikarkararagan ida dagiti kakabsatda iti intero a lubong. Makaparegtada unay kadakami amin a mangsarsaranget kadagiti babbabassit nga amang a parikut ngem iti sarsarangtenda.

V. P., Estados Unidos

Napabilegak unay iti pammati dagitoy a kakabsat, ket makasangitak gapu iti panagsagabada. Ipakpakitada ti kinatured, kinatibker, ken kasta unay a panagtalek ken Jehova. Maragsakanak no maammuanda a makipagriknaak kadakuada, ay-ayatek ida, ken laglagipekto ida kadagiti kararagko.

F. F., Italia

Okulto Agyamanak unay iti artikulo nga “Agimtuod Dagiti Agtutubo . . . Apagapaman a Panaginteres iti Okulto​—Ania ti Pagdaksanna?” (Enero 22, 2002) Daytoy nga artikulo ti nangpatured kaniak a mangibelleng a mamimpinsan iti maysa a mapagduaduaan a banag. Talaga a tinignayna ti pusok a mangbasa iti ad-adu pay maipapan iti pagwadan dagiti taga Efeso a nadakamat iti Biblia a nangpuor kadagiti libroda maipapan iti espiritismo uray no aggatad dagitoy iti 50,000 a kapisi ti pirak. (Aramid 19:19) Ti gatad ti papel nga imbasurak ket saan a maipadis iti kinapateg dagiti banag nga ipaayto ni Jehova kaniak. Pagyamanan iti panangipablaakyo kadagiti artikulo a kas iti daytoy iti umiso a tiempo.

A. N., Japan

Makabulan itan a nabautisaranak. Sakbay a nakasursuroak maipapan iti Biblia, kanayon a makiumanak iti espiritismo babaen ken ni nanangko a saan a maysa kadagiti Saksi ni Jehova. Dimteng ti artikulo iti umiso a tiempo. Ammokon no ania ti masapul a pagannadak, ken masapul a naan-anay nga agtalekak ken ni Jehova. Kalpasan ti namin-adun a panangbasak iti daytoy nga artikulo ken ti pannakiumanko iti maysa a Kristiano a kabsat, saanak unayen a mabuteng.

A. P., Alemania

Manipud iti Maysa a Mannursuro Kas maysa a maestro iti elementaria, kayatko a kablaawan dagiti editor ti Agriingkayo! Ti makaisuro a magasinyo ket makatulong unay iti naan-anay nga edukasion. Us-usarenmi kadagiti padak a mannursuro dagiti nagsayaat nga artikulo a pagibasaran iti pannakisaritami kadagiti estudiante maipapan kadagiti moral a prinsipio ken isyu iti kagimongan. Ti Agriingkayo! ket mangpasayaat iti kinatao ken kalidad ti panagbiag dagiti estudiantemi tapno makaaramidda kadagiti desision a naibasar iti pannakaammo.

F. C., Brazil