No Kasano a Basaenda Dagiti Bibig

BABAEN TI MANNURAT TI AGRIINGKAYO! IDIAY BRITANIA

NAI-VIDEO ti dua a terorista nga agtungtungtong iti pangpubliko a parke. Awan ti nakangngeg iti tungtonganda​—ngem inaresto ida dagiti polis, ket kalpasanna, nasentensiaanda iti adu a tawen a pannakaibalud. Ti nairekord a nagtungtonganda ket binasa ti nalaing nga agbasa iti bibig, a mabigbigbig nga eksperto a saksi idiay Britania ken makuna a “nagsayaat a nalimed nga igam” dagiti polis iti Britania.

Tapno maammuak ti ad-adu pay maipapan iti arte a panagbasa iti bibig, nakipagkitaak kada Mike ken Christina. Tuleng ni Christina sipud pay idi agtawen iti tallo. Idi agangay, nageskuela iti eskuelaan dagiti tuleng, a sadiay a nasursuruan nga agbasa iti bibig. Nakasursuro ni Mike nga agbasa iti bibig a bukodna, maysa a paglaingan a nasursurona kalpasan nga inkallaysana ni Christina.

Kasano karigat ti mangbasa iti bibig? “Masapul a siputam ti sukog ken panaggaraw dagiti bibig, dila, ken ti makimbaba a panga,” kuna ni Mike. Kuna pay ni Christina: “Masapul a mingmingam ti tao a kasarsaritam, ket bayat a lumalaingka nga agbasa iti bibig, siputam met dagiti ekspresion ti rupa ken panaggaraw ti bagi.”

Naammuak a ti maysa kadagiti kadakkelan a kamali ket ti panagriaw wenno ti nalabes a panangigaraw ti tao nga agsasao iti bibigna. Mabalin a makaallilaw dayta a tignay ken saan nga agkurri iti nakairantaanna. Apaman a nalaingkan nga agbasa iti bibig, mailasin pay ketdi ti agbasbasa ti bengngat ti maysa a lugar. Siempre, narigat amin dagitoy! Ibatad ti Hearing Concern, maysa nga organisasion a nalaing nga agisuro iti panagbasa iti bibig: “Iti panagbasa iti bibig, masapul ti patinayon a panagsanay.”

Addada tiempo, inamin ni Christina, a mabainan no maamirisna a dina mapupuotan a “dumdumngeg” iti maysa a saritaan iti bus wenno iti tren. Ti laeng maaramidna ket sabalianna ti kitaenna. Ngem ti abilidadna ket mabalin a proteksion. Saanen nga agbuybuya ni Christina iti soccer iti telebision agsipud ta masansan a masair iti mabuyana nga ibagbaga dagiti umaayam.

Manmano ti agbalinto a nasigo a kas iti “nalimed nga igam” dagiti polis iti Britania. Ngem uray ti simple laeng a panangbasa iti bibig ket mabalin a nagpateg nga arte a patanoren kalpasan ti nakaro a panagtuleng.

[Ladawan iti panid 31]

Christina

[Ladawan iti panid 31]

Mike