Manggun-odka iti Umiso nga Impormasion

Narigat a gun-oden ti umiso nga impormasion maipapan iti nadumaduma nga isyu. Sumagmamano laeng kadagiti napateg a kinapudno wenno impormasion ti ibagbaga dagiti gobierno ken kompania. Masansan nga ikarkari ti media nga awan idumdumana no agipadpadamag, ngem dina tungtungpalen dayta. Saan a kanayon nga ilawlawag a naimbag dagiti doktor dagiti pagdaksan ti agas nga it-itedda kadatayo. Adda aya pamay-an tapno magun-odantayo ti impormasion a mabalin a pagtalkan?

Adu ti nangidayaw iti kaadda ti Internet kas pamuspusan tapno magun-odan dagiti mapagtalkan a gubuayan iti impormasion manipud iti intero a lubong. Siempre, mabalin dayta no ammom no sadino ti pangsapulam iti dayta nga impormasion iti Internet. “No mausig ti kasayaatan a maaramidanna, mabalin a nabibiit ti panangisuro ti Internet iti ad-adu a tattao ngem iti aniaman nga alikamen ti media. Ti kadaksan a pasetna, nabibiit ti panangpakapuyna iti kinasaririt ngem iti aniaman nga alikamen ti media,” kinuna ti maysa nga editorial iti The New York Times.

Intuloy a kinuna ti editorial: “Yantangay adu a tattao ti masmasdaaw iti Internet gapu iti ‘teknolohiana,’ daytat’ ad-adda a patien dagiti saan nga edukado. Dida maamiris a ti kadaksan a paset ti Internet ket kayariganna laeng ti imburnal: maysa nga elektroniko a kanal para kadagiti di napasingkedan, ken di nakorehir nga impormasion.” Nakalkaldaang ta kas iti impatuldo ti mannurat, awan ti aniaman a programa iti computer a mangikkat iti awan serserbina nga impormasion.

Mabalin nga agikabil ti uray asinoman iti uray ania iti Internet, magasin, wenno iti maysa a libro. Isu a rumbeng nga usarentayo ti pannakaawattayo ken suruantayo ti bagitayo tapno ditay agbalin a nalaka a mamatpati iti aniaman a mabasbasatayo. Datayo a mayat a mangammo iti umiso nga impormasion rumbeng a paneknekantayo a mapagtalkan ti nangalaantayo iti impormasiontayo. Mabalin a kasapulan ti panawen. Ngem apaman nga aramidentayo dayta ken manggun-odtayo iti mas kompleto nga impormasion, mabalin a maaddaantayo iti nalimlimbong a panagpampanunot, makapangngeddengtayo a siuumiso, ken makapagtalektayo no agar-aramidtayo iti agkakapateg a desision.