Idi Bimtak ti Planta ti Kemikal

BABAEN TI MANNURAT TI AGRIINGKAYO! IDIAY FRANCIA

IDI Setiembre 21, 2001, sangapulo laeng nga aldaw kalpasan ti pannakarbek ti World Trade Center iti New York, ti nagdakkel nga aksidente a panagbettak ti maysa a planta ti kemikal ti nakaro a nangdadael iti kaparanget ti Toulouse, iti abagatan a laud a Francia. Dayta ti dineskribir ti Pranses a pagiwarnak a Le Point kas “kadaksan a didigra ti industria iti Francia sipud pay idi nagpatingga ti Gubat Sangalubongan II.”

Bimtak ti agarup 300 a tonelada nga abuno, a nangpataud iti abut a 50 a metro ti diametrona ken 15 a metro ti kaunegna. Ti panagbettak ken ti panagdayyegna ti nakatayan ti 30 a tattao ket nakasugatan ti nasurok a 2,200. Agarup 2,000 a pagtaengan ti nadadael, ken 27,000 a dadduma pay nga adda iti 8 a kilometro nga aglawlaw. Rimsua ti panagdanag ken riribuk idi impagarup ti tattao a rimmaut dagiti terorista ket adda napuskol a makasabidong a gas nga impugso ti planta.

Kadagiti Saksi ni Jehova, sumagmamano ti nasugatan gapu iti panagbettak, ken adu ti naapektaran iti nadumaduma a wagas. Ti Nakristianuan nga ayat ti nangtignay kadagiti padada a Saksi tapno tumulongda a dagus. (Juan 13:34, 35) Adtoy ti salaysay ti panangikagumaanda a mangsaranay.

“Narbek ti Intero a Pasdek”

Ni Khoudir ti maysa kadagiti nakalasat nga agtartrabaho iti dayta a planta ti kemikal. Naawanan ti puot gapu iti panagbettak ken kadagiti naipalladaw a rebbek, isu a nanarnar ti pangana ken nagligasi ti tulang ti aliwadangna. Ni Benjamin nga agtartrabaho iti pasdek a kaabay ti planta ti kemikal ket naipuruak iti 3 a metro ti kaadayona a diding ti maysa nga opisina. Nasugatan ti sumagmamano a paset ti bagina gapu kadagiti natnag a sarming ken natudok ti makinkannawan a matana, a nakadadaelan ti panagkitana. “Naimbag laengen ta awanak idi iti lamisaanko,” kinunana. “Agarup 600 a kilo a ladrilio ti naigabur iti tugawko.”

Ni Alain, a maestro iti maysa nga eskuelaan a 200 a metro ti kaadayona manipud iti planta, ket madama idi nga agpaspa-xerox idi napasamak ti panagbettak. Kinunana: “Awan ti nabati iti pasdek, dagiti laeng asero. Narbek nga interamente dagiti diding ken atep. Napuntaanak kadagiti sarming. Napnot’ sugat ti rupak ken kasla nakabil iti batuta.” Nabulsek ti maysa a mata ni Alain ken medio tulengen gapu iti panagbettak.

Napartak a Panangikagumaan a Mangsaranay

Dagiti panglakayen iti 11 a kongregasion dagiti Saksi ni Jehova a naapektaran iti didigra ti dagus a nakiuman iti tunggal miembro ti kongregasion tapno maammuanda dagiti nadunor wenno nadadaelan. Naibaon a dagus dagiti boluntario kadagidiay agkasapulan unay iti tulong. Di nagbayag, naammuanen dagiti boluntario a nadadael ti agarup 60 a balay dagiti Saksi, ket tinulonganda ti agarup sangapulo a pamilia nga umakar. Tinarimaan met dagiti boluntario ti dua a nadadael a Kingdom Hall. Kanayonanna, situtulokda met a timmulong a mangipagna iti insurance.

Agnanaed da Catherine ken Michel iti ballasiw laeng ti planta. Agmanmaneho idi ni Catherine iti kotsena idi oras ti panagbettak. Inlawlawagna: “Idi damo, impagarupmi no agginggined. Sumagmamano la a minuto kalpasanna, nangngegmin nga adda bimtak. Kalpasanna, nakitami a tumaytayoken ti asuk. Napanak iti sangakaarrubaak; kasla paggugubatan dayta. Narbek ti amin a balbalay, ken nabuong ti tawa dagiti paglakuan. Agtataray dagiti tattao iti kalsada. Dadduma ti nakatugaw wenno nakaidda iti kalsada, nga agsangsangit wenno agririaw. Iti balaymi, nalekkab ti amin a tawami  ken uray dagiti hambada, ket awanen ti nabati a rikep ti ridaw. Dagus a tinulongandakami dagiti Kristiano a kakabsatmi. Iti malem, maysa a grupo manipud iti kongregasion ti simmangpet nga addaan kadagiti timba ken walis agraman dagiti plastik a pangserra kadagiti tawa.”

Agnanaed met da Alain ken Liliane iti abay ti planta. Gapu iti panagbettak, naan-anay a nadadael ti apartmentda. “Narbek ti amin,” kuna ni Alain. “Nagbirri dagiti diding ken baldosa, ket nadadael amin a tawa, ridaw, ken muebles. Awan a pulos ti nabati. Dagus nga immay timmulong dagiti Kristiano a kakabsatmi. Dinalusanda dagiti rebbek ken timmulongda met a nangdalus iti dadduma pay nga apartment iti pasdek. Nasdaaw unay dagiti kaarrubami a nakakita a nagadu a tattao ti immay timmulong.” Idi agsapa a napasamak ti panagbettak, immawag ken Alain ti maysa nga iyad-adalanna iti Biblia sana kiniddaw a mapanna iyadalan. Adda met sabali a napanan ni Liliane. Iti kasta, awanda a dua iti pagtaenganda idi napasamak ti panagbettak.

Saan laeng a dagiti miembro ti kongregasion ti tinulongan dagiti Saksi. Kalpasan ti panagtitinnulongda, tinulonganda met dagiti kaarrubada. Dinalusanda dagiti rebbek kadagiti apartment sada sinerraan dagiti nadadael a tawa. Nagyaman unay dagiti kaarruba ken nasdaawda ta awan ti nagpabayad.

Naitukon met ti tulong kadagiti agtuturay, a naladingitan unay iti kaadu dagiti nadadael. Dagiti eskuelaan ken dadduma a pangpubliko a pasdek ket dinalusan dagiti Saksi. Iti maysa a sangakaarrubaan, pinagbalaybalay dagiti lokal nga agtuturay dagiti Saksi a boluntario tapno ammuenda ti kasapulan dagiti tattao.

Panangipaay iti Naespirituan a Tulong

Malaksid iti material a tulong, adu a Saksi iti nakapasamakan ti panagbettak ti agkasapulan iti naespirituan a tulong. Isu a sinarungkaran dagiti agdaldaliasat a manangaywan agraman dagiti lokal a panglakayen amin dagidiay naapektaran iti didigra. Maapresiar unay daytoy a panangandingay. Kinuna ni Catherine: “Sangsangkamaysa a sinaranaydakami dagiti panglakayen. Immaydakami pinaregta. Kinapudnona, dayta ti ad-adda a kasapulanmi ngem iti material a tulong.”

Adda dagiti makaparagsak a komento gapu ta dagus a naipakita ti Nakristianuan nga ayat. Kinuna ti maysa a Saksi a nakaro a nasugatan: “Ditay la ammo no ania ti mapasamak inton bigat. Masapul a kanayon nga agserbitayo ken Jehova a kas man la daytan ti maudi nga aldawtayo.” (Santiago 4:13-15) Kinuna met ti sabali a Saksi: “Amin daytoy ti nakatulong kadakami a mangamiris a di rumbeng nga ipangpangrunatayo dagiti material a banag. Napatpateg nga amang ti kaaddatayo iti ummong ti ili ni Jehova.”

[Ladawan iti panid 14]

Da Benjamin ken Khoudir

[Ladawan iti panid 14]

Ni Alain

[Ladawan iti panid 15]

Ti Toulouse iti kabigatan ti panagbettak

[Credit Line]

© LE SEGRETAIN PASCAL/CORBIS SYGMA

[Ladawan iti panid 15]

Da Alain ken Liliane