Manipud Kadagiti Agbasbasa

Kinapribado Nagustuak ti paulo ti akkub a “Mabibiangan Aya ti Kinapribadom?” (Enero 22, 2003) agsipud ta siak ti autor ti maysa kadagiti kalatakan a libro maipapan iti dayta a suheto. Nagsayaat ti nagapuanan ti mannuratyo. Adtoy ti maysa pay a singasing: No adda agdamag iti kinasiasinom, nalabit kayatmo nga usaren ti pasaportem, a di nakaisuratan ti address ti balaymo wenno ti numerom iti Social Security System.

J. L., Espania

Dagiti Saniata Pagyamanan iti artikulo a “Dagiti Saniata iti Aplaya.” (Enero 22, 2003) Naragsakankami met a kas iti kinaragsak ti mannurat idi nagpidutkami kadagiti shell dagiti biruruko ken kappo. Nakallalagip ti panagkolektami kadagiti shell iti igid ti baybay. Kada kitaenmi dagiti nakolektami, apresiarenmi ti awan kaaspingna nga artistiko a kinasaririt ti Namarsua.

W. ken M. P., Alemania

Sipud pay idi agtawenak iti agarup 12, kaay-ayokon dagiti shell. Kalpasan ti 20 a tawen a panagkolektak kadagitoy, mapnekak kadagiti naurnongkon. Ngem apaman a nabasak daytoy nga artikulo ken naammuak nga adda agarup 50,000 a kita ti moluska, naamirisko a nagbassit dagiti naurnongko, ket ad-addan nga apresiarek dagiti pinarsua ni Jehova.

M. S., Paraguay

Runo a Barko Nagustuak ti artikulo a “Panaglayag Babaen Dagiti Runo a Barko!” (Enero 22, 2003) Iti personal a panagbasak iti Biblia, nadlawko ti Job 9:26. Iti panangdakamatna iti kinaababa ti biag ti tattao, kinunana: “Naggunayda a mapan kas kadagiti runo a barangay.” Pinampanunotmi nga aggayyem no apay nga inyasping ni Job ti ababa a panagbiag ti tao iti runo a barangay. Kalpasanna, nadakamat ti gayyemko a mabalin a tuktukoyen ni Job ti punto a dinakamat met laeng iti artikuloyo​—nga “in-inut a sumagepsep ti danum kadagiti runo” isu a saanen a mabalin nga usaren dagitoy.

N. D., Estados Unidos

Sungbat ti “Agriingkayo!”: Sigun iti maysa a reperensia a libro, tuktukoyen ni Job ti napartak a panaglayag ti kakasta a nalag-an a barangay. No agpayso dayta, kasta met laeng ti mabalin a madakamat a punto​—nga ababa ti biag ti tao.

Dagiti Flamingo Idi inukagmi daytoy a ruar ti Agriingkayo!, nadlawmi ken ni lakayko ti artikulo a “Dagiti Sumasala a Nalabaga ti Dutdotda.” (Enero 22, 2003) Kinuna ni lakayko: “Para kenka daytoy.” Ammona a magustuak dagiti parsua ni Jehova nangruna dagiti nangayed a maris rosas a flamingo. Ar-arapaapek a paliiwen a mismo dagitoy nagpipintas a parsua. Pagyamanan iti daytoy nga artikulo. Pinabaknangnak iti adu a wagas.

M. N., Czech Republic

Panagkusit Sangapulo ket maysa ti tawenko. Nagustuak ti artikulo nga “Agimtuod Dagiti Agtutubo . . . Ania ti Pagdaksan ti Panagkusit?” (Enero 22, 2003) Nupay manmano a maaddaanak kadagiti nangato a grado, ammok a dagiti maal-alak nga iskor ket isu dagiti pudno a nagrigatak. Kinapudnona, nababbaba pay ti grado ti dadduma a kaklasek nga agkuskusit ngem kadagiti gradok! Uray kaskasano, nadalus ti konsiensiak, ket dayta ti kapatgan.

Z. T., Austria

Naruamak idi nga agkusit ta diak ngamin impagarup a nagdakes dayta. Daytoy nga artikulo ti makatulong kaniak a manglagip kadagiti teksto a kas iti Hebreo 13:18, a mangiwanwanto kaniak no masulisogak manen nga agkusit.

N. I., Italia

Addaak iti maikasangapulo a grado. No dadduma, padasek ti agkusit bayat ti eksamen, ta diak pulos ipagpagarup a katupag dayta ti panagtakaw! Ngem gapu iti daytoy nga artikulo, ikagumaakton a pagtalinaeden a nadalus ti konsiensiak.

K. G., Estonia