Inawatko ti Panangmatmat ti Dios Maipapan iti Dara

Isalaysay ti Maysa a Doktor ti Pakasaritaanna

ADDAAK idi iti auditorium ti ospital, a mangilawlawag kadagiti resulta ti maysa nga autopsia iti imatang ti grupo dagiti doktor. Ti natay a pasiente ket addaan iti makapapatay a tumor, isu a kinunak, “Ti makunami a nakaigapuan ti ipapatay daytoy a pasiente ket hemolysis [pannakadadael dagiti nalabaga a selula ti darana] ken ti nakaro a panagpalia ti bekkelna gapu iti adu unay a nayalison a dara.”

Nakapungtot a timmakder ti maysa a propesor sana imbugkaw, “Kayatmo a sawen, di umiso ti dara nga inyalisonmi?” Simmungbatak, “Saan a kasta ti kayatko a sawen.” Idi impakitak ti sumagmamano nga slides wenno ladawan ti sangkabassit a paset ti bekkel ti pasiente, kinunak pay, “Makitatayo ti pannakadadael ti adu a nalabaga a selula ti dara iti bekkel isu a maibagatayo ngarud a daytoy ti nakaigapuan ti nakaro a panagpalia ti bekkel.” * Makapadanag ti kasasaad, ket agnernerbiosak. Nupay maysaak laeng idi nga ubing pay a doktor ket isut’ maysa a propesor, diakon maibabawi ti argumentok.

Idi napasamak daytoy, saanak pay a maysa kadagiti Saksi ni Jehova. Naipasngayak idi 1943 idiay Sendai, maysa a siudad iti makin-amianan a paset ti Japan. Gapu ta maysa a pathologist ken sikiatrista ni tatangko, inkeddengko ti agadal iti kinadoktor. Idi maikadua a tawenko iti kinadoktor, idi 1970, nangasawaak iti balasang nga agnagan iti Masuko.

Inadalko ti Tay-ak ti Pathology

Nagtrabaho ni Masuko tapno masuportarankami  bayat a turturposek ti panagadalko. Kaay-ayok ti tay-ak ti medisina. Masdaawak unay iti wagas a pannakaaramid ti bagi ti tao! Nupay kasta, diak napanunot ti kaadda ti Namarsua. Impagarupko a ti panangsukisok iti medisina ti makaited iti makapnek a panagbiagko. Isu nga idi nagbalinak a doktor, inkeddengko nga ituloy ti panagadalko iti medisina babaen iti panagadalko iti pathology​—ti panagadal iti kasasaad, makagapu, ken epekto ti sakit.

Idi mangar-aramidkami iti autopsia kadagiti pasiente a natay iti kanser, nangrugin nga agduaduaak maipapan iti kinaepektibo ti panangyalison iti dara. Mabalin nga aganemik dagiti pasiente a nakaron ti kanserda kas resulta iti panagpadara. Gapu ta ti chemotherapy pakaruenna ti anemia, masansan a mangyalison iti dara dagiti doktor. Nupay kasta, nagsuspetsaakon a nalabit agwaras laeng ti kanser gapu iti panangyalison. Ngem ita, naammuanen a ti panangyalison iti dara pakapuyenna ti resistensia, a mabalin a mangpakaro iti itataud manen ti tumor ken mangpabassit iti tsansa nga agbiag. *

Idi 1975, naipasangoak iti kaso a nadakamat iti pangrugian. Ti pasiente ket ay-aywanan ti propesor ken espesialista iti hematology. Isu a natural laeng a nakapungtot idi nangngegna nga imbagak a natay ti pasiente gapu iti panangyalison ti dara! Nupay kasta, intultuloyko ti presentasionko, isu nga in-inut a nagkalma.

Awanton ti Sakit Wenno Ipapatay

Iti dayta met la a tiempo, adda baket a maysa kadagiti Saksi ni Jehova a simmarungkar ken baketko. Inusarna ti sao a “Jehova” iti panangasabana, isu a dinamag ni baketko ti kaipapanan dayta. Kinuna ti Saksi a “Jehova ti nagan ti pudno a Dios.” Agbasbasan ni Masuko iti Biblia sipud pay idi ubing, ngem iti us-usarenna a Biblia, nasukatan ti nagan ti Dios iti “APO.” Ita ammonan a ti Dios ket maysa a persona nga addaan iti nagan!

Dagus a rinugian ni Masuko ti nakipagadal iti Biblia iti baket a Saksi. Idi nagawidak a naggapu iti ospital iti agarup ala una ti parbangon, naragsakan ni baketko a nangibaga kaniak, “Kuna ti Biblia nga awanton ti sakit ken ipapatay!” Kinunak, “Nasayaat a no kasta!” Kinunana pay, “Tangay asidegen a dumteng ti baro a lubong, diak kayat a sayangem ti panawenmo.” Impagarupko a kayatna nga isardengko ti kinadoktorko, isu a nakaungetak ket medio naapektaran ti relasionmi.

Ngem saan a simmardeng ni baketko a nangpatanor iti interesko. Buyogen iti kararag, nangbirok kadagiti maitutop a teksto sana impakita kaniak. Dagiti sasao ti Eclesiastes 2:22, 23 ti nangnangruna a nangtukay iti pusok: “Ania ti maaddanto iti maysa a tao maipaay iti isuamin a napinget a panagtrabahona ken maipaay iti panagagawa ti pusona nga iti dayta isu agtartrabaho a sipipinget iti baba ti init? . . . Bayat ti rabii saan latta a makapagidda ti pusona. Daytoy met ket kinaubbaw laeng.” Agaplikar daytoy iti ar-aramidek​—ipampamaysak ti medikal a siensia iti aldaw ken rabii ngem diak makasarak iti pudno a pannakapnek.

Maysa a bigat ti Domingo idi Hulio 1975, napan ni baketko idiay Kingdom Hall dagiti Saksi ni Jehova. Kellaat nga inkeddengko met ti mapan. Nasdaaw ni baketko idi nakitanak sadiay, ket sibabara a pinasangbaydak dagiti Saksi. Sipud idin, Dinomingo a tumabtabunoakon kadagiti gimong. Makabulan kalpasanna, rinugianen ti maysa a Saksi ti nangyadal iti Biblia kaniak. Tallo a bulan kalpasan ti damo nga isasarungkar  dagiti Saksi ni Jehova, nabautisaranen ni baketko.

Panangawat iti Panangmatmat ti Dios Maipapan iti Dara

Di nagbayag, naammuak nga ibagbaga ti Biblia kadagiti Kristiano nga ‘umadayoda iti dara.’ (Aramid 15:28, 29; Genesis 9:4) Tangay agduaduaakon iti kinaepektibo ti panangyalison iti dara, diak narigatan nga immawat iti panangmatmat ti Dios iti dara. * Kinunak, ‘No adda Namarsua ket dayta ti ibagbagana, husto ngarud dayta.’

Naammuak met a ti basol ni Adan ti nakaigapuan ti sakit ken ipapatay. (Roma 5:12) Iti daydi a tiempo, ad-adalek ti maipapan iti arteriosclerosis (nakaro a sakit a pakaigapuan ti ipupuskol ti pannakadiding ti urat isu a saanen nga agbennat). Bayat a lumaklakay wenno bumakbakettayo, tumangken ken umilet dagiti urat, isu a rumsua dagiti sakit ti puso, sakit ti paset ti utek a maawagan cerebrum ken ur-uratna, ken sakit ti bekkel. Nainkalintegan a patien a ti natawidtayo a kinaimperpekto ti makagapu nga agsakittayo. Kalpasan dayta, saanak unayen a naregget iti medisina. Ni laeng Jehova a Dios gayam ti makaikkat iti sakit ken ipapatay!

Idi Marso 1976, pito a bulan kalpasan a rinugiak ti agadal iti Biblia, insardengkon ti panagadalko iti unibersidad ti ospital. Maamakak a diakto manen makapagtrabaho kas maysa a doktor, ngem nakasarakak iti trabaho iti sabali nga ospital. Nabautisaranak idi Mayo 1976. Inkeddengko a ti panagserbi kas amin a tiempo nga ebanghelisador, wenno payunir, ti kasayaatan a pangusarak iti biagko. Rinugiak nga inaramid ti kasta idi Hulio 1977.

Panangikalintegan iti Panangmatmat ti Dios Maipapan iti Dara

Idi Nobiembre 1979, immakarkami ken ni Masuko iti kongregasion ti Chiba Prefecture a sadiay adu ti kasapulan a mangaskasaba. Nakasarakak iti ospital a mabalin a pagtrabahuak iti paset-tiempo. Idi damo nga aldaw ti panagtrabahok, maysa a grupo dagiti siruhano ti immaribungbong kaniak. Kanayon a sinaludsodandak, “Kas maysa a Saksi ni Jehova, ania ti aramidem no adda agpaagas a pasiente a rumbeng a mayalisonan iti dara?”

Siraraem nga inlawlawagko a surotek ti ibagbaga ti Dios maipapan iti dara. Inlawlawagko nga adda dagiti alternatibo iti panangyalison iti dara ket aramidek ti amin a kabaelak a tumulong kadagiti pasientek. Kalpasan ti agarup maysa nga oras a saritaan, kinuna ti hepe ti panagopera, “Maawatak. Ngem no adda dumteng a pasiente a napukawan iti adu a dara, dakami ti mangagas kenkuana.” Ti hepe ti panagopera ket agdinamag a narigat a kalangen, ngem kalpasan dayta a saritaan, simmayaat ti panaglangenmi ket kanayon a raraemenna dagiti patpatiek.

Nasubok ti Panagraemko iti Dara

Idi agserserbikami idiay Chiba, maibangbangon idiay Ebina ti baro a hedkuarter dagiti Saksi ni Jehova ditoy Japan. Nagbiahekami nga agassawa a mapan sadiay iti maminsan iti makalawas tapno maasikaso ti salun-at dagiti Saksi a nagboluntario a mangibangon iti pasilidad a maawagan iti Bethel. Kalpasan ti sumagmamano a bulan, naawiskami nga agserbi iti amin a tiempo idiay Ebina Bethel. Isu nga idi Marso 1981 nagnaedkami kadagiti temporario a pasdek a pagnaedan ti nasurok a 500 a boluntario a trabahador. Iti agsapa, tumulongak nga agdalus iti banio ken kasilias iti lugar a pagibangbangonan, ket iti malem eksaminek dagiti kakabsat.

Ni Ilma Iszlaub, a naggapu iti Australia, ngem immay ditoy Japan kas maysa a misionera idi 1949, ti maysa kadagiti pasientek. Addaan iti leukemia ket imbaga dagiti doktorna a sumagmamano  laengen a bulan ti panagbiagna. Saan a kayat ni Ilma a mayalisonan iti dara tapno umatiddog ti biagna ket kinaykayatna a busbosen ti natda pay nga al-aldaw ti panagbiagna idiay Bethel. Iti daydi a tiempo, awan pay dagiti agas a mangpaadu ti nalabaga a selula ti dara a kas iti erythropoietin. Isu a no dadduma, ti hemoglobin-na ket 3 wenno 4 laeng a gramo! (Ag-12 agingga iti 15 ti normal.) Ngem inaramidko ti amin a kabaelak a nangagas kenkuana. Impakita ni Ilma ti di maisin a pammatina iti Sao ti Dios agingga iti ipapatayna idi Enero 1988​—agarup pito a tawen kalpasanna!

Bayat ti panaglabas dagiti tawen, sumagmamanon a boluntario iti sanga nga opisina dagiti Saksi ni Jehova iti Japan ti masapul a maoperaan. Maapresiar ta nakitinnulong dagiti doktor kadagiti asideg nga ospital babaen ti panagoperada a dida nagusar iti dara. Masansan a naawisak iti siled a pagoperaan tapno agpaliiw kadagiti pamay-an, ken no dadduma, timmulongak pay kadagiti operasion. Agyamanak kadagiti doktor a mangraraem iti takder dagiti Saksi ni Jehova maipapan iti dara. Ti pannakipagtrabahok kadakuada ti nangipaay kaniak iti adu a gundaway tapno mairanudko dagiti patpatiek. Maysa kadagiti doktor ti nabiit pay a nabautisaran kas Saksi.

Makapainteres ta ti panangikagumaan dagiti doktor a mangagas kadagiti Saksi ni Jehova ket dakkel ti naitulongna iti medisina. Ti panagopera a di agusar iti dara paneknekanna dagiti pagimbagan ti di panagpayalison iti dara. Ipakita dagiti panagadal a nabibiit nga umimbag dagiti pasiente ken manmano dagiti parikut kalpasan ti operasion.

Agtultuloyak nga Agsursuro Manipud iti Katan-okan a Mangngagas

Ikagkagumaak ti makiaddang kadagiti kabaruan nga irarang-ay ti medisina. Ngem itultuloyko met ti agsursuro ken Jehova, ti katan-okan a Mangngagas. Saan laeng a ti makinrabaw ti kitaenna, no di ket ti intero a kinataotayo. (1 Samuel 16:7) Kas maysa a doktor, ikagkagumaak nga asikasuen ti intero a kinatao ti maysa a pasiente, saan laeng a ti sakitna. Gapu iti daytoy, nasaysayaat ti maipaayko a panangagas iti pasiente.

Agserserbiak pay laeng ditoy Bethel, ket ti panangtulong iti sabsabali a makaammo ken Jehova​—agraman ti panangmatmatna iti dara​—ti maysa kadagiti pagrag-oak unay. Ikarkararagko a sapay koma ta pagpatinggaenen ti Naindaklan a Mangngagas a ni Jehova a Dios ti amin a sakit ken ipapatay.​—Kas insalaysay ni Yasushi Aizawa.

[Footnotes]

[Blurb iti panid 14]

“Inlawlawagko nga adda dagiti alternatibo iti panangyalison iti dara ket aramidek ti amin a kabaelak a tumulong kadagiti pasientek”

[Blurb iti panid 15]

“Ti panagopera a di agusar iti dara paneknekanna dagiti pagimbagan ti di panagpayalison iti dara”

[Dagiti Ladawan iti panid 15]

Ngato: Agpalpalawagak maipapan iti Biblia

Kannawan: Kaduak ni baketko a Masuko