Tarimaanem a Sitatalged ti Luganmo

Napadasanen ni Kevin isu nga ammonan no kasano a sukatan ti asete iti luganna. Ammona no kasano nga ikkaten ti drain plug iti pagkargaan ti asete, ikkaten ti crankcase, isubli ti plug, sana pairutan. Ngem naminsan, bayat a papairutan ni Kevin ti tornilio babaen ti liabe, naligsay dayta iti ulo ti tornilio. Natalmeganna ti natadem a metal isu a nasugat ti dakulapna. Dakkel ti sugatna isu a kasapulan a madait dayta.

 KAS ken ni Kevin, adu a tattao ti pasaray mangtarimaan kadagiti luganda tapno makaekonomiada laeng. Ngem mabalin nga adda met dadduma pay a pagimbagan ti panangadal kadagiti kangrunaan a pamay-an ti panangmantener ken panangtarimaan. “Iti naminsan a panagbiahek iti adayo, nadadaelan ti luganko,” kuna ti maysa a babai nga agnagan iti Kathy. “Gapu ta nasursurok a tarimaanen ti luganko, natarimaanko a sisiak isu a nakadanonak iti papanak.”

Nalabit kayatmo met a manteneren ken tarimaanen ti luganmo. Ngem kasano a maaramidmo dayta a sitatalged?

Agsakbayka!

Ipangpangrunam koma ti kinatalgedmo. * Kas iti maadaltayo iti pannakadunor ni Kevin, nalakaka a madangran no nailet ti pagtrabahuam wenno agus-usarka iti remienta. Kasano a maliklikam ti madunor? No papairutam ti tornilio babaen ti liabe, siertuem nga umiso ti panangiplastarmo iti dayta. Iyimtuodmo iti bagim, ‘No kumaglis ti remienta, ania ti mapasamak iti imak?’ Masalakniban dagiti imam no barabadam iti rigis wenno agguanteska. Tapno makontrolmo ti puersam, no mabalin saanmo nga iduron no di ket guyodem ti alikamen. Kasta met a no palukayam ti nairut a tornilio, in-inutem laeng a pusiposen. Kanayon a makagunggona dagitoy a prinsipio ti kinamanagsakbay ken umiso a panangkontrol. Dimo liplipatan dagitoy a prinsipio tapno mairingpasmo laeng a dagus ti ar-aramidem!

Masansan a mapasamak dagiti aksidente no padasen ti maysa a tao nga usaren ti remienta iti dina nakaisangratan. Kas pagarigan, marigatan idi ni Tom a mangsukat kadagiti spark plug ti luganna. Apay? Narabaw unay ngamin ti socket ket  masansan a kumaglis iti umuna a plug. Kamaudiananna, nangisulbong ni Tom iti maysa nga ekstension iti nagbaetan ti socket ken ti ratchet. Kalpasanna, nasukatanna ti lima pay a plug iti kapaut a kas met la iti panangsukatna iti umuna​—ken sitatalged a naaramidna dayta! Ania ti maadaltayo? Napateg ti kaadda ti umiso a remienta.

Mabalin a mamermeranka bayat nga agtartarimaanka iti sirok ti luganmo wenno sumirsiripka iti sirok iti dashboard. Kasano a maliklikan dayta? “Agusarka iti mangsalaknib kadagiti matam, kas iti goggles,” kuna ti sangapulo a tawenen a mekaniko a ni Sean. “Iti pagtartrabahuak a talyer,” kunana pay, “masapul nga agusarkami iti kasta a makasalaknib nga alikamen.” Rumbeng nga agusarka met iti pangsalaknib kadagiti matam no agtartrabahoka iti asideg dagiti napeggad a likido, kas iti asido ti bateria.

No agtarimaanka ti sirok ti luganmo, kanayon nga agusarka iti umiso ti pannakadiseniona a suporta ti pangitag-ay wenno jack stand, propesional nga alikamen a pangingato iti lugan, wenno nasarkedan nga abut a pagtarimaanan tapno sitatalged a makapanka iti sirok ti luganmo. Saanka a pulos a sumirok iti luganmo no ti jack laeng ti mangtengtengngel iti dayta. Nadakamat iti libro a giya ti makinkua iti dadduma a lugan no sadino ti rumbeng a pangipuestuam iti jack ken suporta ti jack tapno matengngel dagitoy ti lugan. Ngem agannadka, ta ti kellaat a puersa​—kas iti panangpalukaymo  iti nairut a tornilio​—ti mabalin a manggunay ken mangiligsay iti lugan manipud kadagiti mangtengtengngel iti dayta.

Pananglapped Kadagiti Di Ninamnama a Pasamak

Mabalin a pumudot unay ti dadduma a paset ti luganmo ket talaga a masinitka no sagidem. Kas pagarigan, napudot latta ti danum iti uneg ti radiator iti sumagmamano nga oras uray no medio nabayagen a naiddep ti makina. Dimo ngarud ikkaten ti kalub ti radiator no di pay bimmaaw agingga a mabalinmon a sagiden. Iti dadduma a lugan, automatiko nga agandar ti pannakabentilador ti radiator​—uray no naiddepen ti makina. Tapno saanka a madangran, uksotem ti ground wire manipud iti bateria sakbay a rugiam ti agtarimaan.

Siertuem nga ikkaten dagiti singsing wenno alahasmo, nangruna no agan-andar ti makina. Malaksid a maisab-it dagitoy kadagiti natadol a paset, ti metal nga alahas ket mabalin a pakaigapuan ti pannakakoriente ken mabalin a bumara unay daytoy! Dagiti nalawa a manggas agraman dagiti kurbata, balabal, ken uray ti atiddog a buok ket mabalin a maipulipol kadagiti agan-andar a paset ti lugan.

Uray no ipagarupmo a nalpasen ti trabahom, adda pay maudi a pagannurotan a rumbeng a surotem. “Sukimatem manen ti inaramidmo,” kuna ni Dirk, maysa a mangibabaet kadagiti agpatarimaan ken mekaniko iti talyer nga aduan iti kostumer. “Naminsan,” kunana, “adda mekaniko a nakalipat iti daytoy kalpasan a tinarimaanna dagiti preno. Nagpalia dagiti preno, isu a nagtaray ti lugan agingga iti lamisaanko!”

Panangasikaso Kadagiti Emerhensia

Maysa nga aldaw, nadlaw ni Tom a bimmara unay ti makina ti luganna. Nadadael ti hose, isu a naibus ti danum ti radiator. Babaen ti panangusarna iti duct tape a kanayon nga itugtugotna, temporario a natarimaanna. Tinapalanna ti hose iti tape sana kinargaan ti radiator iti danum a nalaokan iti antifreeze wenno coolant. Kalpasanna, napan gimmatang iti baro a hose iti tiendaan dagiti piesa ti lugan. Paneknekan ti kapadasan ni Tom a masapul a sisasaganaka a kanayon babaen ti panangitugotmo kadagiti pagtarimaan a remienta.

Bayat nga agmanmanehoka, siputam ti aniaman a karkarna nga uni wenno angot. Nadlaw ni Yvonne ti karkarna nga angot manipud iti makina ti luganna. Linukatan ni lakayna ti kalub ti makina iti makinsango a paset ti lugan. Nakitana nga agpuspusitsit ti antifreeze wenno coolant a laok ti danum iti bassit nga abut iti makinngato a paset ti hose ti radiator. Agsipud ta nadlaw da Yvonne ken ni lakayna ti problema sakbay a bimmara unay ti makina, nakapanda iti talyer.

Ania ti rumbeng nga aramidem no madadaelan ti luganmo iti haywey? Umuna, ipaigidmo a dagus ti lugan, no mabalin. Rumbeng nga agtalinaed a naka-seat belt dagiti pasahero iti uneg ti lugan, nangruna dagiti ubbing. No masapul a rummuarka iti luganmo, agtakderka iti adayo manipud kadagiti aglabas a lugan no mabalin. Gangtam ti silaw a pang-emerhensia. Ti pananglukat iti kalub ti makina iti makinsango a paset ti lugan ti mangipakita a nadadaelan ti luganmo. Iplastarmo dagiti replektor wenno dadduma pay a mamakdaar a pagilasinan.

No nakapuy unayen ti bateria ti luganmo, mabalin a kayatmo a pakargaan ti bateriam babaen ti sabali pay a lugan. Ngem laglagipem a dagiti bateria ti lugan ket makapataud iti gas a nalaka a sumgiab. Ti maysa a rissik ket mamagsiggiab iti daytoy a gas, isu a bumtak ken mabalin a maparsiakanka iti makadangran nga asido. Isu a no sika ken ti tumultulong kenka ket agduadua maipapan iti panagpakarga iti bateria, urayem ti tumulong kenka.

Kas nakitatayon, serioso a rebbengen ti panangmantener iti lugan. No tartarimaanem ti luganmo wenno as-asikasuem ti maysa nga emerhensia wenno ar-aramidem laeng ti gagangay a panangmantener, kanayon a laglagipem: Nakapatpateg ti panagannad!

[Footnote]

[Blurb iti panid 21]

Masansan a mapasamak dagiti aksidente no padasen ti maysa a tao nga usaren ti remienta iti dina nakaisangratan

[Kahon/Dagiti Ladawan iti panid 19]

Bambanag a Kanayon Koma nga Adda iti Luganmo

▪ Reserba a pilid ken jack

▪ Jumper cable

▪ Dagiti flare wenno replektor

▪ Dagiti remienta ken goggles

▪ Lente

▪ Ekstra a pagkargaan iti pluido (langis, danum, antifreeze wenno coolant a laok ti danum, brake fluid)

▪ Duct tape

▪ Reserba a fuse

▪ Pagguyod a kable (Palagip: Iti dadduma a lugar, mabalin a maipalubos laeng daytoy iti lisensiado a mangguyod iti nadadaelan a lugan)

▪ Kahon a naurnos a pagikabilan kadagiti remienta ken pagkargaan ti pluido

Mabalin a kayatmo ti agitugot iti dadduma pay a pagtarimaan. Nupay kasta, dadduma nga organisasion ti luglugan a tumulong no adda nadadaelan, dida tarimaanen ti nadadael a lugan no tartarimaanenen ti mismo a makinlugan. No miembroka ti organisasion dagiti addaan iti lugan, ammuem dagiti maipalubos a kita ti panagtarimaan.