Ti Kudilmo​—‘Kasla Pader ti Maysa a Siudad’

Kadagiti siudad idi un-unana, nagaramid dagiti umili kadagiti pangsalaknib a pader tapno saan a makastrek dagiti mangraut a kabusor. Ti pader ti siudad ket nagserbi a baluarte tapno mapasardeng dagiti umad-adani a kabusor ken bangen tapno ti siudad ket masalakniban dagiti mangikanawa. Naparaburan met ti bagim iti pangsalaknib a “pader” nga isu ti kudilmo. Kasano a salaknibannaka ti kudilmo kadagiti mangraut nga elemento?

Naabbongan ti kudilmo kadagiti bakteria ken dadduma pay a nagbabassit nga organismo. Makaimpeksion ken mangpataud iti sakit ti dadduma kadagitoy. Ti kudilmo ket saan laeng a kas iti kalasag. Paksiatenna met dagiti mangraut babaen ti panangpataudna kadagiti kontra mikrobio a protina, wenno peptide, nga agserbi kas mangikanawa. Kanayon a sisasagana ti dadduma kadagitoy. Dadduma ti agparang iti rabaw ti kudil no nadunor wenno nasugattayo.

Ti natakuatan nga umuna a dua a grupo dagiti kontra mikrobio a peptide, a maawagan iti defensin, ken cathelicidin ket napaneknekan a sisasagana a mangikanawa. Dagita a dua a grupo ti agpadpada nga iruar dagiti selula iti makinrabaw a paset ti kudil no nadunor wenno imbal. Patayenda dagiti mangraut babaen ti panangabutda iti kulapot dagiti selula a mangraut.

Idi 2001, natakuatan ti maysa a grupo dagiti managsukisok iti University of Tübingen, Alemania ti sabali pay a kita ti protina a kontra mikrobio. Maawagan dayta iti dermicidin. Kanayon a sisasagana dayta nga agtignay. Saan a kas iti dua pay a grupo, ti dermicidin ket patauden dagiti glandula ti ling-et iti nasalun-at a kudil. Di pay naammuan no kasano nga agkurri daytoy a protina. Ngem gapu ta makatulong ti panagling-et tapno mapaksiat dagiti sakit, nalabit dayta ti mangilawlawag no apay a nalaklaka a maimpeksion ken aggudgod ti tattao a nalabes ti panangdalusda iti bagida.

Kas iti pader ti siudad idi un-unana, ti kudiltayo ket maysa a bangen kadagiti mangraut a kabusor. Sigurado nga umanamongka iti imbaga ti salmista: “Anian a nagadu ti aramidmo, O Jehova! Isuda amin inaramidmo buyogen ti kinasirib.”​—Salmo 104:24.