Agimtuod Dagiti Agtutubo . . .

Apay nga Ipalpalubos ti Dios nga Agsagabatayo?

“Ti Dios ket adda idiay langit. Nagsayaat ti amin a kasasaad sadiay, idinto ta agsagsagabatayo ditoy daga.”​—Mary. *

NAIPASNGAY dagiti agtutubo ita iti naulpit a lubong. Kasla gagangayen dagiti makadidigra a ginggined ken natural a didigra a mangkeltay iti biag ti rinibu. Masansan a dagiti gubat ken panangraut dagiti terorista ti linaon ti damdamag. Gapu iti sakit, krimen, ken aksidente, maulilatayo kadagiti ay-ayatentayo. Para ken ni Mary a nadakamat iti ngato, naapektaran unay iti dakes a napagteng kenkuana. Nasaem ti nasaona kalpasan a natay ni tatangna.

No madidigratayo a mismo, gagangay laeng a maupay, mariknatayo a napukawantayo, wenno makapungtottayo pay ketdi. ‘Apay a masapul a mapasamak daytoy?’ mabalin a pampanunotem. ‘Apay a siak?’ wenno ‘Apay nga itatta?’ Makasapul dagita a saludsod kadagiti makapnek a sungbat. Ngem tapno maammuantayo dagiti umiso a sungbat, masapul a mapantayo iti umiso a gubuayan. Wen, kas iti napaliiw ti agtutubo nga agnagan iti Turrell, no dadduma, ‘nasaktan unay dagiti tattao isu a didan usigen a naimbag dagiti bambanag.’ Mabalin ngarud nga ikagumaam ti agkalma tapno makapanunotka iti nainkalintegan ken nasin-aw.

 Panangakseptar Kadagiti Nakalkaldaang a Kinapudno

Mabalin a di makaay-ayo a panunoten, ngem talaga a ditay maliklikan ti matay ken agsagaba. Umiso ti inyebkas ni Job idi kinunana: “Ti tao, a nayanak manipud babai, ababa ti biagna ken namelmelan iti pannakariribuk.”​—Job 14:1.

Ikari ti Biblia ti baro a lubong a “pagnaedan ti kinalinteg.” (2 Pedro 3:13; Apocalipsis 21:3, 4) Ngem sakbay a pumayso dagita a kasasaad, masapul a mapasaran ti sangatauan ti kakaruan a kinadakes. Kuna ti Biblia: “Ammuem daytoy, a kadagiti maudi nga aldaw dumtengto dagiti napeggad a tiempo a narigat a pakilangenan.”​—2 Timoteo 3:1.

Kasano kapaut dagitoy narigat a tiempo? Kasta met laeng ti inyimtuod idi dagiti adalan ni Jesus. Ngem ni Jesus ket saan a nangted kadakuada iti espesipiko nga aldaw wenno oras ti panagpatingga daytoy dakes a sistema ti bambanag. Imbes ketdi kinuna ni Jesus: “Ti nakapagibtur agingga iti panungpalan isunto ti maisalakan.” (Mateo 24:3, 13) Paregtaennatayo ti sasao ni Jesus a matmatantayo ti bambanag sigun iti mapasamak iti masanguanan. Masapul a sisasaganatayo nga agibtur iti adu a di makaay-ayo a kasasaad sakbay a dumteng ti panungpalan.

Ti Dios Aya ti Mapabasol?

Nainkalintegan aya ngarud a makaungetka iti Dios agsipud ta ipalpalubosna ti panagsagaba? Saan, no panunotem nga inkari ti Dios a pagpatinggaennanto ti amin a panagsagaba. Di met nainkalintegan a panunoten a nakem ti Dios dagiti mapaspasamak a dakes a bambanag. Ti adu a nakalkaldaang a pasamak ket bunga laeng dagiti naiparna a pasamak. Panunotem kas pagarigan a natumba ti maysa a kayo gapu iti napigsa nga angin ket nadangran ti maysa a tao. Mabalin nga ipapan ti tattao a nakem ti Dios daytoy a pasamak. Ngem saan a ti Dios ti nangtumba iti kayo. Tulongannatayo ti Biblia a mangtarus a dagita ket nakalkaldaang laeng a resulta ti “tiempo ken ti di mapakpakadaan a pasamak.”​—Eclesiastes 9:11.

Ti panagsagaba ket mabalin met a gapu iti di umiso a pannakaawat ken panagdesision. Ipapantayon nga adda grupo dagiti agtutubo a nagiinum sada nagmaneho. Adda nakaro nga aksidente a napagteng kadakuada. Asino ti mapabasol? Ti Dios? Saan, inapitda laeng dagiti bunga ti di umiso a panagdesisionda.​—Galacia 6:7.

‘Ngem saan kadi a mannakabalin-amin ti Dios isu a kabaelanna a pagpatinggaen ti amin a panagsagaba ita?’ mabalin nga iyimtuodmo. Kasta ti pinampanunot ti dadduma a matalek a tattao idi panawen ti Biblia. Kastoy ti inyimtuod ni mammadto Habakuk iti Dios: “Apay a kitaem dagidiay makilanglangen a sigugulib, nga agulimekka no daydiay nadangkes alun-onenna daydiay nalinlinteg ngem isu?” Nupay kasta, saan a dagus a nagkonklusion ni Habakuk. Kinunana: “Agsiputakto, tapno kitaek no ania ti sawennanto babaen kaniak.” Idi agangay, impanamnama ti Dios kenkuana nga iti “naituding a tiempo,” pagpatinggaenna ti panagsagaba. (Habakuk 1:13; 2:1-3) Masapul ngarud nga aganustayo ken urayentayo a pagpatinggaen ti Dios ti kinadakes iti intudingna a tiempo.

Dimo koma ipapan a dagus a kayat sa ketdi ti Dios nga agsagabatayo wenno isu a mismo ti mangsubsubok kadatayo. Agpayso a ti panagsagaba pataudenna dagiti kasayaatan a kalidadtayo ken ibagbaga ti Biblia a dagiti pakasuotan nga ipalpalubos ti Dios ti manggugor iti pammatitayo. (Hebreo 5:8; 1 Pedro 1:7) Kinapudnona, agbalin a naan-anus wenno naas-asi ti adu a tattao a makapasar kadagiti suot wenno nakalkaldaang a kapadasan. Ngem ditay koma ipapan a nakem ti Dios ti panagsagabada. Ti kasta a kapanunotan dina ikabilangan ti ayat ken kinasirib ti Dios. Nalawag nga ibagbaga ti Biblia: “No adda iti sidong ti pannakasuot, awan koma ti agkuna: ‘Susuotennak ti Dios.’ Ta iti dakes a bambanag saan a mabalin a suoten ti Dios ket isu saanna met a suoten ti asinoman.” Iti kasumbangirna, aggapu iti Dios ti “tunggal naimbag a sagut ken tunggal naan-anay a rangkap”!​—Santiago 1:13, 17.

No Apay nga Ipalpalubos ti Dios ti Kinadakes

Nagtaudan ngarud ti kinadakes? Laglagipem nga adda dagiti bimmusor iti Dios​—kangrunaanna “daydiay naawagan iti Diablo ken Satanas, a mangyaw-awan iti intero a mapagnaedan a daga.” (Apocalipsis 12:9) Insaad idi ti Dios ti immuna a dadakkeltayo a da Adan ken Eva iti lubong nga awanan parikut. Ngem impapati ni Satanas ken ni Eva a nasaysayaat ti pagbanaganna no di agpaituray iti Dios. (Genesis 3:1-5) Nakalkaldaang ta pinati ni Eva dagiti kinaulbod ni Satanas ket sinukirna ti Dios. Nakikadua ni Adan kenkuana iti daytoy nga iyaalsa. Ania ti nagbanaganna? “Ti ipapatay nagsaknap iti amin a tattao,” kuna ti Biblia.​—Roma 5:12.

 Imbes a dagus a lapdanna daytoy nga iyaalsa babaen ti panangdadaelna ken ni Satanas ken kadagiti pasurotna, nakita ti Dios a maitutop no palubosanna nga aglabas ti tiempo. Ania ti ibanag dayta? Ti maysa ket, maibutaktak nga ulbod ni Satanas! Iti kasta maurnong dagiti ebidensia a bin-ig a pannakadadael ti ibunga ti di panagpaituray iti Dios. Saan kadi a kasta ti mapaspasamak? “Ti intero a lubong adda iti pannakabalin daydiay nadangkes.” (1 Juan 5:19) Kanayonanna, “ti tao dinominaranna ti tao iti pakadangrananna.” (Eclesiastes 8:9) Agsisimparat ti pannursuro dagiti relihion iti sangatauan. Nakababbaba unayen ti moralidad. Pinadasen dagiti natauan a gobierno ti amin a mapanunotda a panangituray. Pirmaanda dagiti tulagan ken ipatungpalda dagiti linteg, ngem kaskasdi a saan a mapennek dagiti kasapulan ti tattao. Dumegdeg pay ti rigat gapu kadagiti gubat.

Nalawag a masapul a bumallaet ti Dios ken pagpatinggaenna ti kinadakes! Ngem mapasamak laeng daytoy iti naikeddeng a tiempo ti Dios. Agingga iti dayta a tiempo, pribilehiotayo a suportaran ti panangituray ti Dios babaen ti panagtulnogtayo kadagiti linteg ken prinsipiona a nailanad iti Biblia. No mapasamak ti dakes a bambanag, maliwliwatayo iti sigurado a namnama nga agbiagtayto iti natalna a lubong.

Ditay Agmaymaysa

Ngem no datayo a mismo ti agsagaba, mabalin nga iyimtuodtayo, ‘Apay a siak?’ Nupay kasta, palagipannatayo ni apostol Pablo a saan a datdatayo ti agsagsagaba iti dakes. Imbaga ni Pablo a ti “intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa agingga ita.” (Roma 8:22) Makatulong kadatayo daytoy a kinapudno tapno maibturantayo ti panagsagaba. Kas pagarigan, nasaem ti rikna ni Nicole gapu iti panangraut dagiti terorista idi Setiembre 11, 2001, idiay New York City ken Washington, D.C. “Maaliaw ken mabutengak idi,” admitirenna. Ngem bayat a binasana dagiti salaysay no kasano a nadaeran dagiti padana a Kristiano dayta a trahedia, nagbalbaliw ti panangmatmatna. * “Naamirisko a saanak a pulos nga agmaymaysa. In-inut a nailiwliwagko ti saem ken ladingitko.”

Iti dadduma a kasasaad, nainsiriban no agbirokka iti mabalinmo a kasarita​—ni tatang wenno nanangmo, nataengan a gayyem, wenno Kristiano a panglakayen. Iyebkasmo ti riknam iti daydiay pagtalkam tapno maparegtaka kadagiti “naimbag a sao.” (Proverbio 12:25) Kastoy ti malagip ti maysa nga agtutubo a Kristiano a taga Brazil: “Siam a tawenen a naulilaak iti ama, ket ammok nga addanto aldaw nga isut’ pagungaren ni Jehova. Ngem nakatulong kaniak ti panangisuratko kadagiti riknak. Kasta met nga imbagak ti riknak kadagiti Kristiano a gagayyemko.” Addaanka aya kadagiti ‘pudno a kakadua’ a mabalinmo a pangibagaan iti riknam? (Proverbio 17:17) No kasta, aprobetsarem ti naayat a tulongda! Dika bumdeng nga agsangit wenno mangyebkas iti riknam. Ngamin, uray ni Jesus ‘nagarubos dagiti luana’ gapu iti nakalkaldaang nga ipapatay ti maysa a gayyemna!​—Juan 11:35.

Ipanamnama ti Biblia kadatayo nga iti masanguanan, ‘mawayawayaantayo iti pannakaadipen iti panagrupsa’ tapno tagiragsakentayo ti “nadayag a wayawaya ti annak ti Dios.” (Roma 8:21) Sakbay dayta, adu a nasingpet a tattao ti mabalin nga agsagaba. Sapay koma ta naliwliwaka a nangammo no apay a mapaspasamak ti kasta a panagsagaba ken asidegen nga agpatingga dayta.

[Footnotes]

[Ladawan iti panid 14]

Mabalin a makatulong no iyebkasmo ti ladingitmo