Manipud Kadagiti Agbasbasa

Langis Kayatko ti agyaman gapu iti serye ti Nobiembre 8, 2003 a “Langis​—Maibusto Ngata?” Ita pay la a nakakitaak iti nakaam-amak nga estadistika a dinakamatyo maipapan iti nayubo a langis. Isu met la gayam a dakes ti kasasaad ti daga gapu kadagiti aramid ti tao a kas iti daytoy! Gapu iti dayta, segseggaak ti masanguanan inton mamimpinsanen a dalusan ni Jehova ti amin a banag ken pagbalinenna ti daga a paraiso!

T. T., Estados Unidos

Nagsayaat ken di mangidumduma ti pannakaputar dagiti artikulo. Nupay nagturposak iti kinadoktor iti pisika iti tay-ak ti inhenieria a mangikeddeng iti panagsasaganad ti panangaramat ken panagpili kadagiti alikamen a kasapulan tapno mapartuat ti maysa a produkto, ita pay la a naammuak ti teoria a saan a timmaud ti langis iti panagrupsa dagiti sibibiag a banag. Kadawyanna, ti laeng teoria a timmaud ti langis kadagiti sibibiag nga organismo ti maisursuro.

E. B., Francia

Ages-eskuelaak iti teknikal a kolehio ken marigatanak nga agbirok kadagiti libro nga addaan iti tsart a mangilawlawag kadagiti mekanismo ti makina. Dayta ti gapuna a nagustuak ti tsart a mangipakita no kasano ti pannakapataud ti langis. Dayta ti nakatulong tapno ti artikulo ket nalaka a maawatan.

M. I., Japan

Ad-adu pay koma ti sinirarakyo maipapan iti artikuloyo. Nalipatanyo a dinakamat a ti kaunaan a komersial a bubon ti langis iti Amianan nga America ket kinali ni James Miller Williams idiay Ontario, Canada​—makatawen sakbay a nakali ti bubon ni Edwin Drake idiay Titusville, Pennsylvania, E.U.A.

G. Y., Canada

Sungbat ti “Agriingkayo!”: Adda dakkel a debate maipapan iti daytoy a banag. Ti maysa a geologo iti langis a nagsurat iti artikulo maipapan iti langis ti nangibaga iti “Agriingkayo!” a “kontrobersial unay” ti ayan ti kaunaan a bubon. Dayta ti gapuna a kastoy ti pananggupgop ti “The Canadian Encyclopedia”: “Agpadpada nga imbaga da Williams ken E. L. Drake iti Pennsylvania nga isuda ti nangkali iti kaunaan a bubon ti langis iti A[mianan] nga America.”

Geograpia Kas sangapamiliaan, kaay-ayomi dagiti artikulo maipapan iti geograpia. Isu a nagustuanmi ti artikulo a “Ti Dakkel nga Amazon​—Pagbibiagan ti Minilion.” (Nobiembre 8, 2003) Nupay inadalmi ti maipapan iti Amazon idiay eskuelaan, saanmi a naamiris nga “iti 30 a segundo laeng, mapennekna ti danum a kasapulan ti sangatauan iti maysa nga aldaw”! Maragsakankami ta gapu kadagita nga artikulo, “makapasiarkami” kadagiti adayo a lugar.

V. G., Slovakia

Pagyamanan iti nagpintas nga artikulo a “Prague​—Umaymo Pasiaren ti Historiko a Gamengmi.” (Nobiembre 8, 2003) Makaparagsak a basaen ti maipapan iti daytoy historiko a siudad​—a kas man la literal nga addaak sadiay! Pagyamanan met kadagiti nagpipintas a ladawan.

L. Z., Russia

Idiay eskuelaan, natudingankami a mangiladawan iti siudad iti wagas a makagutugot ti ipapan sadiay. Nagsuratak iti salaysayko a naibasar iti artikulo maipapan iti Prague ket nagun-odak ti kangatuan a grado iti klasemi. Pagyamanan!

O. C., Francia

Dagiti Di Kapammatian a Kakabagian Pagyamanan gapu iti artikulo a “Ti Panangmatmat ti Biblia: No Saanmo a Kapammatian Dagiti Ay-ayatem.” (Nobiembre 8, 2003) Kas ti kakaisuna a Kristiano iti pamilia nga addaan iti innem nga annak, adun a tawen nga ikagkagumaak ti agbalin a natimbeng iti panangtaming iti daytoy a kasasaad. Nalawlawaganak unay kadagiti teksto iti daytoy nga artikulo!

R. G., Estados Unidos

Nabiit pay a nangrugiak a nakipagadal iti Biblia. Ngem aniaman ti naadalko, ikagkagumaak nga iranud kadagiti ay-ayatek a diak kapammatian. Gapu ta agtawenak laeng iti 16, saan nga ipalubos ti pamiliak nga agbautisarak, ngem namnamaek nga addanto aldaw nga agbautisarak. Daytoy nga artikulo makatulong kaniak a makilangen iti pamiliak.

J. G., Estados Unidos