Manipud Kadagiti Agbasbasa

Buis Iti napalabas a sumagmamano a lawas, agsirsirarakak maipapan iti buis. Rimsua dagiti saludsod a kas iti, Kasano a napataud ti pamay-an ken pagannurotan iti panagbayad iti buis? Addaak iti katengngaan daytoy a panagsirarak idi naawat ni baketko ti Disiembre 8, 2003, a ruar ti Agriingkayo! nga addaan iti serye a, “Dakkel Unay Kadi ti Buismo?” Nasdaawak ta sinalaysayna ti dadduma kadagiti mismo nga isyu a sirsirarakek.

S. Y., Tajikistan

Panangyalison iti Dara Maysaak a doktor ken amin tiempo a managebanghelio. Agyamanak unay ta impablaakyo ti pakasaritaan ni Yasushi Aizawa nga “Inawatko ti Panangmatmat ti Dios Maipapan iti Dara.” (Disiembre 8, 2003) Ti kapadasanna ket umasping unay iti kapadasak ta masapul met a pagbalinek ti panangagas a maikadua laeng iti panagbiagko. Nalabit maam-ammokto ni Kabsat Aizawa idiay baro a lubong ti Dios, a sadiay awanton ti trabahomi kas doktor. Saanton a kasapulan dagiti doktor sadiay!

A. S., Ecuador

Idi Oktubre 2002, nadayagnos nga adda kanser ti buridek a balasangmi. Narigat ti panangagas. Namindua a naopera, naipasidong iti chemotherapy, ken radiation therapy. Bayat dayta a tiempo, inkagumaanmi a tungpalen ti bilin ti Biblia nga umadayokami iti dara. Narigat daytoy agsipud ta ditoy Lithuania, mayalisonan iti dara ti dandani amin nga ubbing a maipasidong iti chemotherapy. Ti artikulo nga “Inawatko ti Panangmatmat ti Dios Maipapan iti Dara” ti nangpabileg kadakami a mangitandudo iti panangmatmat ni Jehova. Ita, temporario a napukawen dagiti sintoma ti kanser ti anakmi.

M. ken S. D., Lithuania

Panagrinnibal ti Agkabsat Kayatko nga iyebkas ti napasnek a panagyamanko gapu iti artikulo nga “Agimtuod Dagiti Agtutubo . . . Kasano a Maliklikak ti Kinalatak ti Kabsatko Tapno Makaaramidak iti Bukodko a Pakabigbigan?” (Nobiembre 22, 2003) Agtawenak iti 16, ket para kaniak, kasla kanayon a ni manangko ti maas-asikaso. Siempre, ammok a maseknan ni Jehova kaniak, ngem kaskasdi a nalidayak. Daytoy nga artikulo ti nangilawlawag iti riknak. Ket gapu ta nakaas-asi ti pannakaisalaysayna, uray la a nakasangitak bayat a basbasaek dayta. Pagyamanan kadagiti makatulong a pammagbagayo. Dayta ti nangpikapik iti pusok.

M. O., Japan

Pasaray mariknak ti narikna ti amin nga agtutubo a nadakamat iti artikulo. Sipud pay idi addan nakemko, kanayon a maibilang a mapagwadan ni manangko. Isu nga ammok ti panagrikna no kanayon a maidiligka iti maysa a miembro ti pamiliam. Ti kinunayo a takuatek dagiti paglaingak ket kas “kadagiti mansanas a balitok kadagiti kitikit a pirak”​—sasao a dimteng iti umiso a tiempo.​—Proverbio 25:11.

S. T., Estados Unidos

Adda manangko ken adiek a lalaki. Iti kaaduan a benneg, nalalaingda ngem siak. Isu nga impangagko ti balakadyo, ket agsursuroak itan iti Espaniol ken masansanen a mangasabaak. Maay-ayatanak nga agad-adal​—ket madmadlawdak metten dagiti tattao.

H. B., Estados Unidos

Pagbanagan ti Uniberso? Iti artikulo a “Siensia ti Relihionko Idi” (Setiembre 22, 2003), kasla saan nga ammo ni Kenneth Tanaka ti patpatien dagiti sientista nga agtultuloy ti ilalawa ti uniberso iti agnanayon.

R. G., Estados Unidos

Sungbat ti “Agriingkayo!”: Saan nga agtutunos dagiti kosmologo iti kapanunotanda. Kas pagarigan, dadduma ti mangisingasing a ti proseso ti ilalawa ket bumannayat inton agangay, sumardeng ken agbalbaliwto agingga a marbek ti uniberso. Nangdakamat ni Kenneth Tanaka kadagita a pagarup ngem awan ti intandudona kadagita. Ti panggep ti imbagana ket tapno ipaganetget ti panagbirokna iti panggep ti biag gapu ta saan a maipaay ti siensia ti amin a sungbat.