Tulong ken Salaknib Kadagiti Agtutubo
Tulong ken Salaknib Kadagiti Agtutubo
MAKAPALADINGIT no ti maysa a tin-edyer—a maysa pay la nga ubing—ket agsikog ngem di pay naikasar. Nupay kasta, nagadu ti agsikog kadagiti tin-edyer, ket no dadduma, maapektaran ti amin a tao. Ti makapaladingit a panagsikog dagiti tin-edyer ket maysa laeng a pammaneknek nga umiso ti bilin ti Dios nga: “Adaywanyo ti pannakiabig.”—1 Corinto 6:18.
Ngem no maminsan, ti maysa a tin-edyer a nasursuruan iti daldalan ti Dios kaykayatna a di ikankano wenno di suroten ti ammona a naimbag. Makidenna isu nga inton agangay, agsikog. Ania ti aramiden dagiti pudno a Kristiano? No ipakpakita ti kasta a naglabsing a tin-edyer nga isut’ agbabbabawi, siaayat koma a tulongan ken saranayen dagiti dadakkelna ken ti dadduma pay a miembro ti kongregasion Kristiano.
Usigem manen ni Nicole. Padpadakkelen idi ti dadakkelna tapno agbalin a maysa kadagiti Saksi
ni Jehova. Talaga ngarud a makapadanag idi nagsikog a di pay naikasar. Ngem malagip ni Nicole, “Dumagas idi dagiti padak a Kristiano iti balaymi ket padasendak a paregtaen nga agadal iti Biblia ken umadani ken ni Jehova.”Talaga a saan nga anamongan dagiti Saksi ni Jehova ti seksual nga imoralidad. Ngem bigbigenda a babaen ti panangyaplikar kadagiti prinsipio ti Biblia, mabalin nga “agbalbaliw” dagiti nakabasol. (Roma 12:2) Natibker ti pammatida a pakawanen ti Dios dagiti nakabasol nga agbabbabawi. (Efeso 1:7) Ammoda met nga uray no bastardo ti naipasngay nga ubing, awan basolna iti kasta a napasamak. Isu nga imbes nga ibabain ti kasta nga ubing, ipateg, dungnguen, ken kaasian dagiti miembro ti kongregasion Kristiano a kas met iti aramidenda iti dadduma nga ubbing iti ummongda.—Colosas 3:12.
Rinugian ti maysa nga agsolsolo nga ina ti nakipagadal iti Biblia kadagiti Saksi ni Jehova. Dagus nga inawatna ti mensahe ti Biblia ken binalbaliwanna ti kabibiagna. Kinunana maipapan kadagiti Saksi: “Aminda ti nangipakita iti pudno a pannakaseknan kadakami nga agiina. Nangtedda iti taraon ken kawes no kasapulan agraman gastosenmi. Idi kualipikadoakon a mangasaba a kadua dagiti Saksi ni Jehova, inaw-awirda ti anakko. Inkagumaanda ti timmulong kaniak tapno mapatanorko ti pudno a panagayat ken Jehova.”
Pananglapped
Kaskasdi, nasaysayaat no iti damo pay laeng ket matulonganen dagiti agtutubo a mangliklik kadagita a parikut. Ikagkagumaan ngarud dagiti Saksi ni Jehova a pagbalinen a naragsak ken naayat ti panaglalangenda a sangapamiliaan. Imbes a butbutngenda laeng ida—tapno pagamkanda ti maaddaan iti AIDS wenno agsikog—ikagkagumaan dagiti Saksi nga ipasagepsep kadagiti agtutubo ti pudno a panagayat ken ni Jehova a Dios ken kadagiti lintegna. (Salmo 119:97) Patienda a masapul a maisuro kadagiti annak ti umiso nga impormasion maipapan iti sekso. Ti napatpateg pay, patienda a manipud iti kinamaladaga, masapul a maisuro kadagiti annak dagiti moral a prinsipio a nailanad iti Biblia. (2 Timoteo 3:15) Adda maang-angay a panangisuro kadagiti lokal a Kingdom Hall dagiti Saksi ni Jehova. Nupay kasta, maiparparegta met kadagiti Saksi a nagannak nga iyadalanda iti Biblia dagiti annakda. Dagiti literatura, a kas iti libro a Dagiti Saludsod nga Iyimtuod Dagiti Agtutubo—Dagiti Sungbat nga Epektibo a naimaldit tapno tumulong kadagiti nagannak a mangipaay iti moral a pannarabay kadagiti annakda. *
Ti panangannurot kadagiti nainget a moral a pagalagadan ti Biblia ket naiduma unay iti imoralidad nga agraraira iti lubong. Ngem dayta ti wagas ti panagbiag a mangilisi iti minilion a babbalasitang iti nakalkaldaang a trahedia a panagsikog dagiti tin-edyer.
[Footnote]
^ par. 8 Impablaak dagiti Saksi ni Jehova.
[Ladawan iti panid 12]
Dagiti pudno a Kristiano kaasian ken igagada dagiti di naikasar nga inna