Napintas ken Naimas!

PASIAREM ti hardin ti sabsabong, ket insigida a maragsakanka a makakita iti kolor, sukog, ken dagiti narikut a disenio dagiti sabong. Maangotmo ti kinabangloda. Mariknam ti agsasabali a kinalukneng dagiti petaloda. Ngem ti ngay panagramanmo? Magustuam met kadi ti raman dagiti sabong? Iti dadduma a pagilian, sinigsiglon a magustuan ti tattao ti raman dagiti makan a sabong. No addaanka iti maysa kadagiti sumaganad a sabong iti hardinmo, mabalin a magustuam met dayta. *

Ti Romantiko a Rosas

Iti intero a lubong, nalabit ti rosas (genus Rosa) ti sabong a kalatakan ken magustuan ti kaaduan a tattao. Malaksid kadagiti kangrunaan a kita, adda rinibun a kita ti rosas. Gapu ta ti ramanda ket maapektaran kadagiti kasasaad kas iti daga ken temperatura, maibalakad a ramanam nga umuna ti petalo ti rosas wenno ti aniaman kadagiti dadduma pay a sabong sakbay nga ikeddengmo a kanen dayta. Nalabit madlawmo a medio napait ti makimbaba a paset ti petalo. No kasta, putdem dayta a paset, wenno no idasarmo ti intero a sabong, kanem laeng ti makinruar a pasetna.

Nagadu ti putahe a mabalin a pakailaokan dagiti rosas. Padasem ida kadagiti salad, laokam bassit iti keso ken naiwa-iwa a nuez. Usarem dagiti nalusak a petalo dagiti nalabaga a rosas kas kanayonan a ramen ti paboritom a sarsa tapno naimas ken namaris. Ket ti ngay panangarkosmo iti linutom nga spaghetti iti petalo ti rosas a naiwa-iwa iti pino? Dagiti rosas paimasenda met ti sorbetes ken ti paboritom nga inumen.

Ti Sabong ti Karabasa

Napetsaan idi maika-16 a siglo dagiti pammaneknek a ti sabong ti karabasa (Cucurbita pepo) ket pagtaraon dagiti umili ti kontinente ti America. Kas kadagiti Katutubo nga Americano, kanenda laeng ti kalalaki a sabong (dagidiay atiddog ken narapis ti ungkayna) tapno mapalubosan ti kababai a sabong (dagidiay rimmusingan ti nagbassit a karabasa) nga agbunga. Sakbay a lutuem dagiti sabong, ikkatem dagiti nabudo a bulongna. Mabalin met nga ikkaten wenno ibati dagiti pistil wenno pagkaptan ti pollen. Kadagiti kangrunaan a putahe ken sopas, ti kalkalainganna a raman ti sabong ti karabasa ket nagimas nga ilaok iti lana ti olibo, naganus a mais, ken iti karabasa a mismo. Tapno nanannanam, igisam dagiti sabong iti sibuyas, bawang, dadduma pay a yerba, ken rekado a kayatmo. Mabalinmo met a selselan dagiti sabong iti naglalaok a keso, sibuyas, ken yerba. Kalpasanna, pagkaemem ti murdongna, ken isawsawmo dagiti sabong iti nabatil nga itlog. Kamaudiananna, idennetmo dagiti sabong iti namekmek a tinapay, ipritom, ket magustuamto ti ramanda!

Ti Namaris a Garden Pansy

Mailasin dagiti dua wenno tallo ti kolorda a garden pansy (Viola wittrockiana) babaen kadagiti natayengteng a labang kadagiti petalona isu a karkarna ti langa dagitoy. Sigun iti Encyclopædia Britannica, ti garden pansy ket masansan a maipagarup a maimulmula a kita ti wild pansy, wenno Johnny-jump-up (Viola tricolor), a maris  lila, puraw, ken duyaw. Naimas met daytoy nga atap a sabong, ngem sigun iti libro nga Edible Flowers​—From Garden to Palate, “mabalin a makasabidong no makaaduka.” Ad-adda a paimasen ken papintasenna dagiti salad a nateng ken prutas. Usarem ti intero a sabong, ken ilaokmo a dagus dayta sakbay nga idasarmo ken kalpasan a nanayonan iti aniaman a sarsa a buklen ti lana, suka, sibuyas, parsley, ken yerba. Mabalinmo met nga ilaok dayta iti paboritom a sopas.

Ti maikatlo a masida a sabong iti klase Viola ket ti garden violet, wenno English violet (Viola odorata), a nagsayaat a mailaok kadagiti sinam-it ken inumen. (Kitaem ti kahon a “Dagiti Nasam-it a Sabong a Mailaok iti Inumen.”) Awanen ti sabali pay a sabong iti grupo a Viola a mabalin a makan.

Ti Nalangto a Daylily

Dagiti atiddog, naingpis, ken nawadwad a bulong iti baba ti daylily (klase Hemerocallis) ti pakabigbigan daytoy a mula. Naiduma ti nalaka a malaylay a sabongna iti dadduma a sabong iti isu met la a pamilia ti Liliaceae. Nabayagen a masidsida dagiti daylily, a ti kolorda ket manipud iti duyaw agingga iti nalabaga. Mabalin a mausar kas nateng daytoy a sabong, no saan a masobraan ti pannakalutona. Mabalin met nga ilaok dagiti petalona kadagiti ramen a kayatmo tapno makaaramidka iti nasayaw a pasta, sa maiprito. Arkosam iti intero a sabong.

 Dadduma Pay a Masida a Sabong

Ti sabong ti yucca (genus Yucca), nga agtubo a nangnangruna kadagiti natikag wenno medio natikag a lugar ket nabaknang iti bitamina ken calcium. Dagiti petalo laeng ti kanem. Ikelnatmo iti apagbiit tapno maikkat ti paitna. Dagiti sabong ti lemon (Citrus limon), kahel (Citrus sinensis), ken yerbabuena (genus Mentha) ket nagsayaat a mailaok kadagiti inumen, salad, ken sinam-it. *

Awan duadua, a dagiti sabong ket sagut kadagiti sentidotayo ken napateg a ramen tapno matagiragsaktayo ti biag. Talaga a dagita ti mangted iti kanayonan a rason tapno agyamantayo iti naayat a Namarsua kadatayo.

[Footnotes]

[Kahon/Dagiti Ladawan iti panid 24]

DAGITI NASAM-IT A SABONG A MAILAOK ITI INUMEN

Mangikabilka iti petalo wenno bassit a sabong iti tunggal abut ti ice-cube tray sakbay a bukbokam iti naibotelia wenno na-filter a danum. I-freezer-mo kas iti gagangay. Usarem dagitoy nga ice cube iti paboritom nga inumen.

[Credit Line]

Nakopia manipud iti El Cultivo de Hierbas (Herb Culture).

[Kahon/Dagiti Ladawan iti panid 24]

PANANGARAMID KADAGITI KENDI A SABONG

Batilem ti puraw ti itlog ket babaen iti pino a brutsa, ipintam dayta iti tunggal nadalus ken namaga a sabong. Siertuem a mapintaan a naan-anay ti amin a petalo. Usarem ti sagat bayat a warakiwakam iti pino nga asukar ti amin a petalo. Iwagwagmo ti sobra sa idissom dagiti sabong tapno agmagada iti sumagmamano nga oras.

[Credit Line]

Nakopia manipud iti Cook’s Thesaurus.

[Kahon iti panid 24]

DAGITI NAPATEG A PAKDAAR

Makasabidong ti dadduma a sabong. Ammuem dagiti mabalin a sidaen. No agduaduaka, saanmo ida a sidaen.

Dimo kanen ti aniaman a sabong a naispreyan iti pestisidio wenno dadduma pay a kemikal. (Kasta met la ti aramidem kadagiti sabong a ginatangmo kadagiti aglaklako, hardin, ken dadduma pay nga agmulmula iti dayta.) Kanem laeng dagiti sabong a naimula iti organiko a wagas ken adayo kadagiti kalsada.

Dagiti sabong ket saan a rumbeng a kanen dagiti agangkit wenno adda allergy-da iti mulmula.

Kas kadagiti prutas ken nateng, masapul a mabugguan a naimbag dagiti sabong, nangruna no makan dagitoy a di naluto.

[Ladawan iti panid 23]

Rosas

[Ladawan iti panid 23]

Sabong ti karabasa

[Ladawan iti panid 23]

Pansy

[Ladawan iti panid 23]

Daylily

[Dagiti Ladawan iti panid 24]

Sabong ti lemon