Manipud Kadagiti Agbasbasa

Dagiti Balloon Nagustuak a binasa ti artikulo a “Ti Kadakkelan a Piesta ti Balloon iti Intero a Lubong!” (Marso 8, 2004) Imbaga ni nanangko a kayatnanto ti aglugan iti balloon, isu a kayatko met ti agluganto iti dayta. Idi binasak ti artikulo, diak impagpagarup a nagadu gayam ti balloon sadiay! Nagustuak dagiti retrato. Agtawenak iti walo.

J. L., Estados Unidos

Nakaskasdaaw a Mula Pulos a diak pay nakabasa iti aniaman a makapainteres ken naisangsangayan a kas iti artikulo a “Nakaskasdaaw a Parsua nga Agbibiag iti Narigat a Kasasaad.” (Marso 8, 2004) Talaga a nakaskasdaaw a mula ti welwitschia. Kasano ngata a makapagbiag iti kasta a kapaut kadagiti narigat a kasasaad? Dagita nga artikulo ti naan-anay a mangipalgak kadatayo iti kinasirib ti managpartuat a Namarsua kadatayo a ni Jehova.

A. C., Russia

Dimmakelak idiay Angola isu a namin-adun a nakakitaak iti welwitschia. Masdaawak idi kada makitak daytoy karkarna a mula. Ngem pinampanunotko ti adu a kadawyan a pagarup maipapan iti dayta. Ita, 27 a tawen kalpasanna, naawatkon ti impormasion a tartarigagayak.

A. O., Switzerland

Nasuroken a 15 a tawen nga agbasbasaak iti Agriingkayo! Gapu ta diak kabaelan ti agbiahe, makatulong dagita nga artikulo tapno detalyado a maadalko dagiti parsua ni Jehova. Diak pulos naammuan ti kinapaut ti panagbiag ti welwitschia no saan a gapu iti Agriingkayo!

L. Z., Francia

Dagiti Burren iti Ireland Naaddaankami ken ni lakayko iti gundaway a nagpasiar idiay Ireland itay napan a tawen, isu a nagustuanmi unay ti artikulo a “Ti Nagpintas a Burren ti Ireland.” (Marso 8, 2004) Kaaduan a libro para kadagiti turista ket saan unay a mangted iti impormasion maipapan iti Burren. Ti surbeyor a ni Ludlow inawaganna idi “a let-ang” ti Burren, ngem napintas gapu iti aglawlawna nga aduan iti dadakkel a bato. Nupay kasta, ti maysa a grupo dagiti Saksi ni Jehova a madama idi a mangaskasaba ti kapintasan a nakitami. Idi inyam-ammomi ti bagimi kas padada a Saksi, naragsakanda. Naaddaankami kadagiti baro a gagayyem idiay Ireland ket nagawidkami nga aduan iti pakalaglagipan ti Burren.

B. E., Estados Unidos

Tipo ti Dara Pagyamanan gapu iti artikulo a “Ti Panangmatmat ti Biblia: Ti Aya Tipo ti Daram ti Mangikeddeng iti Personalidadmo?” (Pebrero 8, 2004) Medio mariribukanak maipapan iti daytoy a banag. Naisuro kaniak idiay eskuelaan a ti personalidad ket saan a maikeddeng babaen iti tipo ti dara. Nadlawko met nga iti dadduma a libro, ti panangusar iti tipo ti dara tapno maikeddeng ti personalidad ket nainaig iti espiritismo. Ngem adda dagiti am-ammok a masansan a pagsasaritaanda ti tipo ti dara ken ukomenda ti sabsabali gapu iti dayta. Idi pampanunotek no ania ti umiso ken di umiso, dimteng daytoy nga artikulo isu a naawatak a naimbag ti panangmatmat ti Biblia.

R. K., Japan

Makapainteres kaniak ti artikulo. Sigun kadagiti kaeskuelaak, estrikto ken sensitibo ti tao nga A ti tipo ti darana ken naalumamay ti tao a B ti tipo ti darana. Sangkapanunotko no kastaak met. Ngem nabang-aranak a nakaammo nga adda gayam bukod a personalidad ti tunggal tao. Naamirisko met a mabalintay a balbaliwan ti personalidadtayo babaen ti panagpaiwanwantayo iti nasantuan nga espiritu ti Dios.

N. I., Japan

Dagiti Dissuor Kayatko ti agyaman gapu iti nagsayaat nga artikulo a “Panangpasiar Kadagiti Nangayed a Dissuor.” (Pebrero 22, 2004) Naparaburan ti Zambia kadagiti dissuor, dan-aw, karayan, kabakiran, ken kabambantayan. Nagpintas met dagiti dissuor. Ti artikulo ti nangtignay kaniak nga agyaman ken Jehova, ti nailangitan nga Amatayo, gapu kadagiti pinarsuana.

G. M., Zambia