Agimtuod Dagiti Agtutubo . . .

No Ngay Awan ti Riknana Kenka?

IMBILANGMO a gayyem. Ngem idi agangay, agayatkan kenkuana. Nalabit nagustuam gapu ta nasayaat ti ugalina wenno makaay-ayo ti panagisemna kenka no kasarsaritanaka. Aniaman ti makagapu, naglabasen ti tiempo ngem saan a nagrayo kenka. Isu a dinamagmo no gayyem laeng ti pangibilanganna kenka. Ngem nadismayaka idi imbagana nga awan ti riknana kenka. *

Natural a nasaktanka. Ngem saanka a maupay; ikagumaam a matmatan ti bambanag iti umiso a wagas. Wen, imbaga ti maysa a baro nga awan ti riknana kenka. Laglagipem a ti desisionna dina balbaliwan ti pategmo kas maysa a tao. Dayta ti saan met a mangilibak iti kinapudno nga ay-ayaten ken raraemendaka latta dagiti dadduma. Kinapudnona, mabalin a ti desisionna ket saan nga inimpluensiaan ti panangmatmatna iti kinataom no di ket naiduma laeng ngamin dagiti kalat wenno ipangpangrunana.

No maysaka a Kristiano, mabalin a laglagipem met a ‘saan a nakillo ti Dios tapno lipatenna ti aramidmo ken ti ayat nga impakitam maipaay iti naganna, ta nagserbika kadagiti sasanto ken agtultuloyka nga agserserbi.’ (Hebreo 6:10) Kastoy ti kinuna ni Sonja *: “Napategka latta. Napategka ken ni Jehova kas maysa a di naasawaan a tao.” Gapu ta ipatpategnaka ti Kangatuan agraman ti sabsabali, apay ketdin a pukawem ti panagraemmo iti bagim?

Mabalin a maupay wenno madanaganka a saanka a maikari nga agbalin nga asawa. Ngem saan a gapu ta saanka a “maikari” iti daytoy a baro ita ket saankan a “maikari” iti sabali. (Uk-ukom 14:3) Isu nga imbes a matmatam a napaayka iti panagbirokmo iti maitutop a pakiasawaam, matmatam nga addanto makagunggona a resulta dagiti panagreggetmo: Naammuam a daytoy a baro ket saan a maikari a pakiasawaam. Apay a maibagatayo daytoy?

Maikari Kadi Idi Kenka?

Ibilbilin ti Biblia kadagiti assawa a lallaki a ‘rebbeng nga ayatenda dagiti assawada a kas kadagiti bukodda a bagi.’ (Efeso 5:28) Ibilbilinna pay kadakuada nga ‘itudinganda iti dayaw’ dagiti assawada  a babbai. (1 Pedro 3:7) Iti daytoy a kasasaad, mabalin nga ipatpategnaka daytoy a baro kas maysa a gayyem. Ngem babaen ti panangibagana nga awan ti riknana kenka, arigna impakitanan a saan a nakasagana ita nga agayat ken mangituding iti dayaw kenka kas asawana. Adda kalinteganna a mangaramid iti kasta a desision. Panunotem: No kasta ti panagriknana, talaga aya a maitutop nga agbalinto a pakiasawaam? Panunotem ti kinalidaymo no makiasawaka iti saan nga agay-ayat ken mangipatpateg kenka a kas iti ibilbilin dagiti Kasuratan!

Mabalin a makatulong met tapno ad-adda a mailiwliwagmo ti riknam no usigem manen dagiti tigtignay daytoy a baro, ita ta saan a natungpal dagiti namnamaem a panagayatna kenka. No dadduma, ti panagkursonada ti mangbulsek iti maysa a tao kadagiti personal wenno naespirituan a depekto a mabalin a makita ti sabsabali. Kas pagarigan, saanna kadi a narikna a matmatnagen ti riknam kenkuana, wenno inggagarana a matnag ti riknam kenkuana babaen ti kanayon a pannakikaduana kenka? No inggagarana, saan ngata a dayta ti mangipasimudaag a saan a sisasagana nga agbalin a nakonsiderasion ken mannakipagrikna a Kristiano nga asawa? No kasta, pagimbagam ta naammuam ti agpayso, nupay nalabit nasaem dayta.

Naabbukay ti rikna ni Marcia idi rinugian ti maysa a baro a pakitaan iti naisangsangayan nga atension. Idi dinamagna kenkuana maipapan iti intensionna, imbaga daytoy a baro nga awan ti riknana kenkuana. Ania ti nakatulong kenkuana a mangiliwliwag iti pannakapaayna? Kinuna ni Marcia: “Ti panagpaiturayko iti isipko imbes nga iti pusok ti nakatulong kaniak a mangiliwliwag iti riknak.” Ti pananglagipna kadagiti kalikaguman ti Biblia kadagiti assawa a lallaki ti nakatulong ken ni Marcia a mangamiris a saan a kualipikado daytoy a lalaki. Daytoy ti nakatulong kenkuana a mangiliwliwag iti ladingitna.

Umasping met iti dayta ti kapadasan ni Andrea iti maysa a baro. Naamirisna idi agangay a dagiti ipakpakita daytoy a baro kenkuana ti mangipasimudaag a saan pay a nataengan ken saan pay a nakasagana a makiasawa. Isu nga agyaman ni Andrea ta impaawat kenkuana ni Jehova ti agpayso a kasasaad. Kinunana: “Patiek a masalaknibannaka ni Jehova manipud kadagiti kasasaad a mabalin a mangsair kenka, ngem rumbeng nga agtalekka Kenkuana.” Siempre, iti adu a kasasaad, mabalin a nagsayaat ti ipakita ti maysa a baro ngem ibagana nga awan ti mariknana kenka gapu kadagiti nadayaw a rason. Aniaman ti kasasaad, kasanom a madaeran dagiti rikna nga ibunga dayta?

No Kasanom a Mailiwliwag ti Riknam

Mabalin a kasapulan ti panawen tapno mailiwliwagmo ti pannakapaaymo. Bayat ti panaglabas dagiti panawen in-inut a natnag ti riknam kenkuana isu a kasapulan met ti panawen tapno malipatam. Ti panangiliwliwagmo iti riknam ket saan a kas iti kalaka ti panangiddepmo iti silaw. Iti dadduma nga aldaw, mabalin a kasla saanmo a madaeran dayta! Agan-anuska. Bayat ti panaglabas ti panawen, mailiwliwagmonto met laeng dagita a rikna. Ngem no kayatmo a nabibiit a mailiwliwag dagita a rikna, liklikam dagiti mabalin a mangrubrob iti dayta.

Kas pagarigan, saanmo a babalawen ti bagim babaen ti pananglagipmo manen iti tunggal imbagam ken impakitam idi impalgakmo ti riknam iti dayta a baro. No saanmo a gawidan dagita a kapanunotan, mabalin a pagarupem a saan nga agpayso ti imbagana nga awan riknana kenka wenno mabalin nga agpanunotka iti sabali a pamay-an a nalabit nga agkurri. Awatem ti kinapudno a saanmon a mabalbaliwan ti riknana. Posible nga uray kasano pay ti pannakisaritam kenkuana, mabalin nga isu met laeng ti sungbatna kenka.

Mabalin a maysa pay a silo ti panagarapaap. Pampanunotem nga agkatuloyankayto ken agbiag a siraragsak. Mabalin a kasla makaliwliwa dagita nga arapaap, ngem saan nga agpayso. Inton agpatingga, mariknamto manen ti pannakapaaymo isu nga agsakitto manen ti nakemmo. Daytoy maulit-ulit a panangparagsakmo iti bagim a sarunuen ti nakaro a panagsakit ti nakem ket mabalin nga agpaut iti nabayag a tiempo malaksid no ikagumaam a pasardengen dayta.

Ikagumaam a saanmon nga arapaapen dayta. No mangrugika nga agarapaap, bumangon ken magnaka. Agaramidka iti aniaman a mabalin a makatulong tapno mabaliwan ti pampanunotem. Ipangpangrunam a panunoten dagiti banag a makaparegta, saan a dagiti banag a mamagleddaang kenka. (Filipos 4:8) Mabalin a narigat daytoy iti damo, ngem inton agangay, agballigikanto ken maaddaanka iti natalna a panunot.

Makatulong ti panangandingay dagiti nadekket a gagayyem. (Proverbio 17:17) Nupay kasta, kastoy ti ipakdaar ni Sonja: “Saan a makatulong no ti gagayyemmo ket bin-ig a babbalasang, kasadaram, ken kayatda amin ti makiasawa. Kasapulam met  dagiti natataengan a gagayyem, a makatulong kenka nga agpanunot a naimbag.” Ken laglagipem, adda daydiay dakdakkel ti maitulongna kenka a mangdaer iti saem a marikriknam.

Ni Jehova​—Gayyem ken Saranay

Idi naupay ti maysa a matalek a lalaki idi un-unana, nagkararag ken nagpatulong ken ni Jehova. Ania ti resultana? Kastoy ti insuratna: “No madanagan ken mariribukak, sika ti mangliwliwa ken mangparagsak kaniak.” (Salmo 94:19, Ti Baro a Naimbag a Damag Biblia) Liwliwaen ken saranayennaka ni Jehova no agkararagka met kenkuana buyogen ti pammati. Kasta ti inaramid ni Andrea. Kinunana: “Nagpateg ti panagkararag tapno mailiwliwagmo ti saem a marikriknam ken makapangabaruananka.” Umasping met laeng iti dayta ti imbaga ni Sonja maipapan iti kararag, “Dayta ti makatulong kenka a maaddaan iti panagraem iti bagi a saan nga agpannuray iti panagayat wenno panangilaksid kenka ti sabsabali.”

Awan ti tao a naan-anay a makatarus iti riknam a kas ken ni Jehova. Pinarsuana dagiti tattao nga addaan iti tarigagay nga agayat ken ayaten ti agbalinto nga asawada. Ammona ti pannakabalin ti panagrayo, ken ammona no kasano a kontrolen dayta. Matulongannaka a mangdaer iti nakaro a saem a marikriknam ta kuna ti 1 Juan 3:20: “Ti Dios dakdakkel ngem kadagiti pusotayo ket ammona ti amin a bambanag.”

Agtalinaedka a Natimbeng

Ti panagasawa ket mabalin a gubuayan ti dakkel a kinaragsak, ngem saan a dayta ti kakaisuna a gubuayan. Mapasaran ti amin nga agserserbi ken ni Jehova ti rag-o, saan laeng a dagiti addaan iti assawa. No maminsan, adda pagimbagan dagiti di naasawaan ngem kadagidiay naasawaan. Saanda nga agsagaba iti “rigat iti lasag” a nadakamat iti 1 Corinto 7:28. Daytoy a rigat tukoyenna dagiti rigat ken problema a mapasaran ti amin nga agassawa. Ad-adu met ti wayawaya dagiti di naasawaan ken nawaywaya nga usarenda ti biagda nga agserbi ken Jehova. Gapuna, isursuro ti Biblia: “Daydiay met mangited ti kinabirhenna iti pannakiasawa naimbag ti aramidenna, ngem daydiay saan a mangited iti dayta iti pannakiasawa naim-imbagto ti aramidenna.” (1 Corinto 7:38) Uray no nasged ti tarigagaymo a makiasawa, ti panangmennamennam kadagitoy a pannursuro ti Biblia ti makatulong kenka nga agtalinaed a natimbeng tapno lalo a matagiragsakmo dagiti agdama a kasasaadmo.

Mabalin a kastoy ti ibaga ti dadduma a nasayaat ti panggepda a gagayyem: “Saanka a madanagan, addanto aldaw a maam-ammom ti maysa a naimbag a lalaki.” Agpayso met a ti naminsan a pannakapaaymo dina kaipapanan a kanayonton nga agmaymaysaka. Nupay kasta, kastoy ti kinuna ti maysa nga agtutubo a Kristiano a babai nga agnagan iti Candace: “Talaga nga agtalekak ken Jehova. Diak met ketdi namnamaen nga ikkannak iti asawa tapno maparagsaknak. Ngem ammok nga itednanto kaniak ti kasapulak tapno mapunnuan dayta a kurang iti biagko.” Ti kastoy a positibo a kababalin ti nakatulong kenkuana a nangparmek iti pannakapaay ken ayat.

Iti daytoy a lubong, masansan a mapaay dagiti gakat a mangirugi iti panaginnarem, ngem kasta met ti mapasamak iti adu a panagasawa. No agtalekka ken Jehova ken tungpalem ti balakadna, matulongannaka nga agbalin a naragsak kalpasan a naupayka. Mabalin a mapasaram ti napasaran ni Ari David, a nagsurat: “O Jehova, iti sanguanam adda ti isuamin a tarigagayko, ket manipud kenka saan a nailinged ti mismo a panagsennaayko. Ta kenka, O Jehova, nagurayak; sika simmungbatka, O Jehova a Diosko.”​—Salmo 38:9, 15.

[Footnotes]

[Dagiti Ladawan iti panid 20]

Aprobetsarem ti tulong nga ipapaay ni Jehova