Ammoyo Kadi?

(Masarakan dagiti sungbat daytoy a pannubok kadagiti naipaay a teksto ti Biblia, ket nayimprenta iti panid 13 ti kompleto a listaan dagiti sungbat. Para iti kanayonan nga impormasion, kitaenyo ti publikasion nga “Insight on the Scriptures,” nga impablaak dagiti Saksi ni Jehova.)

1. Idi kaaldawan ni Solomon, aniada a barko ti nangisangpet kadagiti pirak, marfil, bakes, ken paboreal iti Israel? (1 Ar-ari 10:22)

2. Idi asidegen a matay, kasano nga impakita ni Pablo nga ammona nga isu ket nakapagibtur? (2 Timoteo 4:7)

3. Ania ti natagtagainep ni Faraon nga imbuksilan ni Jose a ti kaipapananna ket asidegen ti dakkel a bisin nga agpaut iti pito a tawen? (Genesis 41:17-24)

4. Siasino ti dua a babbai a nangisuro ken ni Timoteo manipud kadagiti Kasuratan? (2 Timoteo 1:5)

5. Kasano ti karkarna a pannakapapatay ni Absalom, ken kasano a naitabon? (2 Samuel 18:9, 14-17)

6. Ania ti supapak ti basol? (Roma 6:23)

7. Ania a hyperbole, wenno aglablabes a sasao, ti inusar ni Jesus a mangipakita a nagrigat para iti nabaknang ti sumrek iti Pagarian ti Dios? (Mateo 19:24)

8. Siasino ti Romano a prokurador iti Judea a nangipalubos a maibalud ni Pablo gapu ta kayatna a magun-odan ti pabor dagiti Judio? (Aramid 24:27)

9. Ania a wagas ti panagaramid iti arak ti dineskribir ni Jesus nga aramidenna tapno iyilustrarna ti pannakadadael dagiti kabusor ti Dios? (Apocalipsis 19:15)

10. Kasano a naisurat ti damo a Sangapulo a Bilin ken nakaisuratanna? (Exodo 31:18)

11. Kasano ti kayat ni apostol Pablo a panagarkos dagiti Kristiano a babbai iti bagbagida? (1 Timoteo 2:9)

12. Tapno mayilustrar ti kinatan-ok ni Jehova, imbaga ni Isaias a masukat ni Jehova ti “dandanum” babaen iti ania? (Isaias 40:12)

13. Ania ti nagan ti pagtaengan idi da Adan ken Eva? (Genesis 2:15)

14. Saan nga inanamongan ni Jacob ti naranggas nga inaramid ti siasino a dua kadagiti annakna a lallaki? (Genesis 49:5-7)

15. Ania ti nagan ti uppat a karayan a nagsasanga manipud iti maysa a karayan nga agay-ayus iti Eden? (Genesis 2:11-14)

16. Ania ti rumbeng nga aramiden dagiti kualipikado a Kristiano iti kapammatianda no nagkamali sakbay a naammuanna dayta? (Galacia 6:1)

Dagiti Sungbat iti Pannubok

1. Dagiti barko ti Tarsis

2. Kinunana: “Nakirupakak iti nasayaat a dangadang, tinarayko ti tarayen agingga iti pagpatinggaan, inalagadko ti pammati”

3. Ti pito a nalukmeg a baka kinnanda ti pito a nakuttong a baka, ket ti pito a kimbet ken nakuttong a dawa inalun-onda ti pito a nasasayaat a dawa ti bukel

4. Ni nanangna a Eunice, ken ni lolana a Loida

5. Ni Joab ken dagiti katulonganna kinabilda ni Absalom bayat a naisalat ti buokna iti dakkel a kayo, sada impalladaw ti bangkayna iti dakkel a lungog ket ginabsuonanda iti nagadu a bato

6. Ipapatay

7. Kinunana: “Ti maysa a kamelio nalaklaka a lumsot iti abut ti dagum ngem iti maysa a nabaknang a tao a sumrek iti pagarian ti Dios”

8. Ni Felix

9. Panangpayat iti pagpespesan iti ubas

10. Ti “ramay ti Dios” ti nangisurat kadagitoy iti dua a tapi a bato

11. “Iti naimbag-pannakaurnosna a kawes, buyogen ti kinaemma ken kinasimbeng ti panunot, saan a kadagiti estilo a panangsallapid iti buok ken balitok wenno kadagiti perlas wenno nangina unay a lupot”

12. “Iti lukong laeng ti imana”

13. Ti minuyongan ti Eden

14. Da Simeon ken Levi

15. Pison, Gihon, Hiddekel, ken Eufrates

16. “Padasen[da] nga aturen ti kasta a tao iti espiritu ti kinaalumamay”