Manipud Kadagiti Agbasbasa

Dagiti Amma Kabasbasak ti serye nga “Ania ti Naimbag nga Ama?” (Agosto 22, 2004) Binalbaliwak ti eskediulko iti panggedak tapno ad-adu ti panawenko iti pamiliak ken kadagiti rebbengek iti kongregasion. No panunotek ti pinansial a kasasaadko, no dadduma kayatko a dakdakkel ti mateggedak babaen ti napapaut a panagtrabahok. Ngem kinombinsirnak daytoy a serye a napatpateg ti panawen a kaduak ti pamiliak ngem iti kuarta. Naparegtaak kadagiti kapadasan dagiti naballigi nga amma.

K. S., Japan

Talaga nga inapresiarmi ken ni adingko daytoy a serye. Manmano a makasaritami ni tatangmi. Agpayso nga ay-ayatenmi ket nupay dina ibagbaga nga ay-ayatennakami, ammomi nga ay-ayatennakami met. Babaen ti panangbasami kadagitoy nga artikulo, nariknami nga adda makaawat kadakami. Pagyamanan unay!

V. D., Italia

Kinalatak Ti artikulo a “Nasaysayaat Ngem iti Kinalatak” (Agosto 22, 2004) ti sungbat dagiti kararagko. Dayta ti nangkombinsir kaniak a nainsiriban ti agsubli iti amin-tiempo a trabaho a panagebanghelio. Idi damo, kas impakita ti artikulo, nagsagaba ni Charles gapu iti kurang a pannakaawat ni tatangna. Ngem anian a bendision ti nasagrapna idi agangay! Sapay koma ta anamonganto metten ni nanangko ti desisionko a mangpalawa iti serbisiok ken ni Jehova. Pagyamanan iti panangyam-ammoyo kadakami kadagiti matalek nga adipen ni Jehova babaen kadagita nga artikulo.

Y. P., Ukraine

Kas maysa nga agtutubo, no dadduma, singaennak ti lubong ken dagiti ituktukonna. Kinapudnona, ti kurso a pinilik ket mabalin a mangpalatak kaniak. Kalpasan a binasak daytoy nga artikulo, naamirisko a saan a ti panagserbik ken ni Jehova ti agpayso a motibok idi pinilik dagiti kursok. Napikapikak iti pakasaritaan ni Kabsat Charles Sinutko agsipud ta napadasanna a mismo ti nagbalin a nalatak, ngem kaskasdi nga inkeddengna ti agserbi ken Jehova. Daytoy nga artikulo ti nangisuro kaniak nga awanen ti nasaysayaat iti daytoy a lubong no di ti agserbi ken ni Jehova iti amin a tiempo.

R. K., Canada

Napikapikak iti panangtallikud ni Kabsat Sinutko iti narang-ay a karerana a panagkanta sana pinili ti agserbi ken ni Jehova iti amin a tiempo. Maragsakanak nga agpaypayunir a kadua ni lakayko. Kayatmi a tuladen ni Kabsat Sinutko babaen ti panangipangpangrunami ken ni Jehova ken iti Pagarian ti Dios iti biagmi. Pagyamanan iti panangipablaakyo iti daytoy makaparegta a kapadasan!

E. S., Japan

Panagdenna Sakbay ti Kasar Kayatko ti agyaman kadakayo gapu iti artikulo nga “Agimtuod Dagiti Agtutubo . . . Kasano a Maliklikak ti Makidenna Sakbay ti Kasar?” (Agosto 22, 2004) Kas maestra ken mamalbalakad, natakuatak a makapainteres unay daytoy nga artikulo. Kadagiti klasek, impaganetgetko dagiti napateg a punto a makatulong kadakuada tapno ibilang ida ni Jehova a Dios a nasantuan ken maikari ken tapno agballigida iti panageskuelada a din kasapulan a mapasaranda dagiti parikut nga ibunga ti pannakidenna sakbay ti kasar. Adu nga estudiante ti naginteres ken kayatda a maammuan ti ad-adu pay maipapan iti Biblia! Dadduma a mannursuro ti agkidkiddaw itan kaniak a makisarita kadagiti estudianteda. Kada lawas, pagsasaritaanmi kadagiti estudiantek ti nadumaduma a tema manipud iti libro nga Agimtuod Dagiti Agtutubo.

B. C., Mozambique

Agtawenak iti 25 ket inaramidkon ti amin a kabaelak tapno agtalinaedak a birhen. Ad-addan a determinadoak a sumrek iti nadayaw a panagasawa. Itultuloyyo ti nasayaat a trabahoyo.

F. K., Uganda