Panagtakaw iti Tagilako​—Di Makadangran a Pagragsakan Wenno Nadagsen a Krimen?

PANUNOTEM daytoy nga eksena. Naglukat ti makinsango a ridaw ti dakkel a tiendaan, ket simrek ti dua a babbalasitang a nakakawes iti uso. Nagturongda iti pasilio a paglakuan kadagiti kosmetiko. Sinurot ida ti nakauniporme a guardia ngem simmardeng idi agarup 10 a metron ti kaasidegna kadakuada, sa nagtakder nga impalikudna dagiti imana. Sipsiputanna dagiti babbalasitang bayat ti panangbilingda kadagiti lipstick ken maskara.

Tinaldiapanda ti guardia a mangsipsiput kadakuada. Maragragsakanda. Maysa kadagiti babbalasitang ti immakar iti ayan dagiti kiuteks ket pimmidut iti dua. Agmusimusiig bayat nga agimpipili iti dua nga agkaarngi a kolor a nalabaga. Indissona ti maysa sa pimmidut iti medio nataytayengteng.

Nagdumog ti guardia sa kimmita iti sabali a direksion. Dagus nga inkarga dagitoy a babbalasitang dagiti lipstick ken kiuteks iti bagda. Kalmado ti langada, ngem maragragsakanda. Sumagmamano pay a minuto a nagtakderda iti pasilio, a ti maysa matmatmatanna dagiti garugad ti kuko ket ti kaduana dagiti lapis ti kiday.

Nagkinnita ken nagtinnung-edda, sada nagturong iti makinsango a ridaw. Naglisi ti guardia, ket inisemanda idi lumabasda. Nagturongdan iti ayan dagiti pagpapintas iti cell phone iti batog ti kahera ket kinitada dagiti nakadispley. Naginnarasaasda maipapan kadagiti lalat a kaha ti cell phone. Kalpasanna, nagturongdan iti pagruaran.

Maragragsakan ken maam-amakda idi magmagnada a rummuar. Idi asidegdan iti ruangan, makaririawdan ngem minedmedanda. Apaman a nakaruardan, kasta unayen ti ragsakda. Nakaangesdan iti nauneg gapu iti bang-ar. Pinartakan dagitoy a babbalasitang ti pimmanaw, ngem maragragsakanda. Maymaysa ti pampanunotenda: ‘Nakatakawkami a saankami a natiliw!’

Ti dua a babbalasitang ket parbo laeng, ngem nakalkaldaang ta agpayso ti eksena nga insalaysaymi. Iti kada aldaw, mapattapatta a sangariwriw ti agtakaw iti tagilako idiay laeng Estados Unidos, ngem sangalubongan dayta a parikut. Kas makitatayto, nakaro a pannakadangran ti ibungana. Ngem kaaduan kadagiti agtakaw iti tagilako dida ikankano ti nakaro a panangdangran a pataudenda. Uray ti adu a makabael nga agbayad kaykayatda ti agtakaw. Apay?