Ti Panangmatmat ti Biblia

Rumbeng Aya a Pagbutngam ti Armagedon?

ANIA ti “Armagedon”? Iti simple a pannao, dayta a termino ket agaplikar iti kasasaad wenno situasion a dagiti agturay iti lubong ket aguummong a maibusor iti Dios ken iti Pagarianna nga iturturayan ni Jesu-Kristo. Iti Apocalipsis a libro iti Biblia, nakita ni apostol Juan ti maysa a sirmata a sadiay, naguummong dagiti agturay tapno bumusor iti Dios iti piguratibo a lugar a naawagan iti Armagedon.

Maminsan la a mabasa iti Kasuratan ti sao nga “Armagedon,” ngem kas moderno a metapora, masansan a maus-usar dayta. Manipud iti nuklear a panangikisap agingga iti virus iti computer, dayta a sao ket nayaplikaren kadagiti nakaro ken gagangay a didigra. Sumagmamano a kaaduan a malako a libro ti naibasar kadagiti maaw-awagan a panagpatingga ti lubong, wenno panawen sakbay la unay ti Armagedon. Maysa a serye ti nobela nga addaan iti dayta a tema ti nakalako iti nasurok nga 60 a milion a kopia iti napalabas a sangapulo a tawen.

Dadduma a tattao pagamkanda ti Armagedon. Patienda a dagiti terorista, agdadangadang a nasion, wenno didigra a saan a makontrol ti tao ket agtungpal iti sangalubongan a didigra, isu a ti daga saanton a mabalin a pagnaedan. Patien ti dadduma nga iti naikeddeng a tiempo, makaunget a mismo ti Dios isu a dadaelenna ti planetatayo ken amin nga adda iti dayta. Sigurado a nakaam-amak dayta! Ngem ania ti husto a kaipapanan ti “naindaklan nga aldaw ti Dios a Mannakabalin-amin” iti Armagedon?​—Apocalipsis 16:14, 16.

Madadaelto Aya ti Daga?

Saan a madadael ti amin a tattao inton Armagedon. Kasanotay nga ammo dayta? Ipasigurado ti Biblia kadatayo nga “ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot, ngem isaganana dagiti nakillo a tattao maipaay iti aldaw a panangukom tapno magessatda.” (2 Pedro 2:9) Makapagtalektayo ngarud a ti Dios naan-anay a kontrolenna ti mannakabalin-amin a bilegna. Dagidiay laeng manglalais iti kinasoberano ti Dios ti pagdas-alan ti pungtotna inton Armagedon. Awanto ti di inggagara a mapapatay.​—Salmo 2:2, 9; Genesis 18:23, 25.

Saritaen ti Biblia kadatayo a ti Dios ‘dadaelenna dagidiay mangdaddadael iti daga.’ (Apocalipsis 11:18) Nalawag ngarud a saan a panggep ni Jehova a Dios a dadaelen ti planetatayo. Imbes ketdi, ikkatennanto ti nadangkes a kagimongan  ti tao a bumusbusor iti kinaturayna. Umasping daytoy iti napasamak iti tiempo ti Delubio idi kaaldawan ni Noe.​—Genesis 6:11-14; 7:1; Mateo 24:37-39.

“Nakaam-amak nga Aldaw”

Ipapantayon nga adu a padto iti Biblia maipapan iti sumungsungad a pannakadadael ket makapadanag. Kas pagarigan, nadakamat ni mammadto a Joel “ti naindaklan ken nakaam-amak nga aldaw ni Jehova.” (Joel 2:31) Ti igam ti Dios ket pakairamanan ti niebe, uraro, ginggined, makaakar a sakit, manglayus a tudo, panagtudo ti apuy ken asupre, makapapatay a riribuk, kimat, ken mangrunot-lasag a saplit. * (Job 38:22, 23; Ezequiel 38:14-23; Habakuk 3:10, 11; Zacarias 14:12, 13) Nalawag met a deskribiren ti Biblia ti tiempo a dagiti matay iti dayta nga aldaw ket agkaiwaranto iti intero a daga, mabaybay-an a kas ganagan wenno taraon dagiti tumatayab ken dadduma pay nga animal. (Jeremias 25:33, 34; Ezequiel 39:17-20) Napalalonto ti buteng dagiti kabusor ti Dios kabayatan daytoy a gubat.​—Apocalipsis 6:16, 17.

Kaipapanan kadi daytoy a rumbeng nga agbuteng dagiti natulnog nga agdaydayaw iti pudno a Dios kadagiti nakaskasdaaw a pasamak inton Armagedon? Saan a pulos, agsipud ta dagiti adipen ti Dios ditoy daga saandanto a makipaset iti daytoy a dangadang. Kanayonanna, salaknibanto ida ni Jehova. Kaskasdi nga agamanganto dagiti pudno nga agdaydayaw iti nakaam-amak a pannakaiparangarang ti pannakabalin ti Dios.​—Salmo 37:34; Proverbio 3:25, 26.

Ngem naisangsangayan ta napaltiingan ni apostol Juan a mangipasigurado kadatayo: “Naragsak daydiay mangbasa a sipipigsa ken dagidiay dumngeg iti sasao daytoy a padto,” agraman ti pakdaar maipapan iti Armagedon. (Apocalipsis 1:3; 22:7) Mabalin kadi nga agragsak ti maysa a mangmennamenna maipapan iti Armagedon? Kasano a kasta?

Mamagtignay nga Awis ti Dios

No sumungsungad ti napigsa a bagyo, mangipaay dagiti lokal nga autoridad kadagiti pakdaar a mangsalaknib iti biag. Tapno masigurado a ti amin ket mangngegda ti pakdaar, nalabit a maibaon dagiti polis nga addaan kadagiti mamakdaar a sistema wenno maibaonda nga agbalaybalay. Ti panggep daytoy ket saan a mamutbuteng kadagiti tattao no di ket tapno tulongan ida a mangsalaknib iti biagda. Maragsakan dagiti mannakaawat a tattao nga umawat iti pakdaar, ket dagidiay mangipangag maragsakanda a mangaramid iti dayta.

Umasping dayta iti pakdaar ti Dios maipapan iti asidegen a “bagyo nga angin” ti Armagedon. (Proverbio 10:25) Nangipaay ni Jehova kadagiti detalye maipapan iti gubatna iti naisurat a Saona. Ti tarigagayna ket saan a mamutbuteng no di ket mangipaay iti umdas a pakdaar ken tignayenna dagiti tattao nga agbabawi ken determinado a mangikagumaan nga agserbi kenkuana. (Sofonias 2:2, 3; 2 Pedro 3:9) Dagidiay mangaramid iti kasta maparaburanda iti pannakaisalakan. Gapuna, ditay rumbeng a pagbutngan ti sumungsungad a gubat ti Dios. Imbes ketdi, mabalintay a padaanan ti masanguanan buyogen ti panagtalek a “tunggal maysa nga umawag iti nagan ni Jehova makatalawto a sitatalged.”​—Joel 2:32.

[Footnote]

[Ladawan iti panid 12]

No sumungsungad ti napigsa a bagyo, mangipaay dagiti lokal nga autoridad kadagiti pakdaar a mangsalaknib iti biag

[Ladawan iti panid 13]

Ti pakdaar ti Dios maipapan iti Armagedon ket mamagtignay nga awis a mangispal iti biag