Dagiti Masansan a Maisaludsod

Apay nga adda dagiti mamadpadakes kadagiti Saksi ni Jehova?

Saan ngamin nga ammo ti adu a tattao ti agpayso maipapan iti patpatien dagiti Saksi ni Jehova. Mabalin a di magustuan ti dadduma ti panangaskasaba dagiti Saksi. Ngem kinaagpaysuanna, mangaskasabada gapu iti panagayatda iti padada a tattao ta ammoda a “tunggal maysa nga umawag iti nagan ni Jehova maisalakanto.”—Roma 10:13.

Kristiano kadi dagiti Saksi ni Jehova? Isuda kadi ket sekta?

Kristiano dagiti Saksi ni Jehova ta iti Biblia ti pangibasbasaranda kadagiti pannursuroda. Nupay kasta, saanda a Protestante wenno Katoliko yantangay adda dagiti pannursuro dagita a relihion a saan a naibasar iti Biblia. Kas pagarigan, isursuro ti Biblia a ti Dios ti kasayaatan nga ulidan iti panangipakita iti ayat isu a dina pulos tutuoken dagiti tattao iti umap-apuy nga impierno. Saan met nga isursuro ti Biblia nga adda di matay a kararua dagiti tattao, wenno dagiti Kristiano ket rumbeng a makiraman iti politika.—Ezequiel 18:4; Juan 15:19; 17:14; Roma 6:23. *

Kanayonanna, dagiti Saksi ni Jehova ket Kristiano gapu ta tultuladenda ni Kristo iti inaldaw a panagbiagda. Kas pagarigan, ni Kristo ken dagiti nagkauna a Kristiano ket saan a nakiraman iti politika. Imbes ketdi, inkaskasabada ti maipapan iti Pagarian ti Dios. (Lucas 4:43; Juan 15:19; 17:14) Kas panangtulad kadakuada, dagiti Saksi ni Jehova ket saan a makiramraman iti politika ken kadawyanna a makisarsaritada iti tunggal tao babaen ti pannakirinnason ken makakombinsir nga ebidensia kas panangtuladda kadagiti nagkauna a Kristiano.—Aramid 19:8.

Ti sekta ket kumonkontra a gunglo iti uneg ti maysa a relihion wenno grupo a simmina tapno mangbuangay iti baro a relihion. Dagiti Saksi ni Jehova ket saan a grupo a simmina iti aniaman a relihion. Saanda a sekta.

Kasano ti panaggigimong dagiti Saksi?

Dagiti gimongda ket mabalin a tabunuan ti siasinoman. Ti Biblia ti kangrunaan nga ad-adalenda, ken masansan a maipalubos nga agkomento dagiti tumabuno. Ti maysa kadagiti linawas a gimongda ket ti Teokratiko nga Eskuelaan ti Panagministro. Tumultulong daytoy kadagiti miembro ti kongregasion a mangparang-ay iti abilidadda nga agisuro, agbasa, ken agsirarak. Ti sabali pay a gimongda ket ti 30 minuto a naibasar-Biblia a diskurso maipapan iti tema a makapainteres unay kadagiti saan a Saksi. Kadawyanna a sarunuen dayta ti panagadal iti Biblia babaen ti magasin a Pagwanawanan. Mangrugi ken agngudo  dagiti gimongda babaen ti kanta ken kararag. Dida agur-or iti pondo wenno agipasa iti pagikabilan iti donasion.—2 Corinto 8:12.

Paggapgapuan ti pondo dagiti Saksi ni Jehova?

Ti trabahoda ket masupsuportaran babaen kadagiti boluntario a kontribusion. Saanda nga agpabayad no mangbautisar, mangasar, mamumpon, wenno mangaramidda iti dadduma pay a narelihiosuan a serbisio. Dida met ikalikagum kadagiti miembroda nga itedda ti apagkapullo wenno 10% ti mateggedanda. Siasinoman a mayat nga agdonar ket mabalinna nga itinnag dayta iti kahon ti kontribusion a naikabil iti di unay nakadkadlaw a paset ti Kingdom Hall. Dagiti Saksi ni Jehova ti mangyim-imprenta a mismo kadagiti naibasar-Biblia a literatura nga us-usarenda, isu a makaekonomiada. Dagiti met simple a Kingdom Hall ken pasilidad dagiti sanga nga opisina ket kaaduanna a binangon dagiti boluntario.

Agpaagas kadi dagiti Saksi ni Jehova?

Wen. Kinapudnona, birbirokenda ti posible a kasayaatan a pamay-an ti pannakaagasda ken dagiti ay-ayatenda. Adu pay ketdi a Saksi ti agtartrabaho iti tay-ak ti medisina kas nars, paramediko, doktor, ken siruhano. Ngem dagiti Saksi ni Jehova dida agpayalison iti dara. Kuna ti Biblia, “Adaywanyo . . . ti dara.” (Aramid 15:28, 29, Ti Biblia, PBS) Makapainteres ta umad-adu a doktor ti mangibilang a ti panangagas a di agusar iti dara ti kasayaatan, ta maliklikan ti adu a sakit ken komplikasion nga ibunga ti panagusar kadagiti produkto a nagtaud iti dara.

[Footnote]

[Kahon/Ladawan iti panid 7]

AGRIRINNAEM DAGITI UMILI SADIAY

Naidumduma ti ili ti Bejucal de Ocampo iti makin-abagatan a Mexico. “Kaaduan kadagiti umili ket Saksi ni Jehova,” kuna ti diario nga Excélsior, sa innayonna: “Agririnnaem dagiti agtuturay ken umili. . . . Saanen a mammartek ken mannigarilio dagiti umili no di ket agkakanta ken agbasbasadan iti Biblia. Raraemenda met dagiti agtuturay.”

Sigun iti diario, “awan ti agaapa ken agririkiar gapu iti relihion” nupay nadumaduma ti relihion iti dayta nga ili. Innayonna pay: “Dida aggiginnura ken nupay agduduma ti relihionda, agkikinnablaawda latta . . . Siwayawaya ti tunggal pamilia a mangannurot iti relihionna, ket saan a lapped dayta iti natalna a panagpupulapolda. Saan a nakaskasdaaw iti siasinoman ti kinaadu dagiti Saksi ni Jehova iti Bejucal.” Kuna pay ti saan a Saksi a maestro iti haiskul sadiay a ti annak dagiti Saksi ket ‘disente ti panagkawkawesda, nangangato dagiti gradoda, ken nasingpetda iti klase.’