Agehersisioka. Ti kanayon a panangwatwat iti bagi ket makatulong tapno naragragsak, nagangganaygay, nalalaingtayo nga agpanunot, ad-adu ti magapuanantayo, ken makontrol ti kadagsentayo no la ket umiso met ti taraontayo. Saan a kasapulan a narigat wenno nalabes ti panagehersisio tapno epektibo. Makagunggona unay ti regular ken kalkalainganna a panagehersisio sumagmamano a daras kada lawas.

Ti panag-jogging, napartak a pannagna, panagbisikleta, ken pannakipaset kadagiti isport a mangwatwat iti intero a bagi—nga umdas a mangpapartak iti pitik ti puso ken mangpaling-et—ket makapakired iti bagi ken makalapped iti istrok agraman atake ti puso. No dagita nga ehersisio ket mapakuyogan iti kalkalainganna a panagbarbel ken calisthenics, pumigsa dagiti tulang, masel, takkiag ken gurongmo. Makatulong met dagita tapno kanayon a naparpartak ti metabolismo ti bagim ket maliklikam pay ti lumukmeg.

Magnaka. Makagunggona ti panagehersisio iti amin a tattao aniaman ti edadda ken din kasapulan a mapanka pay iti gym tapno maaramidam dayta. Nasayaat a pangrugian ti magna imbes nga aglugan iti kotse, bus, wenno elebeytor. Apay nga agurayka iti pagluganam no mabalinmo met ti magna agingga iti papanam, ken nalabit nabibiitka pay a makadanon? Nagannak, paregtaenyo ti annakyo nga agay-ayamda iti ruar ti balay no posible. Ti kasta nga aktibidad pakirdenna ti bagida ken makatulong iti natunos a panaggaraw dagiti paset ti bagida, banag a di maaramidan dagiti paglinglingayan a kas iti panagay-ayam iti video, ta kanayonda no kua a nakatugaw.

Magunggonaanka iti kalkalainganna a panagehersisio no rugiam dayta, aniaman ti edadmo. No natataengankan wenno adda saksakitmo ken dika nairuam nga agehersisio, nasaysayaat no agkonsultaka iti doktor no kasanoka a mangrugi. Ngem dimo itantantan! Ti panagehersisio nga in-inut a marugian ngem saan a nalabes ket makatulong kadatayo uray kadagiti kalakayan wenno kabaketan tapno mataginayon a napigsa ti masmasel ken natibker ti tultulang. Maliklikan met ti pannakatumbada.

Ehersisio ti nakatulong ken Rustam a nadakamat iti umuna nga artikulo iti daytoy a serye. Pito a tawenen ti napalabas, apagbiitda nga ag-jogging ken ni baketna iti kada agsapa, lima nga aldaw kada lawas. “Idi damo, adu ti pambarmi tapno dikam matuloy,” kinunana. “Ngem ti panag-partner-mi ti nakatulong kadakami nga agregget. Ita, maragsakankami ta nakairuamanmin dayta.”