Panangmatmat iti Lubong

“Ti bilang dagiti nagkasar idiay England ken Wales ket dimmanon iti kababaan pay laeng a bilang sipud nangrugi a mairehistro dagita” idi 1862.​—OFFICE FOR NATIONAL STATISTICS, BRITAIN.

Ti nasurok a 50% kadagiti manedyer ti babassit ken pribado a kompania idiay Estados Unidos “ekspektarenda nga adda napateg a takawen dagiti empleadoda [iti kompaniada] iti sumaganad a tawen.”​—REUTERS NEWS SERVICE, U.S.A.

Awan pay makatawen kalpasan a rinugian dagiti autoridad idiay China ti kampaniada kontra kadagiti pornograpiko a Web site iti Internet, “napasardengdan ti nasurok nga 60,000 kadagita a site,” kuna ti National Office Against Pornographic and Illegal Publications.​—CHINA DAILY, CHINA.

“Nasurok a 215 milion a tattao​—wenno 3% iti populasion ti lubong​—ti [agnanaeden] iti ruar ti nakayanakanda a pagilian.”​—UNITED NATIONS INTERNATIONAL FUND FOR AGRICULTURAL DEVELOPMENT, ITALY.

“Iti 19 nga estudiante nga agpakpakamatay iti inaldaw idiay India, 6 [ti mangaramid iti dayta] gapu iti danag a dida makapasa iti eksamenasion.”​—INDIA TODAY INTERNATIONAL, INDIA.

Dagiti Taktika a Mangpapigsa iti Industria ti Sugal

Iti promedio, ti maysa nga adikto iti sugal idiay Germany ket nasurok a maminsangapulo a maabak no idilig kadagiti saan nga adikto iti dayta a bisio. Dagiti ngarud adikto iti sugal ti “kangrunaan a mangbibiag iti dayta a negosio,” kuna ti diario a Süddeutsche Zeitung. Tapno dakkel ti mapastrek ti industria ti sugal, igagarada nga aramiden a makapaadikto dagiti ay-ayam ken makina a maus-usar. No napaspaspas dagiti makina, napaspaspas met a mapukaw ti panagteppel ti agsugal isu a maadikto. Epektibo dagita a taktika ta dagiti kano adikto ti pagtataudan ti 56% iti mapastrek kadagiti slot machine, 38% kadagiti casino, ken 60% met kadagiti sugal iti Internet.

Kaano ti Kasayaatan nga Isasaklang iti Hues?

Dagiti kadi kasasaad nga awan pakainaiganna iti kaso apektaranna ti desision ti hues? Wen, sigun iti maysa a panagadal. Inusig ti maysa a grupo dagiti managsirarak ti nasurok a 1,000 a desision mainaig iti panangwayawaya nga inyetnag dagiti aduan kapadasan a hues idiay Israel. Naammuan iti panagadal a kadagiti bista kalpasan ti pangngaldaw ken panagmerienda dagiti hues, dagiti paborable a desisionda ket in-inut a bimmaba manipud iti agarup 65% agingga iti dandani 0, ngem kellaat a nagsubli iti 65% kalpasan ti simmaruno a pannangan. Ania ti konklusion dagiti managsirarak? Dagiti desision ket saan a kanayon a naibasar laeng iti ebidensia ken iti linteg. “Mabalin [met] a maapektaran dagiti legal a desisionda kadagiti awan koma ti pakainaiganna a kasasaad.”