MADANAGANKA kadi iti mapasamak iti masanguanan? No wen, saan la a sika ti kasta. Sipud pay idi un-unana, addan nadumaduma nga opinion dagiti tattao maipapan iti masanguanan, ket adu ti mangibaga a saan a naraniag dayta. Nabayagen a paginteresan dagiti tattao ti posibilidad nga asidegen ti panungpalan, wenno kanibusanan ti lubong.

Alaentayo a pagarigan dagiti nabiit pay a parparbo nga estoria. Dagiti komiks, pabuya iti TV, ginasut a pelikula, ken rinibu a libro ket naglaon kadagiti estoria maipapan iti umad-adanin a panungpalan. Kasla kanayon nga adda dagiti puersa a nakasagana a mangdadael ken mangikisap iti sangatauan—kas kadagiti mammapatay a robot, amin a kita ti olimaw, alien (taga-sabali a planeta), zombie (magmagna a bangkay), al-alia, dragon, sunggo, tumatayab, karkarna nga utot, ken higante nga alumpipinig. Sigurado nga awan mangserioso unay kadagiti kasta nga estoria!

Ngem adda dagiti estoria ken teoria a mas mamagnerbios iti sabsabali. Naibasar kano iti siensia ti dadduma kadagita. Sigun iti maysa, bigla nga aggarawto ti intero a makinrabaw a paset ti daga a mangpataud kadagiti dadakkel a tsunami, ginggined, ken bulkan. Iti sabali pay a teoria, agiintarto kano dagiti planeta isu a pumigsa ti angin nga aggapu iti init a mangdadael iti daga. Kuna pay ti dadduma a kellaat nga agsinnukatto dagiti magnetic pole ti daga isu a pumigsa ti radiasion manipud iti init a pakatayantayo amin. Ngem dika agdanag. Saanto a mapasamak dagita. Kaskasdi a dagita ti agtultuloy a mangtukay iti imahinasion ti adu.

Dagiti met ngay nagadu a libro ken Web site maipapan iti panungpalan a  mangipadpadto nga inton Disiembre 21 ita a tawen ti kanibusanan ti lubong? Sigun iti maysa kadagita, ti planeta a naawagan iti Nibiru (wenno Planet X) ket agturturongen iti daga ken dungparenna inton Disiembre 2012. Daytoy ken ti dadduma pay a teoria a di naibatay iti ebidensia ket naibasar iti interpretasion iti nagkauna a kalendario dagiti Maya, a sigun iti dadduma, agpatingga inton Disiembre 2012.

Gapu ta mamatida kadagiti umasping a prediksion maipapan iti didigra, dadduma ti nangaramid kadagiti pagkamanganda iti uneg ti daga iti mismo nga arubayanda wenno, aggastoda iti dakkel tapno agpareserbada iti pagyananda kadagiti pagkamangan a komunidad iti uneg ti daga. Adda met dagiti immakaren iti bambantay ken inruamdan ti agbiag sadiay nga awan dagiti serbisio publiko kas iti suplay ti danum, gas, wenno koriente.

Siempre adda dagiti di mamati iti aniaman kadagita. Dida patien nga asidegen ti panungpalan ti lubong. Kas pagarigan, kuna dagiti sientista ti NASA: “Awan ti dakes a mapasamak iti Daga iti 2012. Nagtultuloy ti nasayaat a kasasaad ti planetatayo iti nasuroken nga 4 a bilion a tawen, ken ammo dagiti mapagtalkan a sientista iti intero a lubong nga awan ti dumteng a peggad iti 2012.”

Ngem maysa a kamali no ibagatayo a saan nga agpegpeggad ti sangatauan. Maysa met a kamali no kunatayo a dagiti la nalaka a maal-allilaw ti mamati nga agpayso a dumteng ti panungpalan ti lubong. Talaga kadi nga addanto dumteng a panungpalan? No wen, kasano ken kaano?